ព័ត៌មានជាតិ

ពិព័រណ៍ការងារឆ្នាំ ២០២២ មានអ្នកដាក់ពាក្យស្វែងរកការងារជាង ៣ ម៉ឺននាក់ លើសការរំពឹងទុក

បានផុស

១ year មុន

នៅ

ថ្ងៃចន្ទ ៣១ តុលា ២០២២

ដោយ

ពិព័រណ៍ការងារ និងផលិតភាពជាតិ ឆ្នាំ ២០២២ រយៈពេលពីរថ្ងៃ គឺនៅថ្ងៃទី ២៨ និង ២៩ ខែតុលា ឆ្នាំ ២០២២ មានយុវជន សិស្ស និស្សិត និងអ្នកស្វែងរកការងារប្រមាណជាង ៣ ម៉ឺននាក់ បានចូលរួមទស្សនាដោយផ្ទាល់ និងដាក់ពាក្យស្វែងរកការងារយ៉ាងច្រើនកុះករលើសការរំពឹងទុក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ចំណែកអ្នកដែលបានចូលទស្សនាតាមអនឡាញ www.careerfair.nea.gov.kh គឺមានចំនួនជាង ៦ ម៉ឺនដង ចូលមើលឱកាសការងាររបស់ក្រុមហ៊ុន និងសហគ្រាសទាំងនោះ។

ទីភ្នាក់ងារជាតិមុខរបរ និងការ(NEA) សូមថ្លែងអំណរគុណយ៉ាងជ្រាលជ្រៅចំពោះ ក្រសួង ស្ថាប័ន ក្រុមហ៊ុន សហគ្រាស គ្រឹះស្ថានអប់រំបណ្ដុះបណ្ដាល និងអង្គការជាតិ-អន្តរជាតិ និងដៃគូអភិវឌ្ឍន៍ ដែលបានផ្តល់ការឧបត្ថម្ភគាំទ្រសម្រាប់ការរៀបចំព្រឹត្តិការណ៍នេះ, ព្រមទាំងចូលរួមតាំងបង្ហាញផ្សព្វផ្សាយ, ចែករំលែកនូវ ចំណេះដឹង និងបទពិសោធន៍ដ៏មានតម្លៃ ក្នុងការចូលរួមបង្កើតឱកាសការងារសម្រាប់ប្រជាពលរដ្ឋកម្ពុជាយ៉ាងសស្រាក់សស្រាំក្រៃលែង។

ទោះបីជាមហាព្រឹត្តិការណ៍ការងារនេះ ត្រូវបានបញ្ចប់ទៅយ៉ាងណាក្តី យុវជន សិស្ស/និស្សិត និងអ្នកស្វែងរកការងារ ដែលខកខានមិនបានចូលរួមក៏នៅតែអាចទទួលបានសេវាការងាររបស់ NEA បានជាធម្មតា។

ពិព័រណ៍ការងារ និងផលិតភាពជាតិ ឆ្នាំ ២០២២ ដែលបានធ្វើឡើងនៅមជ្ឈមណ្ឌលកោះពេជ្រ មានក្រុមហ៊ុនចូលរួមប្រមាណ ១៥០ បញ្ជរ ដើម្បីប្រកាសជ្រើសរើសបេក្ខជនគ្រប់មុខតំណែង ស្របតាមចំណេះ ជំនាញ និងសមត្ថភាពដល់យុវជន និងមានរៀបចំសិក្ខាសាលាលើកកម្ពស់ផលិតភាពក្រោមប្រធានបទស្ដីពី«ការលើកកម្ពស់កម្លាំងពលកម្មជំនាញ ឌីជីថលនីយកម្ម និងផលិតភាព» ផងដែរ។

ពិព័រណ៍ការងារ និងផលិតភាពជាតិនេះ អាចចូលរួមចំណែកដោះស្រាយភាពគ្មានការងារធ្វើ និងការជ្រើសរើសកម្លាំងពលកម្មតាមតម្រូវការតាមរយៈវិធានការប្រមូលផ្តុំ និងផ្សព្វផ្សាយព័ត៌មានជ្រើសរើសកម្លាំងពលកម្មជាសាធារណៈយ៉ាងទូលំទូលាយ សំដៅបំពេញកង្វះខាត នៃការបញ្ជ្រាបឱកាសការងារល្អៗ និងព័ត៌មានទីផ្សារការងារដល់កម្លាំងពលកម្មដែលមានជំនាញ សមត្ថភាព និងបទពិសោធន៍ដែលនិយោជកត្រូវការជ្រើសរើស៕

អត្ថបទ ៖ សំអឿន