ចាប់ពីខែសីហា ការបញ្ចូលថាមពលយាន្តអគ្គិសនី ត្រូវគិតថ្លៃ ​១៦០០រៀល/១គីឡូវ៉ាត់ម៉ោង

ចាប់ពីថ្ងៃទី០១ ខែសីហា ឆ្នាំ២០២៣ តទៅ រាល់ការប្រើប្រាស់ស្ថានីយបញ្ចូលថាមពលយាន្តអគ្គិសនី ស្ថិតក្រោមការគ្រប់គ្រង និងផ្តល់សេវារបស់ក្រសួងសាធារណការ និងដឹកជញ្ជូន នឹងត្រូវគិតតម្លៃ​១៦០០រៀល ក្នុង ១គីឡូវ៉ាត់ម៉ោង។ នេះ​បើ​យោង​តាម​សេចក្តីជូនដំណឹង​របស់ក្រសួងសាធារណការ និងដឹកជញ្ជូន ស្តីពីការយកកម្រៃ លើសេវាបញ្ចូលថាមពល​យានយន្ត​អគ្គិសនី នៅថ្ងៃទី២៥ ខែកក្កដា ឆ្នាំ២០២៣។

យោងតាមលិខិតរបស់ក្រសួងសេដ្ឋកិច្ច និងហិរញ្ញវត្ថុ លេខ ៦៣៧៦ សហវ.ល.ស.អទច ចុះថ្ងៃទី១៩ ខែមិថុនា ឆ្នាំ​២០២៣ ស្តីពីការអនុញ្ញាតឱ្យ ក្រសួងសាធារណការ និងដឹកជញ្ជូន យកកម្រៃសេវាសាធារណៈ លើការបញ្ចូល​ថាមពល​យានយន្តអគ្គិសនី រវាងប្រតិបត្តិករ និងអ្នកប្រើប្រាស់ទាំងអស់ ដើម្បីឱ្យមានគណនេយ្យភាព ប្រសិទ្ធភាព ប្រកបដោយ​និរន្តភាព។ ​

អាស្រ័យហេតុនេះ រាល់ការប្រើប្រាស់ស្ថានីយបញ្ចូលថាមពលយាន្តអគ្គិសនី ដែលស្ថិតក្រោម​ការគ្រប់គ្រង និងផ្តល់សេវារបស់ក្រសួងសាធារណការ និងដឹកជញ្ជូន នឹងត្រូវគិតកម្រៃចាប់ពីដើមខែក្រោយនេះ ពោលគឺថ្ងៃទី០១ ខែសីហា ឆ្នាំ​២០២៣ តទៅ។
ក្រសួងសាធារណការ និងដឹកជញ្ជូន សង្ឃឹមយ៉ាងមុតមាំថា សាធារណជននឹងចូលរួមអនុវត្តតាម សេចក្តីជូនដំណឹងនេះ ឱ្យមានប្រសិទ្ធភាពខ្ពស់៕