អ្នកធាក់ស៊ីក្លូ បានប្រាក់ឧបត្ថម្ភពីមូលនិធិត្រីចក្រយាន​កម្ពុជា សម្រាប់ប្រើប្រាស់ក្នុងរដូវភ្ជុំបិណ្ឌ

មូលនិធិត្រីចក្រយានកម្ពុជា(ស៊ីក្លូ)កម្ពុជានៅតែបន្តយកចិត្តទុកដាក់ដល់សមាជិកមូលនិធិត្រីចក្រយានកម្ពុជា នៅក្នុងរាជ​ធានីភ្នំពេញ ដោយបាននាំយកនូវថវិកា និងគ្រឿងឧបភោគ បរិភោគ របស់សម្តេចអគ្គមហាសេនាបតីតេជោ ហ៊ុន សែន ប្រធានកិត្តិយសមូលនិធិត្រីចក្រយានកម្ពុជា(ស៊ីក្លូ) ជូនពួកគាត់ជាបន្តបន្ទាប់ ដើម្បីជួយសម្រួលការ​លំបាកក្នុងជីវ​ភាពរស់នៅប្រចាំថ្ងៃ ពិសេសនៅក្នុងឱកាសបុណ្យភ្ជុំបិណ្ឌនេះ។

ជាក់ស្តែងនៅព្រឹកថ្ងៃទី ០៧ តុលា ២០២៣នេះ លេខាធិការដ្ឋានមូលនិធិត្រីចក្រយានកម្ពុជា ដោយមានការ​ចាត់តាំងពីលោក ឃួង ស្រេង អភិបាលនៃគណៈអភិបាលរាជធានីភ្នំពេញ និងជាប្រធានក្រុមប្រឹក្សាភិបាល​មូលនិធិត្រីចក្រយានកម្ពុជា បាននាំយកនូវថវិកា និងគ្រឿងឧបភោគ បរិភោគ ជូនដល់សមាជិកមូលនិធិស៊ីក្លូ​ក្នុងរាជធានីភ្នំពេញ ចំនួន២៩៩នាក់បន្តទៀតនៅក្នុងឱកាសបុណ្យភ្ជុំបិណ្ឌនេះ ដើម្បីពួកគាត់ប្រើ​ប្រាស់​ទៅវត្ត​ធ្វើបុណ្យទាន និងជួបជុំគ្រួសារ ។

លោក ម៉េត មាសភក្តី អ្នកនាំពាក្យរដ្ឋបាលរាជធានីភ្នំពេញ និងជាប្រធានលេខាធិការដ្ឋានមូលនិធិត្រីចក្រយានកម្ពុជា បានមានប្រសាសន៍លើកឡើងថា សម្តេចអគ្គមហាសេនាបតីតេជោហ៊ុន សែន តែងក្រើនរំលឹកឱ្យលោក ឃួង ស្រេង យកចិត្តទុកដាក់ និងមើលថែពីសុខទុក្ខបងប្អូន សមាជិកអ្នកធាក់ស៊ីក្លូក្នុងរាជធានីភ្នំពេញជានិច្ច ។ ជាក់ស្តែងនៅព្រឹកនេះ បងប្អូនដែលជាសមាជិកមូលនិធិស៊ីក្លូក្នុងរាជធានីភ្នំពេញ បានទទួលថវិកា ៥ម៉ឺន មី ១កេស ទឹកសុទ្ធ១កេស ត្រីខ១យូរ បន្ថែមពីលើការឧបត្ថមប្រចាំខែ ដើម្បីឱ្យពួកគាត់បានប្រើប្រាស់បានទៅវត្តធ្វើបុណ្យទាន និងជួបជុំគ្រួសារ។

លោកបន្តថា សម្តេចអគ្គមហាសេនាបតីតេជោហ៊ុន សែន យកចិត្តទុកដាក់ខ្លាំងណាស់ ចំពោះបងប្អូន​ជាសមាជិក​មូលនិធិស៊ីក្លូ ពោលគឺឱ្យតែមានពិធីបុណ្យជាតិធំៗ ម្តងៗ សម្តេចតែងបានផ្តល់អំណោយជូនពួកគាត់ជានិច្ច។ ក្រៅពីនេះ បងប្អូនអ្នកធាក់ស៊ីក្លូទាំង២៩៩នាក់ ក៏ទទួលបានប្រាក់ខែជារៀងរាល់ខែចំនួន២១ម៉ឺនរៀលផងដែរ ដោយក្នុង១ខែ​ពួកគាត់អាចបើកបាន៣ដង ក្នុង១ដង ៧ម៉ឺនរៀល ជាមួយនឹងផ្តល់ជូនបណ្ណ ប. ស. ស ដើម្បីឲ្យបងប្អូន អាចទៅព្យា​បាលជំងឺដោយមិនអស់ប្រាក់នៅតាមមន្ទីរពេទ្យរដ្ឋនានា ។ បន្ថែមពីនេះទៀត ក្នុងអំឡុងពេល​ដែលប្រទេស​កម្ពុជា ក៏ដូចជារាជធានីភ្នំពេញ កំពុងប្រឈមមុខនឹងការរាតត្បាតជំងឺកូវីដ-១៩ សម្តេចមិនត្រឹម​តែផ្តល់វ៉ាក់សាំងជូនពួកគាត់ទេ នូវបានផ្តល់អំណោយជាគ្រឿងឧបភោគ បរិភោគ ម៉ាស អាកុល ជែល អាវភ្លៀង ជូនពួកគាត់ថែមទៀត ។

គួរបញ្ជាក់ផងដែរថា មូលនិធិនេះត្រូវបានបង្កើតឡើងតាំងពីថ្ងៃទី ១៨មករាឆ្នាំ២០១៨ គឺមានរយៈពេល៥ឆ្នាំហើយ ក្រោមការ​ផ្តួចផ្តើមដ៏ខ្ពង់ខ្ពស់របស់សម្តេចអគ្គមហាសេនាបតីតេជោហ៊ុនសែន សំដៅអភិរក្សស៊ីក្លូ ដែលមានដើមកំណើត​តាំងពីសម័យអនានិគមនិយមបារាំងមកម្លេះ៕

អត្ថបទ៖ ស្រីរ័ត្ន