ជប៉ុន សន្យាជួយបង្រៀនជំនាញប្រឆាំងបទល្មើសបច្ចេកវិទ្យាដល់នគរបាលកម្ពុជា

អគ្គនាយកកិច្ចសហប្រតិបត្តិការអន្តរជាតិ នៃទីភ្នាក់ងារនគរបាលជាតិជប៉ុន លោកSANO Tomoki សន្យាជួយបណ្តុះបណ្តាលកសាងសមត្ថភាព ជំនាញ​ប្រឆាំងបទល្មើសបច្ចេកវិទ្យា ដោយនឹងផ្តល់ជូនតាមរយៈអង្គការចៃកា (Jica) នៅកម្ពុជា។

ភាគីជប៉ុន សន្យាជួយបែបនេះ គឺតបតាមសំណើររបស់លោក ស ថេត ដែលស្នើភាគីនគរបាលជាតិជប៉ុន ពិនិត្យលទ្ធភាពបង្កើនកិច្ចសហការលើការងារបណ្តុះបណ្តាល ជាពិសេសការបណ្តុះបណ្តាលជំនាញប្រឆាំងបទល្មើសបច្ចេកវិទ្យា ដើម្បីឆ្លើយតបទៅនឹងការបង្ការ ទប់ស្កាត់ និងបង្រ្កាបបទល្មើសឱ្យមានប្រសិទ្ធភាព។

នេះបើតាមខ្លឹមសារនៃជំនួបពិភាក្សាការងារទ្វេភាគី រវាងលោក ស ថេត អគ្គស្នងការនគរបាលជាតិកម្ពុជា ជាមួយ លោក SANO Tomoki អគ្គនាយកកិច្ចសហប្រតិបត្តិការអន្តរជាតិ នៃទីភ្នាក់ងារនគរបាលជាតិជប៉ុន។

ក្នុងជំនួបដែលធ្វើឡើងក្នុងទីក្រុងវៀងច័ន្ទ ប្រទេសឡាវ  លោក SANO Tomoki បានអរគុណនគរបាលជាតិកម្ពុជា ដែលកន្លងមកបានសហការគ្នាយ៉ាងល្អក្នុងការប្រយុទ្ធប្រឆាំងបទល្មើស។ ក្រៅតែពីការអរគុណភាគី ជប៉ុនក៏បានស្នើសុំដល់ លោក ស ថេត បន្តពង្រឹងកិច្ចសហប្រតិបត្តិការរវាងនគរបាលជាតិកម្ពុជា និងនគរបាលជាតិជប៉ុន។

ជាការឆ្លើយតប លោក ស ថេត អគ្គស្នងការនគរបាលជាតិកម្ពុជា សន្យាបង្កើនកិច្ចសហការប្រតិបត្តិការបង្ការ បង្រ្កាបបទល្មើសគ្រប់ប្រភេទ ពិសេសបទល្មើសបច្ចេកវិទ្យា ក្នុងគោលបំណងថែរក្សាសន្តិសុខ សុវត្ថិភាព ជូនពលរដ្ឋប្រទេសទាំងពីរ ក៏ដូចជាក្នុងតំបន់ផងដែរ។

ពីជំនួបកាលពីថ្ងៃទី១៧ ខែតុលានេះ លោក SANO Tomoki  ក៏បានអប​អរចំពោះលោក ស ថេត ដែលត្រូវបាន ព្រះមហាក្សត្រកម្ពុជា តែងតាំងជាអគ្គស្នងការនគរបាលជាតិ។

សូមជម្រាបថា ជំនួបទ្វេភាគីនេះធ្វើឡើងក្នុងឱកាសដែល នាយឧត្តមសេនីយ៍ ស ថេត ដឹកនាំគណៈប្រតិភូជាន់ខ្ពស់ អគ្គស្នងការដ្ឋាននគរបាលជាតិ ចូលរួមសន្និសីទអាស៊ានណាប៉ូល លើកទី៤១ (The 41st ASEANAPOL CONFFERENCE) ក្រោមប្រធានបទ «ពង្រឹងភាពជាដៃគូ ដើម្បីលើកកម្ពស់សន្តិភាព ស្ថិរភាព និងសន្តិសុខ» នៅទីក្រុងវៀងច័ន្ទ ប្រទេសឡាវ៕

ដោយ៖ ង៉ិល ណារ៉ាត់