ទិសដៅ ២០២៣ អាជ្ញាធរជាតិប្រយុទ្ធប្រឆាំងគ្រឿងញៀន កំណត់សកម្មភាពធំៗពាក់ព័ន្ធវិស័យអប់រំ

នាព្រឹកថ្ងៃទី១៤ ខែកុម្ភៈ ឆ្នាំ២០២៣ ក្នុងនាមក្រសួងអប់រំ យុវជន និងកីឡា លោកស្រីបណ្ឌិត សឿ សុជាតា អនុរដ្ឋលេខាធិការ បានចូលរួមកិច្ចប្រជុំបូកសរុបលទ្ធផលការងារឆ្នាំ២០២២ និងទិសដៅការងារឆ្នាំ២០២៣ នៃអាជ្ញាធរជាតិប្រយុទ្ធប្រឆាំងគ្រឿងញៀន នៅអគារសន្តិភាពនៃទីស្តីការគណៈរដ្ឋមន្រ្តី។

ទោះបីមានការខិតខំទាំងផ្នែកអប់រំ បង្រ្កាប និងអនុវត្តច្បាប់ក្ដី វត្តមានបញ្ហាគ្រឿងញៀននៅតែប្រភពបង្កហានិភ័យដល់ដំណើរការអភិវឌ្ឍធនធានមនុស្សឆ្ពោះទៅសម្រេចគោលដៅអភិវឌ្ឍជាតិ ដែលចាំបាច់ទាមទារការចូលរួមសកម្មភាពពីគ្រប់អ្នកអប់រំ និងអ្នកសិក្សានៅទូទាំងប្រទេស “៣កុំ ១រាយការណ៍”។ ជាទិសដៅ ២០២៣នេះ អាជ្ញាធរជាតិប្រយុទ្ធប្រឆាំងគ្រឿងញៀន បានកំណត់ចេញនូវសកម្មភាពធំៗពាក់ព័ន្ធវិស័យអប់រំរួមមាន៖

– បន្តពង្រីកដែនកំណត់អប់រំផ្សព្វផ្សាយនៅតាមគ្រឹះស្ថានសិក្សា និងតាមក្រៅប្រព័ន្ធ

– ជំរុញការបោះពុម្ពសៀវភៅឯកសារបង្រៀនស្តីពី ការបង្ការ ទប់ស្កាត់គ្រោះថ្នាក់បង្កដោយការប្រើប្រាស់គ្រឿងញៀនខុសច្បាប់ និងវិធីសាស្រ្តនៃការបង្រៀន សម្រាប់ថ្នាក់ទី៥ និងទី៦

– ជំរុញកិច្ចសហការបន្តរៀបចំបណ្ណាល័យអេឡិចត្រូនិកគ្រឿងញៀននៅតាមគ្រឹះស្ថានសិក្សាសាធារណៈ និងឯកជននៅរាជធានីភ្នំពេញ ខេត្តសៀមរាប ព្រះសីហនុ និងបន្ទាយមានជ័យ

– បន្តពង្រឹងគុណភាព ប្រសិទ្ធភាព និងបរិមាណនៃការបញ្ជូនសារអប់រំ និងផ្សព្វផ្សាយពីគ្រោះថ្នាក់បង្កដោយគ្រឿងញៀន និងវិធានបង្ការទប់ស្កាត់តាមប្រព័ន្ធគេហទំព័រ គណនីហ្វេសប៊ុករបស់ក្រសួង ស្ថាប័ន

– បន្តជំរុញ និងលើកកម្ពស់សុខភាពផ្លូវចិត្តក្នុងអ្នកអប់រំ និងអ្នកសិក្សា។

គួរបញ្ជាក់ថា ក្នុងនាមអនុប្រធាននៃកម្មវិធីយុទ្ធនាការប្រយុទ្ធប្រឆាំងគ្រឿងញៀន ក្នុងឆ្នាំ២០២២កន្លងទៅ ក្រសួងអប់រំ យុវជន និងកីឡាបានសហការជាមួយអគ្គលេខាធិការដ្ឋាននៃអាជ្ញាធរជាតិប្រយុទ្ធប្រឆាំងគ្រឿងញៀន បានធ្វើការអប់រំដោយផ្ទាល់ដល់អ្នកអប់រំ អ្នកសិក្សា និងតាមរយ:សារអប់រំចំនួន ១៥ ៣១៥ ៥៨១ អង្គ/នាក់ បានរៀបចំដំណើរការបណ្ណាល័យអេឡិចត្រូនិកសម្រាប់ការសិក្សាស្រាវជ្រាវរបស់អ្នកអប់រំ អ្នកសិក្សា ដែលស្ថិតនៅក្នុងបណ្ណាល័យសម្តេចតេជោ បឹងត្របែក ទន្ទឹមនេះក៏បានបញ្ជូននិស្សិតចំនួន ១០ នាក់ទៅចូលរួមកម្មវិធីអប់រំថ្នាក់តំបន់ចំនួន ២លើក៕