គិតត្រឹមខែសីហា កម្ពុជា មានពលករកំពុងស្នាក់នៅ និងធ្វើការក្រៅប្រទេស ជាង ១ លាន ៣ សែននាក់

គិត​ត្រឹម​ខែ​សីហា ឆ្នាំ ២០២៣ នេះ កម្ពុជា មាន​ពលករ​កំពុង​ស្នាក់នៅ និង​ធ្វើការ​នៅ​ក្រៅ​ប្រទេស​ប្រមាណ​ជាង ១ លាន ៣ សែន​នាក់ ក្នុង​នោះ​ប្រទេស​ថៃ​មាន​ច្រើន​ជាងគេ​រហូតដល់​ទៅ​ជាង ១ លាន ២ សែន​នាក់។

លោក កត្តា អ៊ន អ្នកនាំពាក្យ​ក្រសួង​ការងារ និង​បណ្ដុះបណ្ដាល​វិជ្ជាជីវៈ បាន​ឲ្យ​ដឹង​នៅ​រសៀល​ថ្ងៃ​ទី ១៣ កញ្ញា​នេះ​ថា គិត​ត្រឹម​ខែ​សីហា​នេះ កម្ពុជា មាន​ពលករ​កំពុង​ស្នាក់នៅ និង​ធ្វើការ​នៅ​ក្រៅ​ប្រទេស​ចំនួន ១៣៤២៩៦៣ នាក់ ស្រី ៥៤៦៩៨១ នាក់ ក្នុង​នោះ​ប្រទេស​ថៃ​ចំនួន ១២៤៨២៤៥ នាក់ ស្រី ៥០២២៥០ នាក់ ប្រទេស​ម៉ាឡេស៊ី​ចំនួន ២២៥៧២ នាក់ ,២១៦៥៤ នាក់ ប្រទេស​អា​រ៉ា​ប៊ី​សា​អូឌីត មាន ២៩ នាក់ ប្រទេស​ជប៉ុន​មាន ២០៨១២ នាក់ ស្រី ៩៦៧៦ នាក់ ប្រទេស​សិង្ហបុរី​មាន ៨៦៤ នាក់ ស្ត្រី​ទាំងអស់ កូរ៉េខាងត្បូង​មាន ៥០២២៥ នាក់ និង​តំបន់​សេដ្ឋកិច្ច​ពិសេស​ហុងកុង​មាន ២១៦ នាក់ ស្រី​ទាំងអស់។

លោក​បាន​បន្ត​ថា ក្នុង​ចំណោម​ពលករ​ជាង ១ លាន ៣ សែន​នាក់ ក្នុង​នោះ​ទៅ​ធ្វើការ​ផ្នែក​កសិកម្ម​មាន​ចំនួន ២៦២៤១៨ នាក់ ផ្នែក​ឧស្សាហកម្ម​ចំនួន ៥៦៥៨១០ នាក់ ផ្នែក​សំណង់​ចំនួន ៣៧៨៦២១ នាក់ ផ្នែក​ការងារ​ផ្ទះ​ចំនួន ១៦៧០៩ នាក់ និង​ការងារ​ផ្សេងៗ​ចំនួន ១១៩៤០៥ នាក់ ដោយ​ពួកគេ​ផ្ញើ​ប្រាក់​ត្រឡប់​មក​ប្រទេស​កម្ពុជា​វិញ​មាន​ចំនួន ២៩១៨៨៧៤១៩៩ ដុល្លារ។

បើ​តាម​លោក កត្តា អ៊ន ពលករ​ទៅ​ធ្វើការ​នៅ​ប្រទេស​ថៃ​ជា​មធ្យម​ទទួល​បាន​ប្រាក់ខែ ៤០០ ដុល្លារ ក្នុង ១ ខែ ប្រទេស​ម៉ាឡេស៊ី​ទទួល​បាន​ប្រាក់ខែ ៣៤០ ដុល្លារ ប្រទេស​អា​រ៉ា​ប៊ី​សា​អូឌីត​ទទួល​បាន​ប្រាក់​ខែ ៤០០ ដុល្លារ ប្រទេស​ជប៉ុន​ទទួល​បាន​ប្រាក់ខែ ១៤០០ ដុល្លារ ប្រទេស​សិង្ហបុរី​ទទួល​បាន​ប្រាក់​ខែ ៥០០ ដុល្លារ កូរ៉េខាងត្បូង​ទទួល​បាន​ប្រាក់ខែ ១៥០០ ដុល្លារ និង​តំបន់​សេដ្ឋកិច្ច​ពិសេស​ហុងកុង​ទទួល​បាន​ប្រាក់ខែ ៥៩១ ដុល្លារ៕

អត្ថបទ ៖ សំអឿន