រដ្ឋបាលខេត្តកំពង់ឆ្នាំង បន្តជួសជុលផ្លូវមួយខ្សែទៀតប្រវែង១៨០០ ម៉ែត្រ

ឯកឧត្តមអភិបាលខេត្តកំពង់ឆ្នាំង កំពុងអនុញ្ញាតឱ្យក្រុមវិស្វករបន្តចាក់អ៊ុតកៅស៊ូលើផ្លូវក្នុងក្រុងមួយខ្សែទៀត មានប្រវែងប្រមាណ១៨០០ម៉ែត្រ នៅចំណុចពីផ្លូវមុខវត្តធម្មយុទ្ធ ទៅកាន់ដំរី ស ស្ថិតក្នុងសង្កាត់កំពង់ឆ្នាំង និងសង្កាត់ប្អេរ ក្រុងកំពង់ឆ្នាំង។

បុរសម្នាក់ជាវីស្វករចាក់អ៊ុតផ្លូវខាងលើនេះបានបញ្ជាក់ឲ្យដឹងថា ផ្លូវកៅស៊ូដែលត្រូវចាក់អ៊ុតនេះមានប្រវែង ១៨០០ ម៉ែត្រចេញពីចំណុចលូជាប់របងវត្តធម្មយុទ្ធផ្នែកខាងត្បូងទៅដល់ដំរី(ស) ដែលខាងលិចផ្លូវគឺជាដីសង្កាត់ប្អេរ និងខាងកើតផ្លូវជាសង្កាត់កំពង់ឆ្នាំង ក្រុងកំពង់ឆ្នាំង។ វិស្វករខាងលើបានបញ្ជាក់ទៀតថា ការជួសជុលចាក់អ៊ុតផ្លូវកៅស៊ូនេះក្នុងមួយថ្ងៃក្រុមវិស្វករអាចចាក់អ៊ុតបានប្រវែងប្រមាណ​តែ ២០០ម៉ែត្រប៉ុណ្ណោះ ដូច្នេះប្រវែងផ្លូវខាងលើនេះអាចនឹងធ្វើរយៈពេល ៩ ថ្ងៃទើបរួចរាល់។

ឯកឧត្តម ស៊ុន សុវណ្ណារិទ្ធិ អភិបាលនៃគណៈអភិបាលខេត្តកំពង់ឆ្នាំង ថ្មីៗនេះនៅក្នុងអង្គប្រជុំក្នុងសាលាខេត្តបានលើកឡើងថា នៅក្នុងឆ្នាំ២០២២ និង២០២៣ ខាងមុខនេះ រដ្ឋបាទខេត្តនឹងជួសជុលផ្លូវដែលខូចខាតទាំងអស់ក្នុងក្រុងកំពង់ឆ្នាំងជាផ្លូវបេតុង និងជាផ្លូវកៅស៊ូ ។ ជាក់ស្ដែងនៅក្នុងអំឡុងឆ្នាំ២០២២ នេះ រដ្ឋបាលខេត្តបានជួសជុលផ្លូវដែលមានការ​ខូច​ខាតនៅក្នុងក្រុងកំពង់ឆ្នាំង កៅស៊ូជាច្រើនខ្សែរួចមកហើយដូចជា ផ្លូវកៅស៊ូក្រោយប៉ុស្តិ៍រដ្ឋបាលកំពង់ឆ្នាំង ផ្លូវក្រោយ​មន្ទីរពេទ្យបង្អែកខេត្តកំពង់ឆ្នាំងរហូតដល់រោងចក្រអឹមវេ ក្នុងភូមិត្រពាំងចឹក្សា សង្កាត់កំពង់ឆ្នាំង ផ្លូវកៅស៊ូពីសួនច្បារសម្ដេចគង់សំអុលមកដល់មន្ទីរសូរិយោដី ខេត្តកំពង់ឆ្នាំង ផ្លូវខាងកើតជាប់សាលាខេត្តកំពង់ឆ្នាំង ផ្លូវបេតុងខាងលិចសណ្ឋាគារសំរោងសែន ក្នុងភូមិផ្សារលើសង្កាត់ផ្សារឆ្នាំង ។

រដ្ឋបាលខេត្តកំពង់ឆ្នាំងបានបញ្ជាក់ឲ្យដឹងទៀតថា ការកសាងផ្លូវជួសជុលខាងលើនេះ គឺជាថវិការបស់រដ្ឋបាលខេត្តកំពង់ឆ្នាំង ដែលប្រមុខរាជរដ្ឋាភិបាលកម្ពុជាផ្តល់ជូន ។ ដូច្នេះក្រោមការដឹកនាំរបស់សម្ដេចតេជោ ហ៊ុន សែន ប្រមុខរាជរដ្ឋាភិបាលកម្ពុជា ដ៏ឈ្លាសវៃ ពិតជាបានអភិវឌ្ឍន៍ហេដ្ឋារចនាសម្ព័ន្ធគ្រប់វិស័យលើទឹកដីព្រះរាជាណាចក្រកម្ពុជា ដែលនេះ ក៏អាស្រ័យដោយប្រទេសជាតិមានសុខសន្តិភាព និងមានការចូលរួមពីសំណាក់ប្រជាពលរដ្ឋគ្រប់មូលដ្ឋាននិងមន្ត្រីរាជការគ្រប់ស្ថាប័នគាំទ្រផងដែរ ៕

អត្ថបទ៖ ឈៀងថារិទ្ធ