ខេត្តកែបបញ្ចប់គម្រោងទីលានកប់សំរាម និងពីរគម្រោងទៀតកំពុងដំណើរការ ក្រោមឥណទាន ADB

(ខេត្តកែប) គម្រោងទីលានកប់សំរាម ខេត្តកែប បានសម្រេចការសាងសង់រួចរាល់ជាស្ថាពរហើយ ខណៈគម្រោង​ផ្លូវប្របមាត់សមុទ្រ សម្រេចការសាងសង់បានជាង៤០ភាគរយ និងគម្រោងកំពង់ផែទេសចរណ៍លើកោះទន្សាយ ទើបតែដំណើរការសាងសង់បានជាង ១០ភាគរយប៉ុណ្ណោះ។ នេះជាការបញ្ជាក់របស់លោក វ៉ៅ សុខា អភិបាលរងខេត្តកែប ទទួលបន្ទុកគម្រោងការងារនេះ។

នៅថ្ងៃទី ០៣ ខែ វិច្ឆិកានេះ លោក វ៉ៅ សុខា បានដឹកនាំក្រុមការងារពាក់ព័ន្ធ និងតំណាងធនាគារអភិវឌ្ឍន៍អាស៊ី(ADB) ចុះពិនិត្យវឌ្ឍនភាពលើការងារស្ថាបនាទាំង៣គម្រោងនេះ។ បើតាមលោក លោក វ៉ៅ សុខា គម្រោងទាំង៣នេះ ទទួលបានឥណទានពីធនាគារអភិវឌ្ឍន៍អាស៊ីក្នុងទឹកប្រាក់ចំនួន ៣០លានដុល្លារ និងបដិភាគថវិការរបស់​រាជរដ្ឋាភិបាលជាង ៨០ម៉ឺនដុល្លារ។

នៅក្នុងនោះ ទីលានកប់សំរាម បានចំណាយថវិកាប្រមាណ ៧លានដុល្លារ គម្រោងសាងសង់ផ្លូវប្របមាត់សមុទ្រ ប្រើប្រាស់ទឹកប្រាក់ប្រមាណ ១០,៥លានដុល្លារ គម្រោងសាងសង់កំពង់ផែទេសចណ៍ និងទីកន្លែងទេសចរណ៍ នៅលើកោះទន្សាយ ទឹកប្រាក់ប្រមាណ ១,៦លានដុល្លារ។

លោក អភិបាលរងខេត្តកែប បានបញ្ជាក់ថា គម្រោងទាំងនេះ ស្ថិតនៅក្នុងគម្រោងហេដ្ឋារចនាសម្ព័ន្ធទេសចរណ៍​សម្រាប់កំណើនប្រកបដោយបរិយាបន្ន នៃមហាអនុតំបន់មេគង្គជំហានទី២ របស់ធនាគារអភិវឌ្ឍន៍អាស៊ី(ADB)។

តាមរយៈគម្រោងទាំងនេះ លោក វ៉ៅ សុខា លើកឡើងថា គឺជាផ្នែកមួយជួយជំរុញការអភិវឌ្ឍន៍វិស័យទេសចរណ៍ ស្របតាមយុទ្ធសាស្ត្ររបស់រាជរដ្ឋាភិបាល ក្នុងការកំណត់អភិវឌ្ឍប៉ូលទេសចរណ៍ភាគនារតី ដែលមានខេត្តកែបជាទិស​ដៅសំខាន់មួយដែរ។

ជាមួយគ្នានេះ លោក វ៉ៅ សុខា បានជំរុញឱ្យបណ្តាក្រុមហ៊ុនដែលបានដេញថ្លៃក្នុងការអនុវត្តគម្រោង២ទៀត មានផ្លូវប្របមាត់សមុទ្រ និងកំពង់ផែទេសចរណ៍កោះទន្សាយ ធ្វើយ៉ាងណាពន្លឿនការសាងសង់ ដើម្បីឱ្យស្រប​ទៅតាមកាលបរិច្ឆេទនៃការបញ្ចប់ទាំងនោះ។

អត្ថបទ៖ សឹង រ៉ាត់