ក្រុមប្រឆាំងប្រមាថជីវិតដល់គ្រួសារបង្រៀនឱ្យឯកឧត្តម ហ៊ុន ម៉ានី ចេះធ្វើនយោបាយក្ដៅ

ប្រធានសហភាពសហព័ន្ធយុវជនកម្ពុជា (ស.ស.យ.ក) ឯកឧត្តម ហ៊ុន ម៉ានី សម្តែងការមិនពេញចិត្តយ៉ាងខ្លាំងចំពោះជនអគតិមកពីបក្សប្រឆាំង ដែលបានប្រមាថជីវិតរបស់ក្រុមគ្រួសាររបស់លោក ដែលធ្វើឱ្យលោកចេះធ្វើនយោបាយក្តៅ និងប្រកាន់ជំហរដាច់ខាតចំពោះការធ្វើនយោបាយអសីលធម៌ ហើយក៏មិនអាចអត់ឱនដល់ជននោះបានឡើយ។

ឯកឧត្តម ហ៊ុន​ ម៉ានី បានសង្កត់ធ្ងន់ក្នុងសំណេរហ្វេសប៊ុក នៅថ្ងៃទី២៣ ខែមិថុនា ថា៖ “ប្រជាជន និងជាពិសេសយុវជន យុវនារីខ្មែរស្គាល់ចរិតរបស់ខ្ញុំ តែអស់លោកកំពុងតែបង្រៀនអោយខ្ញុំចេះធ្វើនយោបាយក្តៅហើយ”។

ការលើកឡើងរបស់កូនប្រុសនាយករដ្ឋមន្ត្រីកម្ពុជាបែបនេះ បន្ទាប់ពីមានបុគ្គល២រូប បានបង្ហោះសារ ភ្ជាប់ជាមួយនឹងរូបភាពក្រុមគ្រួសារ និងរូបរបស់សម្តេចតេជោ ហ៊ុន សែន ជាមួយនឹងពាក្យពេចន៍អសីលធម៌ដែលប្រមាថដល់ជីវិតតែម្តង។

ប្រធាន ស.ស.យ.ក រូបនេះបានបញ្ជាក់ថា ក្នុងនាមលោកជាកូនប្រុស លោកពិតជាមិនអាចទទួលយកបានឡើយ ចំពោះការប្រើពាក្យពេចន៍ប្រមាថម្តងហើយម្តងទៀត ដល់ជីវិតរបស់គ្រួសារលោក ពីជនមួយចំនួនមកពីគណបក្សប្រឆាំង។ ទាំងនេះជាទង្វើដែលគ្មានក្រមសីលធម៌បំផុត។

ឯកឧត្តម ហ៊ុន ម៉ានី សរសេរបន្ថែមថា៖ “ក្នុងរយៈពេលច្រើនឆ្នាំមកនេះ អស់លោកម្តងហើយម្តងទៀតបានបង្រៀនខ្ញុំថា ការគិតគូររឿងនយោបាយដែលតម្កល់ផលប្រយោជន៍ជាតិ និងប្រជាជន គឺមិនគ្រប់គ្រាន់ទេ។ ជាពិសេសការធ្វើនយោបាយជាមួយពួកដូចអស់លោក។ ខ្ញុំមិនចោលការតម្កល់ផលប្រទេសជាតិនិងប្រជាជននោះទេ តែចំពោះអស់លោកគឺត្រូវមានវិធានការផ្សេងដែលស្របនឹងចរិតអស់លោក”។

រូបលោកក៏បានចោទជាសំណួរ តើនេះជានយោបាយអ្វី? ជានយោបាយដែលមនុស្សគ្រប់គ្នាអាចទទួលយកបានទេ? ជាទូទៅ ការធ្វើនយោបាយគឺត្រូវមានព្រំដែន និងប្រកួតប្រជែងដោយភាពត្រឹមត្រូវ និងការទទួលខុសត្រូវ។ ព្រមទាំងបែងចែកឱ្យបានច្បាស់រវាងទិដ្ឋភាពសង្គម និងទិដ្ឋភាពផ្ទាល់ខ្លួន៕