ក្រសួង​ទេសចរណ៍​បាន​ច្រានចោល​ ក្រោយមានការ​ផ្សព្វផ្សាយ​ព័ត៌មាន​ពី​ការ​​កំណត់​ទឹកប្រាក់​យក​តាម​ខ្លួន​លើ​ភ្ញៀវ​ទេសចរដែល​ចូល​មក​​ប្រទេសកម្ពុជា។

សេចក្តីប្រកាស​ព័ត៌មាន​របស់​ក្រសួង​ទេសចរណ៍បាន​បញ្ជាក់​ថា ថ្មីៗនេះមានព័ត៌មានលើកឡើងអំពីការកំណត់លក្ខខណ្ឌឲ្យ​ភ្ញៀវទេសចរត្រូវមានសាច់ប្រាក់តាមខ្លួនចំនួន ១.០០០ (មួយពាន់) ឬ២.០០០ (ពីរពាន់)ដុល្លារ មុនចូលមកព្រះរាជាណាចក្រកម្ពុជា ដែលក្នុងនោះក៏មានបុគ្គលិកក្រុមហ៊ុនអាកាសចរណ៍មួយចំនួនបានសាកសួរភ្ញៀវទេសចរឲ្យបង្ហាញ​សាច់ប្រាក់ចំនួន ១.០០០ (មួយពាន់) ឬ ២.០០០ (ពីរពាន់) ដុល្លារ មុនអនុញ្ញាតឲ្យឡើងជិះយន្តហោះ។

ក្រសួងទេសចរណ៍ឆ្លើយបំភ្លឺ​និង​បញ្ជាក់​ដល់សាធារណជន ប្រតិបត្តិករទេសចរណ៍ ក្រុមហ៊ុនអាកាសចរណ៍ ក្រុមហ៊ុនដឹកជញ្ជូន និងភ្ញៀវទេសចរទាំងអស់ថា៖

១. រាជរដ្ឋាភិបាលកម្ពុជាមិនមានគោលនយោបាយណាមួយ តម្រូវឲ្យភ្ញៀវទេសចរមានសាច់ប្រាក់តាមខ្លួនចំនួន ១.០០០ (មួយពាន់) ឬ ២.០០០ (ពីរពាន់) ដុល្លារ ដើម្បីអាចចូលមកព្រះរាជាណាចក្រកម្ពុជានោះទេ។
២. ការសាកសួរភ្ញៀវទេសចរអំពីចំនួនទឹកប្រាក់យកតាមខ្លួន គឺជាសមត្ថកិច្ចរបស់មន្ត្រីជំនាញដែលមានសមត្ថកិច្ចនៅច្រកទ្វារអន្តរជាតិ ដែលត្រូវធ្វើឡើងតែចំពោះករណីសង្ស័យមួយចំនួនតែប៉ុណ្ណោះ មិនប្រកាន់ភ្ញៀវទេសចរជនជាតិណាឡើយ និង​មិនធ្វើឡើងជាទូទៅគ្រប់ភ្ញៀវទេសចរទាំងអស់នោះទេ។

ក្រសួងទេសចរណ៍លើកទឹកចិត្តឲ្យភ្ញៀវទេសចរទាំងអស់គោរពតាមលក្ខខណ្ឌតម្រូវរបស់​ព្រះរាជាណាចក្រកម្ពុជា និងស្វាគមន៍ភ្ញៀវទេសចរទាំងអស់មកទស្សនាព្រះរាជាណាចក្រកម្ពុជា៕