​ពលរដ្ឋរងការលិចលង់នៅព្រែកប្រាសុំឱ្យអាជ្ញាធរជួយរំដោះទឹកចេញ

ប្រជាពលរដ្ឋរាប់ពាន់គ្រួសាររស់នៅតំបន់បឹងព្រលឹតស្ថិតក្នុងភូមិអូរអណ្តូងទី១ សង្កាត់ព្រែកប្រា ខណ្ឌច្បារអំពៅ រាជធានីភ្នំពេញបានស្នើសុំឱ្យអាជ្ញាធរជួយដាក់ម៉ាសុីនបូមទឹកដើម្បីរំដោះទឹកចេញពីតំបន់លិចលង់ ខណៈពួកគាត់កំពុងជួបការលំបាក។

ប្រជាពលរដ្ឋសុំមិនបញ្ចេញឈ្មោះបានឲ្យដឹងថា ទីតាំងនេះបានរងការលិចលង់ចាប់តាំងពីថ្ងៃទី ១៣ ខែតុលា ដែលមកដល់ពេលនេះផ្ទះប្រជាពលរដ្ឋរាប់ពាន់ខ្នងរងការលិចលង់ដែលអ្នកខ្លះជម្លៀសខ្លួនចេញទៅរកផ្ទះបងប្អូនស្នាក់នៅហើយខ្លះទៀតស៊ូទ្រាំស្នាក់នៅដោយលំបាក។ អ្វីដែលលំបាកទៀតនោះគឺក្មេងតូចៗមិនបានទៅរៀនសូត្រព្រោះពុំអាចចេញរួច។

ប្រជាពលរដ្ឋបន្តថា អស់រយៈពេលជាង ១០ឆ្នាំ ហើយតំបន់នេះមិនដែលរងការលិចលង់ដូចឆ្នាំនេះបន្ទាប់ពីការសាងសង់បុរីជុំវិញរួច។

ទាក់ទិនទៅនឹងការលិចលង់ផ្ទះប្រជាពលរដ្ឋស្ថិតនៅទីតាំងខាងលើនេះបងប្អូនប្រជាពលរដ្ឋសុំឲ្យលោក ចេង មុនីរ៉ា អភិបាលនៃគណអភិបាលខណ្ឌច្បារអំពៅមេត្តាជួយដាក់ម៉ាសុីនបូមទឹកខ្នាតធំដាក់បូមទឹកចេញផង។ បើទុកបន្តទៅទៀតកូនចៅប្រជាពលរដ្ឋច្បាស់ជាកើតជំងឺដង្កាត់គ្រប់ៗគ្នាហើយ៕

អត្ថបទ៖ នរា