ព័ត៌មានជាតិ

លោកជា ចាន់តូ ៖ ជ័យជំនះ៧មករានៅតែស្ថិតក្នុងក្រអៅបេះដូងពលរដ្ឋគ្រប់រូបៗ

បានផុស

៥ years មុន

នៅ

ថ្ងៃសុក្រ ៨ មករា ២០២១

ដោយ

លោក ជា ចាន់តូ សមាជិកអចិន្ត្រៃយ៍គណៈកម្មាធិការកណ្ដាលគណបក្សប្រជាជនកម្ពុជា និងប្រធានក្រុមការងារថ្នាក់ជាតិចុះជួយស្រុកស្ទោងខេត្តកំពង់ធំបានលើកឡើងថាជ័យជំនះ៧មករានៅតែស្ថិតក្នុងក្រអៅបេះដូងពលរដ្ឋគ្រប់រូបៗ និងក៏ជានិមិត្តរូបនៃសាមគ្គីជាតិ និងមហាគ្រួសារខ្មែរ ជាអមតៈក្រោមម្លប់សុខសន្តិភាពជានិច្ចនិរន្ត៍។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការអះអាងរបស់លោក ជា ចាន់តូ នេះបានធ្វើឡើងនៅព្រឹកថ្ងៃទី៨ខែមករាឆ្នាំ២០២១ក្នុងពិធី«អបអរសាទរខួបអនុស្សាវរីយ៍លើកទី៤២ ថ្ងៃជ័យជំនះ៧មករា! ដែលជាថ្ងៃកំណើតទី២របស់ប្រជាជននិងប្រទេសកម្ពុជាបានសង្គ្រោះ និងរំដោះចេញផុតពីរបបកម្ពុជាប្រជាធិបតេយ្យ។

នៅក្នុងសាររបស់សម្ដេចតេជោ ហ៊ុន សែន ប្រធានគណបក្សប្រជាជនកម្ពុជាដែលអានជូនអង្គពិធីដោយលោក ជា ចាន់តូ បានបញ្ជាក់ថា ចាប់ពីថ្ងៃជ័យជំនះ៧មករាប្រជាជនយើងបានជ្រោងទង់មហាសាមគ្គីជាតិពុះពារជំនះគ្រប់ឧបសគ្គដើម្បីការពាររស់រានមានជីវិតខ្លួននិងកសាងប្រទេសឡើងវិញពីចំណុចសូន្យធ្វើឲ្យមានការផ្លាស់ប្ដូររីកចម្រើនជាជំហានៗរហូតដល់បច្ចុប្បន្ននេះ។

សារបានសង្កត់ធ្ងន់ទៀតថា ស្មារតី៧មករាមានគុណតម្លៃជាអមតសម្រាប់ជាតិនិងប្រជាជនកម្ពុជាក្នុងការបន្តដំណើរទៅមុខទៀតលើមាគ៌ាឯករាជ្យ សន្តិភាព សេរីភាព អព្យាក្រឹត្យប្រជាធិបតេយ្យនិងវឌ្ឍនភាពសង្គម។

នៅក្នុងឱកាសនោះ ជា ចាន់តូបានបញ្ជាក់ថា ឆ្នាំនេះដោយសារជំងឺកូវីដ១៩យើងមិនបានប្រារព្ធខួបអនុស្សាវរីយ៍លើកទី៤២ ថ្ងៃជ័យជំនះ៧មករាក្នុងទ្រង់ទ្រាយធំក៏ដោយប៉ុន្តែអត្តន័យនិងស្មារតីជ័យជំនះ៧មករានៅតែរស់រវើកក្នុងមនសិការរបស់ប្រជាជនកម្ពុជាជានិច្ចគ្មានថ្ងៃបំភ្លេចបានឡើយ។

លោកបានបន្តទៀតថា «យើងនៅចាំច្បាស់ថា៤២ឆ្នាំកន្លងមកនេះ ប្រទេសជាតិនិងប្រជាជនបានឆ្លងកាត់ឧបសគ្គជាច្រើនដើម្បីការរស់រាន និង ការកសាងអភិវឌ្ឍន៍ប្រទេសជាតិ។ ជារួមគឺដៃម្ខាងការពារនិងដៃម្ខាងទៀតបង្កបង្កើននិងកសាងប្រទេសរហូតយើងទទួលបានលទ្ធផលនិងផ្លែផ្ការីកចម្រើនគ្រប់វិស័យដល់សព្វថ្ងៃនេះ»។

លោកបានបន្ថែមថា «គ្មានអ្នកណាដឹងពីការលំបាកវេទនាជាងខ្លួនយើងដែលបានឆ្លងកាត់នោះទេ។ដូចនេះជ័យជំនះ៧មករាគឺនៅតែស្ថិតក្នុងក្រអៅបេះដូងពលរដ្ឋគ្រប់រូបៗ និងក៏ជានិមិត្តរូបនៃសាមគ្គីជាតិ និងមហាគ្រួសារខ្មែរ ជាអមតៈក្រោមម្លប់សុខសន្តិភាពជានិច្ចនិរន្ត»៕

ដោយ ៖ សំអឿន