WMC ដាក់ឱ្យដំណើរការអ៊ែប និងវេបសាយថ្មីបង្កើន​សក្តានុពលផ្សព្វផ្សាយ​អំពីសង្គម និងស្រ្តី

ស្របពេលដែលប្រព័ន្ធឌីជីថលមានការរីកចម្រើន ជាពិសេសប្រព័ន្ធទូរសព្ទស្មាតហ្វូន អង្គការមណ្ឌលព័ត៌មាន​ស្ត្រី​កម្ពុជា(WMC) បានបង្កើនសក្តានុពលផ្សព្វផ្សាយលើប្រព័ន្ធឌីជីថល ដើម្បីជំរុញបេសកកម្ម​របស់ខ្លួនឱ្យកាន់តែ​មានប្រសិទ្ធភាព ពោលគឺបង្កើតអ៊ែបសម្រាប់កម្មវិធីផ្សាយវិទ្យុស្ត្រី ផតខាស និងវេបសាយថ្មី រួមទាំងមាតិកា​សំខាន់ៗផ្សេងទៀត ដើម្បីបង្កលក្ខណៈងាយស្រួលដល់សាធារណជនក្នុងការទទួលព័ត៌មាន។

លោកស្រីបណ្ឌិត អ៊ុង ច័ន្ទថុល នាយិកាប្រតិបត្តិអង្គការមណ្ឌលព័ត៌មានស្រ្តីកម្ពុជា បានលើកឡើងក្នុងពិធីសម្ពោធ​វិទ្យុអនឡាញ-ផតខាស និងវេបសាយថ្មី នាព្រឹកថ្ងៃទី ១១ កញ្ញាថា បេសកកម្មរបស់វិទ្យុស្ត្រី​នៃអង្គការមណ្ឌលព័ត៌មាន​ស្រ្តីកម្ពុជា គឺមានតួនាទីសំខាន់ក្នុងការពង្រឹងសិទ្ធិអំណាចស្រ្តីតាមរយៈប្រព័ន្ធផ្សព្វផ្សាយ និងវិទ្យុ ដែលបានគ្រប​ដណ្តប់​ចំនួន ១៦ខេត្តក្រុងនៅកម្ពុជា។ ដោយឡែកលោកស្រី បានបញ្ជាក់ថា ការបង្កើតកម្មវិធីអ៊ែប វិទ្យុ និងវេបសាយ​របស់​មណ្ឌលព័ត៌មាន បានចំណាយពេលសិក្សារយៈពេលជាង ២ឆ្នាំ ទើបអាចបង្កើតកម្មវិធីនេះបាន។ លោកស្រីបណ្ឌិត អ៊ុង ច័ន្ទថុល អ៊ុង ច័ន្ទថុល ក៏បានថ្លែងកោតសរសេរដល់ក្រុមការងារនៃអង្គការមណ្ឌលព័ត៌មានស្រ្តីកម្ពុជា ដែលខិតខំប្រឹង​ប្រែងបង្កើតមាតិកាថ្មីជាពិសេសពាក់ព័ន្ធសង្គម និងស្រ្តី និងក្រុមការងារបច្ចេកទេសទ្រោះត្រាយបង្កើតអ៊ែប និងវេបសាយ​នេះឡើង។

ជាមួយគ្នានេះ លោកស្រី Friederike Burkert តំណាងអង្គការ GIZ បានលើកឡើងដែរថា ​អង្គការមណ្ឌល​ព័ត៌មានស្រ្តីកម្ពុជា គឺជាដៃគូដែលមានលក្ខណៈរឹងមាំនៅកម្ពុជា។ ដូច្នេះហើយទើប GIZ បង្កើតកិច្ចសហប្រតិបត្តិការ​ជាមួយ WMC ដើម្បីផ្សព្វផ្សាយនិងផ្តល់ព័ត៌មានដល់ប្រជាជនឱ្យបានទូលំទូលាយ ជាពិសេសបញ្ហារបស់ស្រ្តី។ ចំពោះការបង្កើតអ៊ែប និងវេបសាយ ពិតជាមានសារសំខាន់ណាស់ ស្របពេលដែលបច្ចុប្បន្នបច្ចេកវិទ្យា​ទំនើបយុវជន​មានស្មាតហ្វូនប្រើគ្រប់ដៃ ងាយស្រួលក្នុងការទទួលបានព័ត៌មានថ្មីៗ។ នេះជាការបន្ថែមរបស់លោកស្រី Friederike Burkert។

នៅក្នុងពិធីនេះដែរ លោក ហួត ឃាងវេង រដ្ឋលេខាធិការក្រសួងព័ត៌មាន មើលឃើញថា WMC មានចក្ខុវិស័យវែងឆ្ងាយ ជាពិសេសបានបង្កើតកម្មវិធីជាច្រើនមានសារសំខាន់ ក្នុងការពង្រឹងវិជ្ជាជីវៈព័ត៌មាន និងជួយដល់ស្រ្តីនៅកម្ពុជា។ ទន្ទឹមនឹងនេះ លោកបានវាយតម្លៃខ្ពស់ ចំពោះការបង្កើតអ៊ែបវិទ្យុ និងវេបសាយថ្មី ដែលជាការផ្តល់ប្រយោជន៍កាន់តែច្រើន និងសម្បូរបែបដល់យុវជន និងស្រ្តី។ លោកបានគូសបញ្ជាក់ថា ក្រសួងព័ត៌មានគាំទ្រចំពោះការបង្កើតកម្មវិធីថ្មីៗរបស់ WMC ស្របតាមបច្ចេកវិទ្យាទំនើប ជាពិសេសជំរុញភាពរីកចម្រើននៃប្រព័ន្ធផ្សព្វផ្សាយ នៅក្នុងអាណត្តិរដ្ឋាភិ​បាល​ថ្មីនេះ។

សូមបញ្ជាក់ថា រយៈពេល ២៩ឆ្នាំមកនេះ អង្គការមណ្ឌលព័ត៌មានស្ត្រីកម្ពុជា និងវិទ្យុស្ត្រី បានបំពេញបេសកម្មរបស់ខ្លួន ក្នុងការរួមចំណែកលើកស្ទួយសមភាពយេនឌ័រ តួនាទី និង តម្លៃស្រ្តីនៅក្នុងគ្រួសារ សហគមន៍ និងសង្គមជាតិ តាមរយៈ​ប្រព័ន្ធ ផ្សព្វផ្សាយបែបបុរាណ និងសម័យទំនើប នូវកម្មវិធីអប់រំផ្សព្វផ្សាយ វគ្គបណ្តុះបណ្តាល ការផលិត​ព័ត៌មាន ការផ្ទៀងផ្ទាត់ព័ត៌មាន ផលិតវីដេអូ និងសំឡេង និងអត្ថបទជាដើម។ បច្ចុប្បន្នអង្គការ​មណ្ឌលព័ត៌មានស្ត្រីកម្ពុជា មានអ្នកតាម ដានស្តាប់វិទ្យុស្ត្រីជាង២លាននាក់ លើទំព័រហ្វេសប៊ុកផេក​មានចំនួន ៦៥៧៥ និងយូធូបឆាណែល ២៣៩K។

ទន្ទឹមនឹងកម្មវិធីសម្ពោធ អ៊ែបរបស់វិទ្យុស្ត្រី ផតខាស និងវេបសាយថ្មី ក៏មានពិធីលាលែងពីការងារ (Farewell) របស់លោកស្រីនាយិកាប្រតិបត្តិ និងបង្ហាញវត្តមាននាយិកាប្រតិបត្តិថ្មី ដែលនឹងអញ្ជើញបន្តគ្រប់គ្រងដឹកនាំអង្គការ មណ្ឌលព័ត៌មានស្ត្រីកម្ពុជាផងដែរ៕