ក្រុមហ៊ុនស្ថាបនា​ប្រព័ន្ធលូកខ្វក់ និងទឹកភ្លៀង​កាយ​​អាចម៍ដីទុកចោលរាយប៉ាយ​បង្ក​ការ​លំបាក​ដល់​ពលរដ្ឋ​ធ្វើ​ដំណើរ

ក្រុមហ៊ុនទទួលសិទ្ធិកសាងប្រព័ន្ធលូទឹកកខ្វក់ និងទឹកភ្លៀង ក្នុងក្រុងសិរីសោភ័ណ ទុកអាចម៍ដីចោលរាយប៉ាយពេញផ្លូវ បង្ក​ការ​លំបាក​ដល់​ពលរដ្ឋ​ធ្វើដំណើរស្រប​ពេល​រដូវភ្លៀងផង។

ផ្ទះប្រជាពលរដ្ឋដែលត្រូវក្រុមហ៊ុនកសាងប្រព័ន្ធលូទឹកកខ្វក់ និងទឹកភ្លៀងធ្វើកាត់នោះម្នាក់ៗបាននិយាយប្រាប់អ្នក​យក​ព័ត៍មាន​ថា ការអភិវឌ្ឍន៍ក្នុងខេត្តពួកគាត់សប្បាយចិត្តណាស់ តែក្រុមហ៊ុនទទួលសិទ្ធិគួរ​អនុវត្តកសាងប្រព័ន្ធលូទឹកកខ្វក់ និងទឹកភ្លៀងនេះមិនដឹងក្រុមហ៊ុនគិតយ៉ាងណា ធ្វើទុកចោលអាចម៍ដីរាយប៉ាយក្រឡុកធំៗ។ ប្រជាពលរធ្វើដំណើរចេញចូល​មិន​ចង់​រួចពិសេសនៅចំណុចម្តុំបេនឡានមុខប្រៃសនីយ៍ ម្តុំមន្ទីរពេទ្យបង្អែកក្រុងសិរីសោភ័ណ ផ្លូវលេខ២ លេខ៣ និង លេខ៤ជាដើម។

ប្រជាពលរដ្ឋនិយាយបន្តឲ្យដឹងទៀតថា ពួកគាត់សុំឲ្យក្រុមហ៊ុនធ្វើនៅត្រង់ណាធ្វើឲ្យរួចរាល់សិន ចាំបន្តទៅធ្វើកន្លែងផ្សេងទៀត កុំធ្វើកន្លែងណាបំផ្លាញកន្លែងនោះទុកអាចម៍ដី រាយប៉ាយចោលក្រឡុកក្រហេងក្រហូងដក់ទឹកធ្វើឲ្យប្រជាពលរដ្ឋធ្វើដំណើរមិនកើតនោះវាមិនល្អនោះទេ។

ក្រុងសិរីសោភ័ណឲ្យតែដល់រដូវវស្សាចូលមកដល់ ពេលមានភ្លៀងធំមក ១ មេៗលិចស្ទើរគ្រប់ទីកន្លែងពិសេសគឺ បេន​ឡាន​ចាស់ថ្មីរង្វង់មូលស្រីគ្រប់ល័ក្ខណ៍។ ពេលខ្លះផ្សារហ៊ុយឡេងក៏លិចដែរ រាប់ម៉ោងទើបទឹកភ្លៀងស្រក់ហូរចូលស្ទឹងអស់ ដោយសារអ្នកនៅចំណុចបេនឡានចាស់ ពេលសាងសង់ផ្ទះថ្មចាក់ដីលុបលូហើយខ្ពស់ជាងថ្នល់ជាតិចង់កន្លះម៉ែត្រ។ តែ ឆ្នាំ ២០២៣នេះ ក្រុងសិរីសោភ័ណឈប់លិចដូចឆ្នាំមុនៗទៀតហើយ ព្រោះក្រុមហ៊ុនទទួលសិទ្ធិអនុវត្តកសាងប្រព័ន្ធលូទឹកកខ្វក់ និងទឹកភ្លៀងកំពុងចាប់ផ្តើមធ្វើនៅជុំវិញបេះដូងខេត្តនេះហើយ។

យ៉៉ាងណាមិញ​ក្រុមហ៊ុនទទួលសិទ្ធិអនុវត្តដាក់ប្រព័ន្ធលូរំដោះទឹកភ្លៀង​បង្ក​ក​អាចម៌ដី​រាយប៉ាយពេញថ្នល់​ បង្កឲ្យផ្លូវមួយចំនួនបានខូចខាត ដោយសារ​ការជីកកាយដីថ្នល់និងដាក់ប្រព័ន្ធទុយោលូនិងកសាងហេដ្ឋារចនាសម្ព័ន្ធ ហើយបង្កការរំខាន និងការលំបាកដល់ការរស់នៅនិងការធ្វើដំណើររបស់ពលរដ្ឋ។

លោកអ៊ុំ រាត្រី អភិបាល​ខេត្ត​បន្ទាយមានជ័យ​បានបញ្ជាក់ឲ្យដឹងថា ប្រព័ន្ធលូទឹកកខ្វក់និងលូរំដោះទឹកភ្លៀងនៃ “គម្រោងកែលម្អបរិស្ថានជុំវិញបឹងទន្លេសាបជំហាន ២​” នៅក្រុងសិរីសោភ័ណ​ ដែលកំពុងអនុវត្តបានធ្វេីការជួសជុល​ផ្លូវ​ឡើងវិញ​ជាបណ្តេីរៗ​​ហើយ។

ចំណែក លោក សយ សេដ្ឋា ប្រធានការដ្ឋាននៃក្រុមហ៊ុនសំណង់ ទីក្រុងប៉េកាំង ហ្គ្រុប ប្រចាំខេត្តបន្ទាយមានជ័យ បានប្រាប់ប្រាប់អ្នកយកព័ត៍មានឲ្យដឹងថា ការអនុវត្តការសាងសង់ប្រព័ន្ធទឹកកខ្វក់ និងប្រព័ន្ធទឹកភ្លៀង នៃគម្រោងកែលម្អបរិស្ថាន​ជុំវិញបឹងទន្លេសាបជំហាន២​ នៅក្រុងសិរីសោភ័ណនេះ ប្រើឥណទានធនាគារអភិវឌ្ឃន៍អាស៊ី (ADB) ហើយមានទីប្រឹក្សាបច្ចេកទេស ដូចជា RAMBOLI ,OC GLOBAL ,SCE ,TANCONS និងសាងសង់ ដោយក្រុមហ៊ុន BUCG អនុវត្តបាន ៤៧% នៃរយៈពេលអនុវត្ត គិតពីខែកញ្ញា ឆ្នាំ២០២២ ដល់ខែកញ្ញា ឆ្នាំ២០២៤ ។

លោក ខែម ពេជ្ររស្មី មន្ត្រីសាលាក្រុង និងជាមន្ត្រីសម្របសម្រួលគម្រោង បានប្រាប់អ្នកយកព័ត៍មានឲ្យដឹងថាការសាងសង់ប្រព័ន្ធទឹកកខ្វក់ និងប្រព័ន្ធ​ទឹកភ្លៀងនៃគម្រោងកែលម្អបរិស្ថាន​ជុំវិញបឹងទន្លេសាបជំហាន ២​ នៅក្រុងសិរីសោភ័ណ មានក្រសួងនិងមន្ទីរសាធារណការ និងដឹកជញ្ចូន ជាម្ចាស់គម្រោង ហើយអាជ្ញាធរនិងសមត្ថកិច្ចពាក់ព័ន្ធ ចូលរួម។ ប្រព័ន្ធលូនេះ មានប្រវែងសរុប ១១២ គីឡូម៉ែត្រគ្របដណ្តប់លើផ្នែកវិសាលភូមិសាស្ត្រ សង្កាត់កំពង់ស្វាយ ព្រះពន្លា អូរអំបិល និងសង្កាត់ទឹកថ្លា ហើយប្រើឥណទាន ធនាគារអភិវឌ្ឍន៍អាស៊ី ចំនួន ២២ លានដុល្លារ៕

អត្ថបទ៖ វ៉ាន់ ណាង