អដ្ឋិធាតុកងទ័ពវៀតណាមជាង ១ពាន់អដ្ឋិធាតុ​បានបញ្ជូនទៅកាន់មាតុប្រទេសវិញ

រដ្ឋបាលខេត្តកណ្តាលបានបញ្ជូនអដ្ឋិធាតុកងទ័ពស្ម័គ្រចិត្ត និងអ្នកជំនាញការវៀតណាមចំនួន ១២១០អដ្ឋិធាតុ​ធ្វើមាតុភូមិនិវត្តន៍ទៅកាន់មាតុប្រទេសវិញ។ ការប្រគល់-ទទួល បានធ្វើឡើងនៅក្នុងពិធីចុះហត្ថលេខា​បន្តសហការស្រាវ​ជ្រាវរុករកធ្វើមាតុភូមិនិវត្តន៍អដ្ឋិធាតុកងទ័ពស្ម័គ្រចិត្ត និងជំនាញការវៀតណាម ជំហានទី២២ រដូវប្រាំង ឆ្នាំ២០២២​-២០២៣ កាលពីថ្ងៃទី១១ ខែវិច្ឆិកា ឆ្នាំ២០២២។

លោកឧត្តមសេនីយ៍ត្រី នៃ និយម មេបញ្ជាការតំបន់ប្រតិបត្តិការសឹករងខេត្តកណ្តាល និងជាអនុប្រធានអចិន្ត្រៃយ៍គណៈ កម្មការជំនាញខេត្តកណ្តាល បានលើកឡើងថា កងកម្លាំងតំបន់ប្រតិបត្តិការសឹករងកណ្ដាល និងយោធភូមិភាគពិសេស បានសហការជាមួយក្រុមK90 ចុះស្រាវជ្រាវរុករកជីកគាស់អដ្ឋិធាតុកងទ័ពស្ម័គ្រចិត្ត និងជំនាញការវៀតណាម នៅក្នុងភូមិសាស្ត្រស្រុកខ្សាច់កណ្តាល និងស្រុកល្វាឯម បានចំនួន ១៣ចំណុច ដោយសម្រេចលទ្ធផលសរុបចំនួន ២២អដ្ឋិធាតុ។ ក្នុងនោះស្រុកខ្សាច់កណ្តាលចំនួន ១៩អដ្ឋិធាតុ និងស្រុកល្វាឯមចំនួន ៣អដ្ឋិធាតុ ហើយបានធ្វើការ​ប្រគល់-ទទួល ដើម្បីធ្វើមាតុភូមិនិវត្តន៍ទៅកាន់មាតុប្រទេសវិញ កាលពីថ្ងៃទី១៥ ខែកក្កដា ឆ្នាំ២០២២ កន្លងទៅ។

បើតាមលោកឧត្តមសេនីយ៍ត្រី  គិតចាប់ពីឆ្នាំ២០០២ រហូតដល់ថ្ងៃទី១៥ ខែកក្កដា ឆ្នាំ២០២២ កិច្ចសហការជីក​លើកអដ្ឋិធាតុនៅក្នុងភូមិសាស្ត្រខេត្តកណ្តាលទទួលបានលទ្ធផលសរុបចំនួន ១២១០អដ្ឋិធាតុ ក្នុងនោះ បានធ្វើពិធី​ប្រគល់-ទទួល ដើម្បីធ្វើមាតុភូមិនិវត្តន៍ទៅកាន់មាតុប្រទេសវិញរួចរាល់។

លោកឧត្តមសេនីយ៍ត្រី  បានប្តេជ្ញាថា គណៈបញ្ជាការជំនាញយោធភូមិភាគពិសេសសហការជាមួយក្រុមការងារ​ខេត្តកណ្តាល និងក្រុមK90 របស់វៀតណាម ដើម្បីបន្តរុករក ជីកលើក និងធ្វើមាតុភូមិនិវត្តន៍អដ្ឋិធាតុ ជំហានទី ២២ រដូវប្រាំង ឆ្នាំ២០២២-២០២៣ ឲ្យទទួលបានលទ្ធផលល្អ។

ជាមួយគ្នានេះ លោកឧត្តមសេនីយ៍ត្រី ដន ថាញ់ស្វឺន អនុប្រធាននយោបាយ និងជាប្រធានចង្អុលការ៥១៥ នៃកងយោធភូមិភាគទី៩ នៃកងទព័ប្រជាជនវៀតណាម បានថ្លែងថា ការចុះហត្ថលេខាលើកំណត់​ហេតុបន្តសហការ​ស្រាវជ្រាវរុករក ជីកលើក និងធ្វើមាតុភូមិនិវត្តន៍អដ្ឋិធាតុរបស់កងទ័ពស្ម័គ្រចិត្ត និងជំនាញការវៀតណាម ជំហានទី២២ នៅរដូវប្រាំង ឆ្នាំ ២០២២-២០២៣ នៅខេត្តកណ្តាលនៅតែបន្ត ដែលនេះជាការសាមគ្គីរវាងខេត្តទាំងពីរ ដើម្បីរួមគ្នា​សហការ​ធ្វើការគាស់កកាយយកសាកសពឲ្យបានទាន់ពេលវេលា។

ដោយឡែក លោក គង់ សោភ័ណ្ឌ អភិបាលខេត្តកណ្តាល បានថ្លែងថា ការចូលរួមស្រាវជ្រាវ រុករក និងធ្វើមាតុ​ភូមិនិវត្តន៍អដ្ឋិធាតុកងទ័ពស្ម័គ្រចិត្ត និងជំនាញការវៀតណាម គឺជាការងារមនុស្សធម៌ដ៏ល្អប្រសើរ និងជាការបង្ហាញ​ឲ្យឃើញពីទឹកចិត្តប្រជាពលរដ្ឋកម្ពុជាចំពោះការសហការស្រាវជ្រាវ និងរុករកកងទ័ព និងជំនាញការ​ដែលបានពលីជីវិត​ក្នុងសម័យសង្រ្គាមនៅប្រទេសកម្ពុជា។

លោកអភិបាលខេត្ត បានបន្តថា ក្នុងនាមគណៈកម្មការជំនាញខេត្តកណ្ដាល លោកបានសម្តែងនូវការដឹងគុណចំពោះ​វីរភាពដ៏អង់អាចក្លាហានរបស់កម្មាភិបាល-យុទ្ធជនកងទ័ពស្ម័គ្រចិត្តវៀតណាម ដែលបានចូលរួមចំណែកជាមួយកម្ពុជា រហូតធ្វើឲ្យប្រទេសកម្ពុជារួចផុតពីរបបប្រល័យពូជសាសន៍ និងមានសិទ្ធិសេរីភាព មានសន្តិភាព មានស្ថិរភាពសង្គម រហូតដល់សព្វថ្ងៃនេះ៕

អត្ថបទ៖ សំអឿន