មេបញ្ជាការនាវា INS SATPURA អរគុណអភិបាលខេត្ត​ព្រះសីហនុ ដែលឱ្យវានាកងទ័ពជើងទឹកឥណ្ឌា​ចូលចត

លោកវរនាវីឯក KARTIK MURTHY មេបញ្ជាការនាវា INS SATPURA (F48) បានថ្លែងអំណរគុណអភិបាល​ខេត្តព្រះសីហនុ លោក គួច ចំរើន ដែលបានជួយសម្រមសម្រួលឱ្យវានាកងទ័ពជើងទឹកឥណ្ឌាចូលចត ធ្វើទស្សនកិច្ច ដើម្បីបង្កើនចំណងសាមគ្គីភាព មិត្តភាពរវាងកងទ័ពជើងទឹកនៃប្រទេសទាំងពីរ រាជរដ្ឋាភិបាល និងប្រជាជន​នៃប្រទេសទាំងពីរ កាន់តែជិតស្និទ្ធបន្ថែមទៀត។ លោកមេបញ្ជាការ បានកោតសរសើរ ដល់ខេត្តព្រះសីហនុមាន​ការរីកចម្រើន អភិវឌ្ឍគ្របវិស័យក្រោមការដឹកនាំរបស់ឯកឧត្តម អភិបាលខេត្ត។

លោកវរនាវីឯក KARTIK MURTHY លើកឡើងបែបនេះ កាលពីរសៀលថ្ងៃទី ១៤ ឧសភា ចំពេលដែលលោក គួច ចំរើន អភិបាល នៃគណៈអភិបាលខេត្តព្រះសីហនុ បានអញ្ជើញឡើងលើនាវា INS SATPURA (F48) ដើម្បីធ្វើការសំណេះសំណាលជាមួយមេបញ្ជាការនាវា និងកងនាវិករបស់នាវាកងទ័ពជើងទឹកឥណ្ឌា នៅកំពង់ផែស្វយ័តក្រុងព្រះសីហនុ បន្ទាប់ពីនាវាកងទ័ពជើងទឹកឥណ្ឌាបានចូលចតធ្វើទស្សនកិច្ចនៅ​ព្រះរាជាណាចក្រកម្ពុជារយៈពេល៤ថ្ងៃរួចមក គឺចាប់ពីថ្ងៃទី១១ ដល់ថ្ងៃទី១៤ ខែឧសភា ឆ្នាំ២០២៣។

បើតាមរដ្ឋបាលខេត្តព្រះសីហនុ ក្នុងការចូលចតស្នាក់នៅខេត្តព្រះសីហនុ កងនាវិករបស់នាវាកងទ័ពជើងទឹកឥណ្ឌាបាន​ធ្វើដំណើរទស្សនកិច្ចនៅក្នុងក្រុងព្រះសីហនុ ស្របពេលដែលកម្ពុជា ធ្វើជាម្ចាស់ផ្ទះរៀបចំការប្រក្រួតកីឡាស៊ីហ្គេម​អាស៊ីអាគ្នេយ៍លើកទី៣២ (32 SEA GAME) ឆ្នាំ២០២៣ ពិសេសខេត្តព្រះសីហនុ ក៏បានធ្វើម្ចាស់ផ្ទះ នៃការ​ប្រកួតកីឡាស៊ីហ្គេម ៣ប្រភេទ មានទូកក្តោង បាល់ទះលើឆ្នេរខ្សាច់ និងម៉ូតូទឹក។

កម្ពុជា តាមរយៈកំពង់ផែខេត្តព្រះសីហនុ តែងតែបើកឱកាសទទួលនាវាធំៗនៅលើពិភពលោក ឱ្យចូលចតជាបន្តបន្ទាប់ ដើម្បីកសាងទំនាក់ទំនង និងបង្កើតមិត្តភាព។

សូមបញ្ជាក់ថា នាវា INS SATPURA ( F48 ) ជាប្រភេទនាវាប្រយុទ្ធមានបណ្ដោយ១៤៣ម៉ែត្រ ទទឹង ១៦.៩០ម៉ែត្រ ជម្រៅទឹក៦.៩០ម៉ែត្រ និងទម្ងន់ផ្ទុក ៥៣០០តោន ព្រមទាំងផ្ទុកមនុស្សចំនួន ៣៩៥នាក់ និងមានមេបញ្ជាការនាវាលោក វរនាវីឯក KARTIK MURTHY ៕