ព័ត៌មានជាតិ

អគារមន្ទីរពិសោធន៍វិជ្ជសាស្ដ្រខេត្តព្រះសីហនុគ្រោងនឹងបញ្ចប់ការសាងសង់នៅខែមីនាខាងមុខ

បានផុស

៤ years មុន

នៅ

ថ្ងៃអាទិត្យ ៣១ មករា ២០២១

ដោយ

លោក ឃាង ភារម្យ អ្នកនាំពាក្យសាលាខេត្តព្រះសីហនុបានមានប្រសាសន៍នៅថ្ងៃទី៣១មករានេះថា អគារមន្ទីរពិសោធន៍វេជ្ជសាស្ដ្រដែលមានទីតាំងនៅក្នុងមន្ទីរពេទ្យបង្អែកខេត្តព្រះសីហនុ នោះគ្រោងនឹងបញ្ចប់ការសាងសង់នៅខែមីនា ឆ្នាំ២០២១ខាងមុខ ខណៈបច្ចុប្បន្នការសាងសង់សម្រេចបាន៩០ ភាគរយហើយ។

លោកបានបន្តថា អគារនេះមានមុខងារសម្រាប់ធ្វើការវិភាគសំណាករកមេរោគកូវីដ-១៩និងជំងឺឆ្លងទូទៅផ្សេងៗទៀត ហើយនៅពេលសាងសង់និងបំពាក់ឧបករណ៍រួចរាល់នឹងធ្វើឲ្យរដ្ឋបាលខេត្តព្រះសីហនុ មានភាពងាយស្រួលក្នុងការវិភាគរកមេរោគកូវីដ-១៩ នៅខេត្តផ្ទាល់តែម្តងខណៈដែលកន្លងមកយើងយកសំណាកភ្ញៀវទេសចរក៏ដូចជាប្រជាពលរដ្ឋដែលមានការសង្ស័យមានជំងឺកូវីដ១៩ធ្វើដំណើរទៅកាន់វិទ្យាស្ថានប៉ាស្ទ័រកម្ពុជា នៅរាជធានីភ្នំពេញដែលមានហានិភ័យច្រើន និងមានការយឺតយ៉ាវ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ចំណែក លោក គួច ចំរើន អភិបាលខេត្តព្រះសីហនុធ្លាប់បានជំរុញឱ្យក្រុមគ្រូពេទ្យនៅតាមមណ្ឌលសុខភាពទាំងអស់បញ្ជូនមន្ត្រីរបស់ខ្លួនចូលរួមហ្វឹកហ្វឺនយកសំណាក និងព្យាបាលជំងឺកូវីដ-១៩ដើម្បីត្រៀមបង្ការទុកជាមុន ក្នុងការមានផ្ទុះជំងឺកូវីដ-១៩ក្នុងសហគមន៍។

លោកអភិបាលខេត្តបានបន្តថា «យើងត្រូវមានមន្ត្រីសុខាភិបាលដែលមានជំនាញវិជ្ជាជីវៈត្រឹមត្រូវក្នុងការចូលរួមបំពេញការងារបានល្អ ធានាបាននូវភាពម្ចាស់ការ ក្នុងការយកសំណាក និងព្យាបាលបានទាន់ពេលវេលា ព្រោះជំងឺកូវីដនៅតែជាប្រធានបទក្តៅ មិនទាន់មានប្រទេសណាមួយធានាថា មិនមានការឆ្លងជំងឺនេះនៅឡើយ មានតែត្រៀមបង្ការកុំឲ្យឆ្លងចូលសហគមន៍របស់ពួកគេតែប៉ុណ្ណោះខេត្តព្រះសីហនុរបស់យើង ក៏ត្រូវត្រៀមបង្ការទុកជាមុន»។

គួរបញ្ជាក់ថា អាគារមន្ទីរពិសោធន៍នេះមានទំហំសរុប៤៥៨,២០ម៉ែត្រការ៉េដែលក្នុងនោះគណៈអភិបាលខេត្ត ជាអ្នកទទួលបន្ទុកក្នុងការសាងសង់អាគារ។ ចំណែកម៉ាស៊ីនធ្វើតេស្ត ព្រមទាំងសម្ភារបរិក្ខារមន្ទីរពិសោធន៍ផ្សេងៗ ត្រូវបានឧបត្ថម្ភដោយរដ្ឋាភិបាលនៃសាធារណរដ្ឋប្រជាមានិតចិននិងអង្គការមូលនិធិសាកល៕

អត្ថបទ ៖ សំអឿន