រដ្ឋបាលខេត្តព្រៃវែង ទទួលបានរថយន្តក្រុងចំនួន ១០ គ្រឿងពីវិស័យឯកជន

រដ្ឋបាលខេត្តព្រៃវែងដឹកនាំដោយលោក ឌុច គន្ធា អភិបាលរងខេត្ត តំណាង សួន សុម៉ាលីន អភិបាលខេត្ត បានទទួល រថយន្តក្រុងចំនួន ១០ គ្រឿងពីក្រុមហ៊ុន ប៊ូ យ៉ុង គ្រុប សម្រាប់យកទៅប្រើប្រាស់ ជាប្រយោជន៍រួមរបស់ខេត្ត។ ពិធីនេះប្រគល់ និងទទួល ធ្វើឡើងនៅកំពង់ផែស្វយ័តក្រុងព្រះសីហនុ  ខេត្តព្រះសីហនុ កាលពីថ្ងៃទី ២៥ កញ្ញា។

ក្នុងឱកាសនៃការប្រគល់ទទួលរថយន្តក្រុងនោះផងដែរលោក ឌុច គន្ធា អភិបាលរងខេត្តព្រៃវែង ក៏សូមថ្លែង អំណរអរគុណចំពោះម្ចាស់ ក្រុមហ៊ុន ប៊ូ យ៉ុង គ្រុប ដែលបានផ្ដល់រថយន្តទាំងអស់នេះ សម្រាប់រដ្ឋបាល ខេត្តព្រៃវែងក្នុងការប្រើប្រាស់ជាប្រយោជន៍រួមរបស់ខេត្ត។

លោក អភិបាលរងខេត្ត បានលើកឡើងថា នេះគឺជាការចូលរួមចំណែកយ៉ាងសំខាន់របស់ម្ចាស់ក្រុមហ៊ុន ដែលបាន ផ្តល់ ជំនួយជារថយន្តក្រុង បើគិតជាទឹកប្រាក់យ៉ាងច្រើនសន្ធឹកសន្ធាប់ មករដ្ឋបាលខេត្តព្រៃវែង ក៏ដូចជាខេត្តផ្សេងៗ ទៀត នៃប្រទេសកម្ពុជា ដើម្បីចូលរួមចំណែកកាត់បន្ថយភាពក្រីក្រជាមួយរាជរដ្ឋាភិបាលកម្ពុជា ក្នុងការអភិវឌ្ឍ ប្រទេសកម្ពុជា ឲ្យកាន់តែរីកចម្រើន។

សូមបញ្ជាក់ថា រថយន្តក្រុងដែលជាអំកណាយរបស់ក្រុមហ៊ុន ប៊ូ យ៉ុង គ្រុបបានផ្តល់ជូនដល់រដ្ឋបាលខេត្ត ចំនួន ១៣ រួមមាន៖ ខេត្តបន្ទាយមានជ័យចំនួន ១០គ្រឿង, ខេត្តកំពង់ចាមចំនួន ១២គ្រឿង, ខេត្តកំពង់ស្ពឺ ចំនួន ១២គ្រឿង, ខេត្តកំពង់ធំចំនួន ១០គ្រឿង, ខេត្តកំពតចំនួន ១២គ្រឿង, ខេត្តកោះកុងចំនួន ៥គ្រឿង, ខេត្តព្រៃវែងចំនួន ១០គ្រឿង, ខេត្តពោធិ៍សាត់ចំនួន ១០គ្រឿង, ខេត្តសៀមរាបចំនួន ១២គ្រឿង, ខេត្តស្ទឹងត្រែង ចំនួន ៦គ្រឿង, ខេត្តកែបចំនួន ៧គ្រឿង, ខេត្តប៉ៃលីនចំនួន ៥គ្រឿង និងខេត្តត្បូងឃុំចំនួន ៨គ្រឿង៕

អត្ថបទ ៖ សៅគ្រី