បសស នឹងផ្តល់បណ្ណសមាជិកដល់អាជីវករ និងបុគ្គលស្វ័យនិយោជន៍

បេឡាជាតិ សន្តិសុខសង្គម (បសស) កំពុងពិចារណាលើការផ្តល់បណ្ណសមាជិកដល់ក្រុមអាជីវករ និងបុគ្គលស្វ័យនិយោជន៍ នាពេលខាងមុខ។

បុគ្គលស្វ័យនិយោជន៍ សំដៅដល់ជនដែលប្រកបការងារ ឬមុខរបររកចំណូលផ្ទាល់ខ្លួន ដោយមិនពាក់ព័ន្ធនឹង​ប្រាក់ឈ្នួល ឬប្រាក់បៀវត្សដែលផ្តល់ដោយនិយោជក ឬរដ្ឋតាមកិច្ចសន្យាការងារ ហើយក៏មិនមាន​ប្រើប្រាស់​កម្មករនិយោជិតនៅក្នុងសកម្មភាពការងារ ឬមុខរបររបស់ខ្លួន។

លោក សុខ បូរ៉ា ប្រធាននាយកដ្ឋានតាវគលិក នៃ បសស បានឱ្យដឹងថា នៅថ្ងៃខាងមុខបុគ្គលស្វ័យនិយោជន៍ នឹងទទួល​បានរបបពីរ គឺរបបថែទាំសុខភាព និងរបបប្រាក់សោធន ក្រោយពីចុះបញ្ជីចូលជាសមាជិកបេឡាជាតិសន្តិសុខ​សង្គម ដោយស្ម័គ្រចិត្ត។ សង្កត់ធ្ងន់ថា«បុគ្គលស្វ័យនិយោជន៍ យើងនឹងចេញនៅក្នុងអនុក្រឹត្យមួយទៀត»។

យោងតាមច្បាប់សន្តិសុខសង្គម ឆ្នាំ ២០១៩ បានបង្ហាញថា បុគ្គលស្វ័យនិយោជន៍ អាចចូលរបបថែទាំងសុខភាពផង និងរបបសោធនផង ដោយឈរលើគោលការណ៍ស្ម័គ្រចិត្ត។ នេះបើតាមការបញ្ជាក់របស់លោក សុខ បូរ៉ា។

មន្រ្តីជាន់ខ្ពស់រូបនេះ បានបន្ថែមទៀតថា បច្ចុប្បន្នបុគ្គលស្វ័យនិយោជន៍មានប្រមាណពី ៧-៨លាននាក់ នៅកម្ពុជា។

ក្រៅពីនេះ លោក សុខ បូរ៉ា ក៏បានបង្ហើបឱ្យដឹងទៀតថា នាពេលខាងមុខ បសស នឹងគ្របដណ្តប់បន្ថែមទៀតទៅលើ​ប្រជាកសិករ។ ដោយលោក លើកឡើងថា កសិករ ធ្វើស្រែចម្ការ ក៏មានប្រាក់ចំណូល ដូច្នេះ បសស នឹងជំរុញ​បញ្ចូលក្នុងក្រុមបុគ្គលស្វ័យនិយោជន៍ដែរ។ ទាក់ទិននឹងរឿងនេះ លោកថា បសស កំពុងតែរៀបចំសេចក្តីព្រៀង ដើម្បីសិក្សាទិន្នន័យបន្ថែម។