ព័ត៌មានជាតិ

ព្រឹត្តិការណ៍បិទស៊ីហ្គេម ហាមយកកាបូបស្ពាយឬកាបូបយួរដៃចូលក្នុងពិធី

បានផុស

២ years មុន

នៅ

ថ្ងៃចន្ទ ១៥ ឧសភា ២០២៣

ដោយ

គណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ បានចេញនូវវិធានការ ៩ ចំណុចណែនាំដល់មហាជនដែលត្រូវចូលរួមក្នុងព្រឹត្តិការណ៍បិទកីឡាអាស៊ីអាគ្នេយ៍លើកទី៣២ ឆ្នាំ២០២៣ នៅថ្ងៃទី១៧ ខែឧសភា ឆ្នាំ២០២៣ នៅពហុកីឡាដ្ឋានជាតិមរតកតេជោ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដើម្បីឱ្យការរៀបចំពិធី បិទជាផ្លូវការព្រឹត្តិការណ៍កីឡាអាស៊ីអាគ្នេយ៍លើកទី៣២ ឆ្នាំ២០២៣ ក្រោមវត្តមានសម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន គណៈគណៈកម្មាធិការ CAMSOC បានដាក់ចេញវិធានការ ៩ ចំណុចដលល់អ្នកចូលរួមដូចខាងក្រោម៖

-គោរពពេលវេលា វិន័យ សណ្ដាប់ធ្នាប់ និងសេចក្ដីថ្លៃថ្នូរក្នុងពិធី
-អ្នកដឹកនាំក្រុម ឬជនបង្គោល នៃក្រសួងស្ថាប័ន រាជធានី-ខេត្ត និងដៃគូសហការពាក់ព័ន្ធ ត្រូវសហការជាមួយ ក្រុមការងារលេខាធិការដ្ឋាន ពិធីការ និងអ្នកស្ម័គ្រចិត្តដែលទទួលខុសត្រូវតាមទីកន្លែងនីមួយៗ
-ត្រូវភ្ជាប់មកជាមួយប័ណ្ណចូលរួម និងតាមប្លង់អង្គុយដែលបានរៀបចំជូន
-ផ្តល់សមាសភាពអ្នកដឹកនាំក្រុមមកចូលរួមពិធីជាមុន ដើម្បីមានភាព ងាយស្រួលក្នុងការទំនាក់ទំនងជាមួយក្រុមការងារលេខាធិការដ្ឋាន ពិធីការ និងប្រធានក្រុមអ្នកស្ម័គ្រចិត្តទទួលបន្ទុកតាមច្រកចេញ ចូលនីមួយៗ
-អនុញ្ញាតឱ្យយកចូលទឹកសុទ្ធចំណុះក្រោម ៥០០មីលីលីត្រ អាហារសម្រន់តិចតួច និងថ្មសាកទូរស័ព្ទ ឬ គ្រឿងអេឡិចត្រូនិក (Power Bank) ដែលមានថាមពលចំណុះក្រោម ១០,០០០mAh
-មិនអនុញ្ញាតឱ្យកុមារអាយុក្រោម ១០ឆ្នាំ ចូលរួមក្នុងពិធី

អ្នកចូលរួមមិនត្រូវអនុវត្តដូចខាងក្រោម៖

-ហាមយកកាបូបស្ពាយ ឬកាបូបយួរដៃ ចូលក្នុងពិធី

-ហាមយកអាវុធមុតស្រួច អាវុធជាតិផ្ទុះ ឬឧបករណ៍ដទៃទៀតដែលអាចបង្កហានិភ័យក្នុងពិធី

-ហាមបង្កសម្លេងរំខាន ឬដើរចេញពីកន្លែងអង្គុយក្នុងកំឡុងពេលថ្នាក់ដឹកនាំកំពុងថ្លែងសុន្ទរកថា