ព័ត៌មានជាតិ

ពលករម្នាក់ លួចរត់ចេញពីមណ្ឌលចត្តាឡីស័កសមត្ថកិច្ចកំពុងស្វែងរក

បានផុស

៥ years មុន

នៅ

ថ្ងៃសៅរ៍ ២៣ មករា ២០២១

ដោយ

បន្ទាយមានជ័យ ៖ ពលករម្នាក់លួចរត់ចេញពីមណ្ឌលចត្តាឡីស័កវិទ្យាល័យមង្គលបូរីកាលពីព្រលប់ថ្ងៃ ២២ ខែមករា ឆ្នាំ២០២១ ទើបវិលមកពីស្រុកថៃសមត្ថកិច្ចកំពុងស្វែងរក។

លោករ័ត្ន ដាស៊ីណង់ បានប្រាប់អ្នកយកព័ត៌មានឲ្យដឹងថា ពលករដែលលួចរត់ចេញពីមណ្ឌលចត្តាឡីស័កវិទ្យាល័យមង្គលបូរីនោះមាន ឈ្មោះ ខា រិន អាយុ ២៣ឆ្នាំ លេខទូរស័ព្ទ ០៦៧ ២៥០ ៩៦៤ នៅភូមិអូរសឿ ឃុំសឿ ស្រុកមង្គលបូរី បន្ទាយមានជ័យ។

លោក លី សារី អភិបាលរងខេត្តបន្ទាយមានជ័យបានប្រាប់នៅព្រឹកថ្ងៃទី២៣ ខែមករា ឆ្នាំ ២០២១នេះថា ពលកររូបនោះ បានត្រឡប់មកពីប្រទេសថៃមកដល់ប្រទេសកម្ពុជាហើយអាជ្ញាធរខេត្តបានបញ្ជូនឲ្យចូលមកក្នុងមណ្ឌលចត្តាឡីស័កវិទ្យាល័យមង្គលបូរីបានចំនួនជា១យប់មកហើយដោយពុំមានសញ្ញាបង្ហាញថា ជាប់ពាក់ព័ន្ធនិងជំងឺកូវីដ១៩នោះទេ។

លោកលី សារី បានបញ្ជាក់ឲ្យដឹងបន្តទៀតថា ស្រាប់តែចូលថ្ងៃទី២៣ ខែមករា ឆ្នាំ២០២១នេះពលករឈ្មោះ ខា រិន បានរត់គេច ដោយមិនបានធ្វើចត្តាឡីស័កបន្តទៀតឡើយ មូលហេតុខ្លាចម្ចាស់បំណុលមកទារ រឿងបំណុល ដែលជំពាក់គេ ហើយមិនអាចមានលទ្ធភាពសងម្ចាស់បំណុលវិញ។ លោកលី សារី បញ្ជាក់ឲ្យដឹងបន្តទៀតមកទល់ពេលនេះ ក្រុមអាជ្ញាធរ និងសមត្ថកិច្ចកំពុងស្វែងរកតែមិនទាន់រកបុរសម្នាក់ឃើញនៅឡើយទេ អាជ្ញាធរបានទៅដល់ផ្ទះរបស់គេហើយ តែមិនឃើញនណាម្នាក់នោះទេ ហើយឥលូវនេះអាជ្ញាធរកំពុងស្វែងរកគាត់នៅតាមផ្ទះសាច់ញាតិរបស់គេ។

លោកលី សារី បានបញ្ជាក់ឲ្យដឹងបន្តទៀតថា អាជ្ញាធរខេត្តមិនទាន់បានធ្វើតេស្តរកមេរោគកូវីដ១៩លើកទី២ និង៣ នៅឡើយ ដោយមិនដឹងថា គាត់មានវិជ្ជាមានមេរោគកូវីដ១៩ បន្ទាប់ពីបានធ្វើតេស្តលើកទី១ អវិជ្ជាមានរួចមក។

លោកថា នៅពេលដែលរកឃើញបុរសដែលរត់ចេញពីមណ្ឌលចត្តាឡីស័កពេលណាមួយនោះអាជ្ញាធរខេត្ត នឹងមិនដាក់ពិន័យណាមួយអំពីការល្មើសទៅនិងវិធានចត្តាឡីស័កនោះឡើយ គាត់ជាជនរងគ្រោះដែលមានបន្ទុកលំបាកជំពាក់លុយគេពេលនេះ បើយើងព្រមានដាក់ពិន័យទៀត មិនសមនោះទេ ហើយអាជ្ញាធរខេត្ត ក៏ពុំទាន់អនុវត្តគោលការតឹងរ៉ឹងផងដែរ៕

ដោយ ៖ វ៉ាន់ ណាង

Related Topics: