ខុទ្ទកាល័យសម្ដេច ហ៊ុន ម៉ាណែត ស្នើឱ្យសមត្ថកិច្ចចាត់វិធានការច្បាប់ចំពោះជនក្លែងព្រះរាជក្រឹត្យ

ខុទ្ទកាល័យសម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា ស្នើឱ្យអាជ្ញាធរមានសមត្ថកិច្ចស្រាវជ្រាវជាបន្ទាន់ចំពោះ ជនខិលខូចក្លែងព្រះរាជក្រឹត្យ និងក្លែងបន្លំជាជំនួយការថ្នាក់ដឹកនាំ ដើម្បីចាត់វិធានការចំពោះជនល្មើស និងបក្សពួកតាមនីតិវិធីច្បាប់។ នេះបើតាមសេចក្ដីជូនដំណឹងរបស់ខុទ្ទកាល័យសម្ដេចធិបតីនាយករដ្ឋមន្ត្រី នៅថ្ងៃទី១៥ ខែកញ្ញានេះ។

ខុទ្ទកាល័យសម្តេចធិបតីនាយករដ្ឋមន្រ្តី បានជម្រាបជូនដល់ថ្នាក់ដឹកនាំគ្រប់ក្រសួងស្ថាប័ននៃរាជរដ្ឋាភិបាល និងអាជ្ញាធរគ្រប់ជាន់ថ្នាក់ ព្រមទាំងប្រជាពលរដ្ឋគ្រប់មជ្ឈដ្ឋាន ថា ក្នុងរយៈពេលប៉ុន្មានថ្ងៃចុងក្រោយនេះ មានជនខិលខូចបានដើរទាក់ទងតាមទីកន្លែងមួយចំនួនដោយអះអាងថា ខ្លួនជាជំនួយការរបស់ថ្នាក់ដឹកនាំជាន់ខ្ពស់ និងតាំងខ្លួនជាមន្រ្តីក្នុងក្រសួង និងស្ថាប័ននានា។ ជនខិលខូចទាំងនោះ បានប្រើឥទ្ធិពលនៃការក្លែងបន្លំយកឋានៈ តួនាទីរបស់ខ្លួន ដើម្បីសុំឱ្យអាជ្ញាធរ ដែលនៅតាមកន្លែងទាំងនោះសហការ ក្នុងគោលបំណងកេងប្រវ័ញ្ចទាញយកផលប្រយោជន៍ផ្ទាល់ខ្លួន។

សេចក្ដីជូនដំណឹងដដែលនេះ បានបន្តឱ្យដឹងថា នៅក្នុងសកម្មភាពនេះ ជនខិលខូចបានក្លែងព្រះរាជក្រឹត្យដែលមានព្រះហស្ថលេខារបស់ព្រះករុណាព្រះមហាក្សត្រ ជាទីគោរពសក្ការៈដ៏ខ្ពង់ខ្ពស់បំផុតចំនួន២ច្បាប់។ ដូច្នេះ ខុទ្ទកាល័យសម្តេចធិបតីនាយករដ្ឋមន្រ្តី បានជូនដំណឹងឱ្យថ្នាក់ដឹកនាំបណ្តាក្រសួងស្ថាប័ននៃរាជរដ្ឋាភិបាល និងអាជ្ញាធរគ្រប់ជាន់ថ្នាក់ ព្រមទាំងប្រជាពលរដ្ឋគ្រប់មជ្ឈដ្ឋាន មេត្តាប្រុងប្រយ័ត្នកុំចាញ់បោកជនខិលខូចទាំងឡាយ និងសូមឱ្យអាជ្ញាធរមានសមត្ថកិច្ចជួយសហការធ្វើការស្រាវជ្រាវជាបន្ត ដើម្បីចាត់វិធានការចំពោះជនល្មើស និងបក្សពួកតាមនីតិវិធីច្បាប់៕