បណ្ឌិត គី សេរីវឌ្ឍន៍៖ ការដឹកជញ្ជូនទំនិញតាមរថភ្លើង​បង្ហូរចូលកំពង់ផែចំណេញថ្លៃដើមខ្ពស់

លោកបណ្ឌិត គី សេរីវឌ្ឍន៍ អ្នកជំនាញសេដ្ឋកិច្ចនៃរាជបណ្ឌិត្យសភាកម្ពុជា បានលើកឡើងថា ផ្លូវរថភ្លើង គួរតែជាផ្លូវ​ដែលមានហាប់មួយល្អ និងរត់ជុំវិញប្រទេស ដើម្បីដឹកជញ្ជូនទំនិញពីតំបន់នានា ចូលដល់កំពង់ផែតែម្តង។ ការធ្វើបែបនេះ គឺចំណេញថ្លៃដឹកជញ្ជូនកាត់បន្ថយថ្លៃដើមខ្ពស់។

ប៉ុន្តែលោកបណ្ឌិត គី សេរីវឌ្ឍន៍ បារម្ភថា នៅពេលដែលកម្ពុជា មានប្រព័ន្ធដឹកជញ្ជូនតាមផ្លូវគោក ផ្លូវទឹកល្អ និងមានច្រកបង្ហូរចូលដល់កំពង់ផែហើយ តែបែរជាខ្វះទំនិញ ឬកសិផលសម្រាប់ដឹកជញ្ជូនទៅវិញ។ ត្រង់ចំណុចនេះ លោកថា កម្ពុជា ត្រូវតែពង្រឹងផលិតកម្ម រួមមាន វិស័យកសិកម្ម ដូចជា ដំណាំស្រូវ ដំឡូង កៅស៊ូ ម្រេច ដែលដំណាំទាំងនេះ គឺជាសក្តានុពលរបស់កម្ពុជា។

ក្រៅពីនេះ វិស័យឧស្សាហកម្ម ក៏ត្រូវពង្រឹង ដោយសារបច្ចុប្បន្ននេះ គឺជារបត់មួយដែលត្រូវចាកចេញពីប្រទេសមាន​ចំណូលទាបទៅកាន់ប្រទេសដែលមានចំណូលមធ្យមកម្រិតទាប។ ដូច្នេះការចាកចេញរបស់កម្ពុជា ត្រូវតែដូរនូវរបត់​ផលិតកម្ម មិនអាចផលិតទៅលើឧស្សាហកម្មដែលប្រើកម្លាំងពលកម្មច្រើនទៀតទេ។ នេះជាការបន្ថែមរបស់លោកបណ្ឌិត គី សេរីវឌ្ឍន៍។

ទាក់ទងនឹងវិស័យដឹកជញ្ជូនតាមទឹក លោកបណ្ឌិត គី សេរីវឌ្ឍន៍ ជឿជាក់ថា រាជរដ្ឋាភិបាល នឹងបន្តកសាងព្រែកជីក ស្តារប្រឡាយផ្សេងៗទៀត ដើម្បីជាប្រយោជន៍សម្រាប់ប្រភពទឹកផង និងសម្រាប់ធ្វើជាប្រព័ន្ធដឹកជញ្ជូន​បង្ហូរកសិផល​របស់កសិករផង។

ការលើកឡើងរបស់អ្នកជំនាញសេដ្ឋកិច្ចរូបនេះ បន្ទាប់ពីរាជរដ្ឋាភិបាលកម្ពុជា បង្កើតគម្រោងផ្លូវទឹកតភ្ជាប់ពីទន្លេបាសាក់ ទៅកាន់សមុទ្រខេត្តកែប មានឈ្មោះថា «ព្រែកជីក​ហ្វូណន​តេជោ»។

ជុំវិញការបង្កើតព្រែកជីកនេះ លោកបណ្ឌិត គី សេរីវឌ្ឍន៍ បានលើកឡើងថា នេះគឺជាការលះបង់របស់រដ្ឋាភិបាលដ៏ធំធេង ក្នុងការជួយកាត់បន្ថយថ្លៃដើមក្នុងវិស័យដឹកជញ្ជូន។ លោកបានបន្តថា អ្នកដែលទទួលផលពីព្រែកជីកនេះ គឺពលរដ្ឋខ្មែរ ជាពិសេសប្រជាកសិករ ដែលដឹកកសិផលរបស់ខ្លួនមកកាន់កំពង់ផែ ក្នុងតម្លៃដឹកជញ្ជូនទាប។ នៅពេលថ្លៃដឹកជញ្ជូនទាប តម្លៃដែលកសិករទទួលបាន ពីការលក់កសិផលក៏មានតម្លៃខ្ពស់ទៅតាមនោះដែរ។

សូមបញ្ជាក់ថា កិច្ចការអភិវឌ្ឍសេដ្ឋកិច្ចពាណិជ្ជកម្ម រាជរដ្ឋាភិបាលកម្ពុជា បានខិតខំប្រឹងប្រែងកសាងហេដ្ឋារចនា​សម្ព័ព័ន្ធទាំងផ្លូវគោក និងផ្លូវទឹក សម្រួលដល់ការដឹកជញ្ជូនទំនិញចេញចូលកំពង់ផែ កាត់បន្ថយថ្លៃ ដើម្បីជំរុញដល់​កំណើនសេដ្ឋកិច្ចជាតិ៕