ព័ត៌មានជាតិ

រដូវទឹកឡើងសំបូរត្រី ពលរដ្ឋតាមភូមិជាប់ដងទន្លេនាំគ្នាចុះនេសាទរកចំណូលផ្គត់ផ្គង់គ្រួសារ

បានផុស

៣ years មុន

នៅ

ថ្ងៃចន្ទ ៧ សីហា ២០២៣

ដោយ

រដូវវស្សាភ្លៀងធ្លាក់ញឹកញាប់ធ្វើទឹកទន្លេនៅខេត្តក្រចេះជន់ឡើង។ រដូវទឹកឡើងចាប់ពីខែឧសភា រហូតទៅដល់ខែតុលា។ នៅពេលរដូវទឹកឡើង ប្រជាជនរស់នៅតាមដងទន្លេនៅក្នុងឃុំសោប ស្រុកព្រែកប្រសប់ចេញទៅនេសាទ ខណៈត្រីក៏សំបូរទាំងតូចទាំងធំ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បុរសម្នាក់ឈ្មោះ គ្អៀន រស់នៅក្នុងភូមិព្រែករការ ឃុំសោប ស្រុកព្រែកប្រសប់ ខេត្តក្រចេះសប្បាយចិត្តនៅពេលរដូវវស្សាមកដល់ ព្រោះគាត់អាចរកចំណូលបានច្រើនដោយការនេសាទត្រី។

បុរសរូបនេះដែលសព្វថ្ងៃប្រកបមុខរបរសុីឈ្នួលគេព្រោះគ្មានដីស្រែចំការនិងគេ នៅពេលរដូវទឹកឡើងគាត់តែងតែចេញទៅនេសាទត្រីដើម្បីអាចរកចំណូលបន្ថែមផ្គត់ផ្គង់ដល់គ្រួសារ។

បុរសម្នាក់ទៀតឈ្មោះ អាន រស់នៅភូមិឃុំខាងលើដែរក៏បង្ហាញក្តីរីករាយនៅពេលទឹកជន់មកដល់ ព្រោះនៅពេលទឹកចូលព្រែកសំបូរត្រីគាត់ថាក្នុងមួយយប់អាចរកចំណូលបាន ១០ មុឺនរៀល និងអាចនៅសល់ម្ហូបទុកហូបថែមទៀតផង។

ចំពោះបុរសម្នាក់ទៀតនៅភូមិប្រលូងវិញ ដែលមានជំនាញដាក់ឡននៅរដូវទឹកឡើង តែងតែធ្វើឡនដាក់យកអន្ទង់តាមមាត់បឹងឬតាមមាត់ព្រែក អាចរកចំណូលបាន ១០ មុឺនរៀលទៅ ១៥មុឺនរៀល។ យ៉ាងណាបើតាមបុរសរូបនេះប្រាប់ថា មិនសូវបានរាល់ថ្ងៃនោះទេ ដោយសារមានគេដាក់ឡនច្រើនដែរ តែក៏អាស្រ័យទៅលើរដូវសំបូរត្រីផងដែរ។

ប្រជាជនដែលរស់នៅតាមដងទន្លេមេគង្គនៅឃុំសោប ស្រុកព្រែកប្រសប់ ភាគច្រើនចេះនេសាទត្រីក្រៅពីការធ្វើស្រែចម្ការ។ នៅពេលដល់រដូវទឹកឡើង អាជ្ញាធរមូលដ្ឋានក៏តែងតែចុះណែនាំដល់ប្រជាជនឲ្យមានការប្រុងប្រយត្ន័ ជាពិសេសកូនក្មេងតូចៗលេងទឹកអាចបង្កគ្រោះថ្នាក់ដល់ជីវិត និងគ្រោះថ្នាក់ផ្សេងៗទៀត៕

អត្ថបទ៖ លី រតនា

Related Topics:ខេត្តក្រចេះ