លោក ហេង វ៉ាន់ដា៖ មាន​សាលាចំណេះដឹងទូទៅឯកជនមួយចំនួន បាន​បិទខ្លះហើយ

លោក ហេង វ៉ាន់ដា ប្រធានក្រុមប្រឹក្សាភិបាលសមាគមគ្រឹះស្ថានឧត្តមសិក្សាបានថ្លែងប្រាប់កម្ពុជាថ្មីនៅរសៀលថ្ងៃទី០៦ ខែមករា ឆ្នាំ២០២១នេះថា សាកលវិទ្យាល័យមិនទាន់មានបិទទេ តែរស់មិនរស់ ស្លាប់មិនស្លាប់ ចំណែកសាលាចំណេះដឹងទូទៅឯកជនមួយចំនួនមានបិទខ្លះដែរ សម្រាប់អ្នកដែលមិនពូកែខាងប្រព័ន្ធគ្រប់គ្រងហិរញ្ញវត្ថុ។

លោក ហេង វ៉ាន់ដា បញ្ជាក់យ៉ាងដូច្នេះថា “សម្រាប់សាកលវិទ្យាល័យដូចជាមិនទាន់មានបិទទេ គ្រាន់តែថា រស់មិនរស់ ស្លាប់មិនស្លាប់។ ពីព្រោះសាកលវិទ្យាល័យតម្លៃថោក បើទោះបីជាប៉ះក៏ប៉ះល្មមដែរ ហើយគាត់ក៏ផ្អាកសិនទៅ លើកលែងតែខាងចំណេះទូទៅមានបិទខ្លះដែរ សម្រាប់អ្នកដែលមិនពូកែខាងប្រព័ន្ធគ្រប់គ្រងហិរញ្ញវត្ថុ ហើយអ្នកដែលមានលុយច្រើន ក៏មិនប្រាកដថា ទប់ជាប់ដែរ”។

ឆ្លើយតបសំណួរថា តើមានសាលាប៉ុន្មាន ដែលត្រូវបិទក្នុងអំឡុងពេល នៃការរីករាលជំងឺកូវីដ-១៩ ? លោក ហេង វ៉ាន់ដា អះអាងថា “យើងមិនដឹងថា សាលាណាបិទ ឬមិនបិទនោះទេ ដោយសារតែនៅពេលដែលយើងឲ្យផ្អាកក្នុងអំឡុងពេល នៃការរីករាលដាលនៃជំងឺ Covid-19 ក៏បិទតែម្ដងទៅ ហើយទាំងសាលា ទាំងសិស្ស ទាំងគ្រូ មិននឹកនាពីចូលរៀនវិញ។ ដូច្នេះអត់ដឹងថា អ្នកណាបិទ ឬមិនបិទនោះទេ ហើយនៅពេលខលសួរ នៅតែនិយាយថា នឹងបើក”។

ទោះជាយ៉ាងណាលោកអះអាងថា សាលា​ដែលមានសាខាច្រើន គឺយ៉ាប់បន្តិច ហើយដំណើរការរបស់សាលាឯកជនជាទូទៅ គឺទៅមុខទៅក្រោយ ទៅមុខទៅក្រោយ។ លោកថា ជារួមមិនសម្រាប់តែសាលាទេ ក្នុងអំឡុងពេលនៃការរីករាលដាលនៃជំងឺ Covid-19 នេះ មុខរបរណា ក៏ដូចមុខរបរណាដែរ ម្នាក់ៗកំពុងតែស្ថិតនៅក្នុងការធ្វើចត្តាឡីស័កដូចគ្នា។ តែមានមុខរបបខ្លះ បែរជាគ្រាន់បើទៅវិញ ក្នុងអំឡុងពេល នៃការរីករាលដាលនៃជំងឺ Covid-19 ដូចជាមុខរបរខាងថ្នាំពេទ្យ និងវាក់សាំងជាដើម។

បើតាមលោក ហេង វ៉ាន់ដា មកដល់បច្ចុប្បន្ននេះ សមាគមគ្រឹះស្ថានឧត្តមសិក្សាមានសមាជិកចំនួន១០៥ ប៉ុន្តែចំនួននេះ រាប់តែមេៗទេ ហើយក្នុងមេមួយៗ មានសាខាច្រើនទៀត ដូចជា​សាលាប៊ែលធីជាដើម។

សូមបញ្ជាក់ថា នៅអំឡុងពេល នៃការរីករាលដាលជំងឺ Covid-19នេះ សមាគមគ្រឹះស្ថានឧត្តមសិក្សាកម្ពុជា ក៏ធ្លាប់បានអំពាវនាវឲ្យអាណាព្យាបាល ក៏ដូចជាមាតា បិតា សិស្សដាក់ពាក្យស្នើសុំបញ្ចុះតម្លៃសិក្សារបស់កូនៗនៅតាមសាលារៀនផងដែរ សម្រាប់ការសិក្សាតាមប្រព័ន្ធអនឡាញ។ ការរីករាល នៃជំងឺកូវីដ១៩នេះ ធ្វើឲ្យគ្រឹះស្ថានសិក្សាអប់រំទាំងអស់ទូទាំងប្រទេសកម្ពុជា ត្រូវបានផ្អាកតាំងពីថ្ងៃទី១៤ ខែមីនា ឆ្នាំ២០២០ រហូតមក ហើយក្នុងរយៈពេលផ្អាកការបណ្តុះបណ្តាលនេះ គ្រឹះស្ថានសិក្សាក៏ជួបប្រទះនូវការលំបាក ខាងអាណាព្យាបាលសិស្សក៏ជួបការលំបាក ដោយសារតែប៉ះពាល់ការប្រកបរបររកស៊ីរបស់ពួកគាត់។

គួររំលឹកថា សមាគមគ្រឹះស្ថានឧត្តមសិក្សាកម្ពុជា មិនត្រឹមតែធ្វើការលើផ្នែកសិក្សាអប់រំនោះទេ តែកន្លងមកសមាគម ក៏បានចាត់តាំងសមាជិក សមាជិកា ចូលរួមសង្កេតការណ៏បោះឆ្នោតជ្រើសរើសតំណាងរាស្ត្រ និងការបោះឆ្នោតជាច្រើនទៀត នៅតាមការិយាល័យបោះឆ្នោតទាំង២៥ រាជធានី ខេត្ត ទូទាំងប្រទេស ជាលក្ខណៈចល័ត និងអចល័តផងដែរ។

អត្ថបទ៖ កោះកែវ