ព័ត៌មានជាតិ

ពលរដ្ឋឃុំតាតៃ ចង់បានមន្ត្រីជំនាញចុះវិនិច្ឆ័យវាស់វែងដីធ្លីលក្ខណៈជាប្រព័ន្ធ

បានផុស

១ year មុន

នៅ

ថ្ងៃព្រហស្បតិ៍ ២៦ តុលា ២០២៣

ដោយ

តំណាងប្រជាពលរដ្ឋឃុំតាតៃ ស្រុកកោះកុង ចង់បានក្រុមមន្ត្រីជំនាញចុះពិនិត្យវិនិច្ឆ័យវាស់វែងដីធ្លីលក្ខណៈជាប្រព័ន្ធឲ្យឆាប់រហ័ស ខណៈភូមិឃុំស្រុកមួយចំនួនមានការវាស់វែង និងចេញប្លង់រួចរាល់ហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ទេព ម៉ាឡា តំណាងប្រជាពលរដ្ឋឃុំតាតៃ លើកឡើងនៅថ្ងៃទី ២៦ ខែតុលា នេះថា បណ្ណកម្មសិទ្ធិអចលនទ្រព្យជាដីធ្លីជាសេចក្តីត្រូវការចង់បានយូរឆ្នាំមកហើយ ដោយធ្លាប់ស្នើសុំជាច្រើនលើកផងដែរទៅកាន់អាជ្ញាធរស្រុកខេត្ត និងមន្ទីរជំនាញ ចុះមកវាស់វែង ដើម្បីទទួលយកប្លង់រឹងមានទុកប្រើប្រាស់ ឬ ចែកកូនចៅទៅថ្ងៃមុខ។

ក្នុងវេទិកាសាធារណៈផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្តកោះកុង លោក ទេព ម៉ាឡា បន្ថែមថា ក្រៅពីការចង់បានប្លង់កម្មសិទ្ធិដីធ្លីនេះហើយ លោក និងប្រជាសហគមន៍អេកូទេសចរធម្មជាតិទឹកជ្រោះតាតៃ ក៏ស្នើសុំគ្រប់គ្រងតំបន់ទេសចរណ៍នេះមកវិញ ទោះបីជាមានការកាត់ភូមិសាស្ត្រខាងលើទៅចូលក្នុងឃុំប៉ាក់ខ្លង ស្រុកមណ្ឌលសីមា យ៉ាងណាក៏ដោយ។

លោក ម៉ាឡា បញ្ជាក់ថា ពលរដ្ឋរបស់លោកមិនដឹងថាប្រកបមុខរបរអ្វីក្រៅពីការអាស្រ័យអនុផលព្រៃឈើ និងបម្រើសេវាកម្មទេសចរណ៍កម្សាន្ត ប្រសិនយកតំបន់ទឹកជ្រោះទៅឲ្យស្រុកមណ្ឌលសីមា ពួកគាត់នឹងបាត់បង់ចំណូលផ្គត់ផ្គង់ជីវភាពជាក់ជាពុំខាន។

ឆ្លើយតបនឹងសំណើរបស់ពលរដ្ឋ លោកស្រី មិថុនា ភូថង អភិបាលខេត្តកោះកុង លើកឡើងថា ការដែលក្រុមមន្ត្រីខកខានមិនចុះវាស់វែងជូន ដោយសារតែក្រុមការងារជំនាញមានភារកិច្ចចំពោះមុខជាច្រើន និងខ្វះមន្ត្រី ដូច្នេះលោកស្រីសុំការអភ័យទោសពីសំណាក់ប្រជាពលរដ្ឋ។

លោកស្រីអភិបាលខេត្តកោះកុង នឹងជំរុញធ្វើយ៉ាងណាឲ្យការចុះវាស់វែងជូនពលរដ្ឋឃុំតាតៃ ចុះមកវិនិច្ឆ័យជូនពលរដ្ឋនាពេលខាងមុខ។

ដោយឡែកតំបន់ទឹកជ្រោះតាតៃ ត្រូវបានលោកស្រី អះអាងថា ច្បាប់បានកំណត់ព្រំប្រទល់រវាងស្រុក និងស្រុក ហើយតាមបែបបទរដ្ឋបាល គ្រាតំបន់ទឹកជ្រោះតាតៃ មួយផ្នែកស្ថិតនៅស្រុកមណ្ឌលសីមា និងមួយផ្នែកទៀតស្ថិតនៅក្នុងស្រុកថ្មបាំង។ ប៉ុន្តែបែបនេះក្តី លោកស្រី នឹងបើកកិច្ចប្រជុំពិសេសមួយ ដើម្បីសម្របសម្រួលទៅថ្ងៃមុខ សំដៅធ្វើយ៉ាងម៉េចរកដំណោះស្រាយរួមអំពីតំបន់ភូមិសាស្ត្រគ្រប់គ្រង៕

អត្ថបទ ៖ សិរីវឌ្ឍនៈ

Related Topics:ខេត្តកោះកុង