ភ្ញៀវទេសចរប្រមាណជាង ១លាននាក់ បានទៅលេងកម្សាន្ត នៅបុណ្យទន្លេលើកទី៧ ខេត្តកំពង់ធំ ពោលគឺចាប់ពីថ្ងៃទី ៧ ដល់ថ្ងៃទី១០ ខែមីនា ឆ្នាំ២០២៣ ដោយបុណ្យនេះ នឹងបន្តដល់ថ្ងៃ សៅរ៍ និងអាទិត្យ ថែមទៀត។

លោក ថោង ខុន រដ្ឋមន្រ្តីក្រសួងទេសចរណ៍ បានឱ្យដឹងថា ភ្ញៀវទេសចរ ដែលមកកម្សាន្តនេះ ភាគច្រើនជាប្រជាពល​រដ្ឋមកពីក្រុង-ស្រុកទាំង៩ទូទាំងខេត្តកំពង់ធំ និងប្រជាពលរដ្ឋមកពីបណ្ដាខេត្តជាប់ព្រំប្រទល់ ពិសេសខេត្តជាប់​បឹងទន្លេសាប ដូចជា ខេត្តសៀមរាម កំពង់ចាម កំពង់ឆ្នាំង ព្រះវិហារ ខេត្តបាត់ដំបង ខេត្តពោធិ៍សាត់ ខេត្តស្ទឹងត្រែង ខេត្តក្រចេះជាដើម។

បើតាមលោក ថោង ខុន កំណើននៃភ្ញៀវទេសចរច្រើននេះ ដោយសារព្រិត្តិការណ៍ធំនេះ ធ្វើឡើងក្រោយកូវីដ១៩ផង និងចំថ្ងៃទិវានារីអន្តរជាតិ៨មីនាផង។ ពលរដ្ឋដែលចូលរួមពិធីបុណ្យទន្លេនេះ សម្តែងក្តីរីករាយដោយពួកគេបាន​ដើរលំហែមើលភ្លើងពណ៌ដ៏ស្រស់ស្អាត រៀបចំដោយរដ្ឋបាលខេត្ត មើលការសម្តែងសិល្បៈ របាំ ចម្រៀងសម័យ និងទិញផលិតផល ទំនិញម្ហូបអាហារ ដែលអាជីវករដាក់លក់ នៅតាមស្តង់នានា ក្នុងពិព័រណ៍ដែល​សុទ្ធសឹងជា​ផលិតផល​ក្នុងស្រុក៕