ក្នុង​ពិព័រណ៌ចិន-អាស៊ាន សម្តេច​ធិបតី ហ៊ុន ម៉ាណែត ​អះអាង ​រដ្ឋាភិបាល​កម្ពុជា​​អណត្តិថ្មី​​​នឹង​កែលម្អបរិយាកាស​ធុរកិច្ច ឆ្លើយតបតម្រូវការវិនិយោគ​គ្រប់មជ្ឈដ្ឋាន

សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា​បាន​ប្តេជ្ញា​​នឹង​បន្ត​ប្រឹងប្រែង​​ក្នុងការ​​កែ​លម្អ​បរិយាកាស​ធុរកិច្ច​ដើម្បី​បង្កើន​ប្រសិទ្ធភាព​ ក្នុងគោលបំណង​ឆ្លើយតបនឹងតម្រូវការរបស់វិនិយោគិនពីគ្រប់មជ្ឈដ្ឋាន។

ថ្លែងក្នុងពិធីសម្ពោធបើកពិព័រណ៌ចិន-អាស៊ាន លើកទី២០ ឆ្នាំ២០២៣ ក្រោមប្រធានបទ “រួមគ្នាកសាងសហគមន៍មួយ ប្រកបដោយភាពសុខដុម និងវាសនាតែមួយ សម្តេច​ធិបតី​ហ៊ុន ម៉ាណែត ​បាន​គូស​បញ្ជាក់ថា នៅក្នុងអាណត្តិថ្មីរបស់រាជរដ្ឋាភិបាលកម្ពុជា​នឹង​បន្ត​ប្រឹងប្រែងកែលម្អបរិយាកាសធុរកិច្ច និងការវិនិយោគតាម​រយៈការ​កាត់បន្ថយចំណាយធុរកិច្ច បង្កើនប្រសិទ្ធភាពនៃវិស័យដឹកជញ្ជូន និងឡូជីស្ទីក ដើម្បីលើកកម្ពស់ផលិតភាព​ឆ្លើយតបនឹងតម្រូវការ​របស់វិនិយោគិនពីគ្រប់មជ្ឈដ្ឋាន។

​ដោយឡែក​ថ្លែង​នៅក្នុង​កម្មវិធី​ប្រារព្ធខួបលើកទី ២០ នៃការរៀបចំពិព័រណ៍ចិន-អាស៊ាន និង ខួបលើកទី ១០ នៃគំនិតផ្តួចផ្តើមខ្សែក្រវាត់ និងផ្លូវ ​សម្តេចធិបតី ហ៊ុន ម៉ាណែត មើលឃើញ​​ការធ្វើពាណិជ្ជកម្មដោយសេរីនិង​បើក​ចំហ គឺជាវិថីតែ​មួយ​គត់​ដែលនាំមកសុខសន្តិភាព និងវិបុលភាពរួមយ៉ាងពិតប្រាកដ។

សម្តេច​លើកឡើងថា នៅពេលដែលជំងឺកូវីដ-១៩ បានធ្វើឱ្យពិភពលោកចលាចល ចលនាទាំងឡាយរបស់មនុស្សជាតិត្រូវបានធ្លាក់ចុះ ប៉ុន្តែរំហូរពាណិជ្ជកម្មទំនិញនៅ​តែ​បន្តដំណើរការ។ ក្នុងឆ្នាំ ២០២១ និង ២០២២ ពាណិជ្ជកម្មទំនិញបានកើនឡើងខ្ពស់ជាងកម្រិតមុនជំងឺកូវីដ-១៩ ផ្ទុះឡើងទៀត ដែលនេះបញ្ជាក់ពីតួនាទីដ៏សំខាន់នៃពាណិជ្ជកម្មក្នុងការធានា សន្តិសុខផ្នែកសង្គម-សេដ្ឋកិច្ចរបស់ប្រជាជនលើពិភពលោក។

នៅពេលដែលវិបត្តិជំងឺរាតត្បាតបានថមថយទៅ យើងកំពុងតែជួបប្រទះនឹងបញ្ហាប្រឈមផ្សេងទៀត ដូចជា ការកើនឡើងនៃថ្លៃទំនិញយុទ្ធសាស្ត្រ, សន្តិសុខស្បៀង និង ផលប៉ះពាល់ពីការ ប្រែប្រួលអាកាសធាតុ ជាដើម។ នៅត្រង់ចំណុចនេះ សម្តេច​ចង់​គូស​រំលេចពីតួនាទីដ៏សំខាន់របស់ពាណិជ្ជកម្ម ក្នុងការចូលរួមដោះស្រាយបញ្ហាប្រឈមសកលទាំងឡាយដើម្បីធានាថាការពឹងផ្អែកទៅវិញទៅមកនិងសកលភាវូបនីយកម្ម គឺជាការផ្តល់ផលប្រយោជន៍ទៅវិញទៅមក។

ប្រមុខ​ដឹកនាំ​កម្ពុជា​បាន​បញ្ជាក់ថា ការធ្វើពាណិជ្ជមិនគួរត្រូវបានប្រើប្រាស់ជាអាវុធដែលបំផ្លាញដល់សន្តិសុខសេដ្ឋកិច្ចពិភពលោកនោះទេ៕