ផ្តល់អាហារូបករណ៍គ្រូបង្រៀន ​សិក្សា​នៅ​ជប៉ុន ទាំងស្នាក់នៅ ហូបចុក ធ្វើ​ដំណើរ​ ហ្វ្រី​​ជូន​ទាំង​អស់

ភ្នំពេញ៖រាជរដ្ឋាភិបាលជប៉ុនបានផ្តល់អាហារូបករណ៍ដល់គ្រូបង្រៀនកម្ពុជាកម្រិតបឋមសិក្សានិងមធ្យមសិក្សាព្រមទាំងគ្រូគរុកោសល្យទៅសិក្សានៅប្រទេសជប៉ុនលើជំនាញមួយចំនួនសម្រាប់ឆ្នាំ២០២១នេះ។

យោងតាមសេចក្តីជូនដំណឹងស្តីពីការប្រឡងជ្រើសរើសគ្រូបង្រៀនទៅចូលរួមកម្មវិធី teacher training students នៅប្រទេសជប៉ុនសម្រាប់ឆ្នាំ២០២១របស់ក្រសួងអប់រំយុវជននិងកីឡាដែលទើបទទួលបាននៅថ្ងៃនេះបានឲ្យដឹងថា«ក្រសួងសូមជូនដំណឹងដល់លោកគ្រូអ្នកគ្រូដែលកំពុងបង្រៀននៅតាមសាលាបឋមសិក្សា មធ្យមសិក្សានិងសាលាគរុកោសល្យនៅទូទាំងប្រទេសកម្ពុជាឲ្យបានជ្រាបថាសម្រាប់ឆ្នាំ២០២១នេះក្រោមកម្មវិធីអាហារូបករណ៍teacher training students ក្រសួងអប់រំវប្បធម៌កីឡាវិទ្យាសាស្ត្រនិងបច្ចេកវិទ្យានៅប្រទេសជប៉ុននឹងផ្ដល់អាហារូបករណ៍មួយចំនួនដល់គ្រូបង្រៀនកម្ពុជាដើម្បីទៅសិក្សាស្រាវជ្រាវលើវិស័យអប់រំនៅប្រទេសជប៉ុនចាប់ពីខែតុលាឆ្នាំ២០២១រហូតដល់ខែមីនាឆ្នាំ២០២៣ខាងមុខ»។

ក្រសួងអប់រំបានបន្តថាអាហារូបករណ៍នេះភាគីជប៉ុនជាអ្នកផ្ដល់ប្រាក់អាហារូបករណ៍សម្រាប់ផ្គត់ផ្គង់ការរស់នៅ ធានារ៉ាប់រងថ្លៃសេវាសុខភាព ការស្នាក់នៅនិងថ្លៃសំបុត្រយន្តហោះទៅមកកម្ពុជា‑ជប៉ុននិងជប៉ុន‑កម្ពុជា។

ចំពោះលក្ខខណ្ឌនៃការចុះឈ្មោះជាបេក្ខជនគឺបេក្ខជនទាំងពីរភេទត្រូវមានសញ្ជាតិខ្មែរបានបញ្ចប់ការសិក្សាពីសាលាគោរុកោសល្យណាមួយនឹងកំពុងបង្រៀននៅតាមសាលាបឋមសិក្សាសាលាមធ្យមសិក្សាឬសាលាគោរុកោសល្យនានានៅកម្ពុជាដែលមានរយៈពេលបំពេញការងារយ៉ាងតិច៥ឆ្នាំគិតដល់ថ្ងៃទី១ខែតុលាឆ្នាំ២០២១និងមានអាយុមិនលើសពី៣៥ឆ្នាំមានចំណេះដឹងភាសាអង់គ្លេសកម្រិតមធ្យមនិងមានឆន្ទៈសិក្សាភាសាជប៉ុនមានសុខភាពល្អបរិបូណ៍ទាំងកាយសម្បទានិងសន្តិសបញ្ញា។

ចំណែកកាលបរិច្ឆេទនិងទីកន្លែងទទួលពាក្យបេក្ខជនដែលមានចំណាប់អារម្មណ៍ចំពោះកម្មវិធីអាហារូបករណ៍ខាងលើសូមទាញយកពាក្យសុំប្រឡងដើម្បីបំពេញយកទៅដាក់ពាក្យនៅស្ថានទូតជប៉ុនប្រចាំព្រះរាជាណាចក្រកម្ពុជាចាប់ពីថ្ងៃផ្សាយដំណឹងនេះរហូតដល់ថ្ងៃទី១២ខែមករាឆ្នាំ២០២១។

ចំពោះកាលបរិច្ឆេទនិងទីកន្លែងនៃការប្រឡងក្រសួងអប់រំយុវជននិងកីឡាសហការជាមួយស្ថានទូតជប៉ុននឹងរៀបចំការប្រឡងសំណេរនៅថ្ងៃទី២៥និង២៦ខែមករាឆ្នាំ២០២១ នៅស្ថានទូតជប៉ុនប្រចាំនៅប្រទេសកម្ពុជា៕

សំអឿន