៣រដ្ឋ នៅអាមេរិក កំពុងពិនិត្យ តាមដាន រក Hantavirus ព្រោះហានិភ័យ ឆ្លងរាលដាល

៣រដ្ឋនៅអាមេរិក ដូចជា California, Arizona និង Georgia បានបញ្ជាក់ថា ពួកគេកំពុងដាក់ការពិនិត្យតាមដាន រកមេរោគ Hantavirus លើមនុស្ស ដែលមានប្រវត្តិ ជិះក្នុងនាវាទេសចរណ៍ MV Hondius ព្រោះតែហានិភ័យ ឆ្លងរាលដាល។

តាមការជូនដំណឹងរបស់ មជ្ឈមណ្ឌលគ្រប់គ្រងនិងបង្ការជំងឺឆ្លងអាមេរិក (CDC) នៅថ្ងៃព្រហស្បតិ៍ ទី៧ ខែឧសភា ឆ្នាំ២០២៦, រដ្ឋ California កំពុងពិនិត្យលើករណីនេះ ប៉ុន្តែមិនបញ្ជាក់ពីចំនួនបុគ្គលដែលត្រូវតាមដានឡើយ ខណៈ Arizona អះអាងថា ខ្លួនកំពុងតាមដានលើបុគ្គលម្នាក់។

ទន្ទឹមនោះ រដ្ឋ Georgia បានឲ្យដឹងថា​ ខ្លួនកំពុងតាមពិនិត្យមនុស្ស ២នាក់ ដែលទើបវិលត្រឡប់មកផ្ទះ ក្រោយធ្វើដំណើរកម្សាន្តជាមួយ នាវា MV Hondius។

ទោះបីជាយ៉ាងណាក៏ដោយ CDC អះអាងថា អ្នកទាំងពីរ មិនទាន់ចេញរោគសញ្ញាអ្វីទេ។

រឿងនេះកើតឡើង ស្របពេលនៅចក្រភពអង់គ្លេសឯណោះ មនុស្ស ២នាក់ កំពុងធ្វើចត្តាឡីស័ក ខណៈអ្នកឆ្លង Hantavirus ក្នុងនាវា MV Hondius កើនដល់ ៥ករណី។

តាមការផ្សាយរបស់ BBC នៅថ្ងៃព្រហស្បតិ៍ ទី៧ ខែឧសភា ឆ្នាំ២០២៦, អ្នកទាំង២ កំពុងធ្វើចត្តាឡីស័ក ក្នុងផ្ទះខ្លួនឯង។ ពួកគេមិនចេញរោគសញ្ញាអ្វីទេ ប៉ុន្តែធ្លាប់មានប្រវត្តិជិះក្នុងនាវា MV Hondius តែបានចុះមកវិញ មុនពេលមានសេចក្តីរាយការណ៍ អំពីការផ្ទុះ Hantavirus នៅលើនោះ។

អង្គការសុខភាពពិភពលោក (WHO) បានឲ្យដឹងថា ចំនួនអ្នកឆ្លងមេរោគ Hantavirus នៅលើនាវា MV Hondius បានកើនដល់ ៥ ករណីហើយ។ ករណីទាំងនេះ ត្រូវបានបញ្ជាក់ តាមរយៈការធ្វើតេស្តមន្ទីរពិសោធន៍ ដែលក្នុងនោះ រួមមានទាំងអ្នកដំណើរ ២ នាក់ ដែលត្រូវបានជម្លៀសចេញ ផងដែរ៕

អត្ថបទ៖ សុខ សុវណ្ណ