សម្ដេចតេជោ៖ បើមិនជឿព្រះអង្គច័ន្ទមុនី កុំប្រមាថ ទុកសេរីភាពខាងជំនឿ ជូនអ្នកដែលជឿ

សម្ដេចតេជោ ហ៊ុន សែន ប្រធានក្រុមឧត្ដមប្រឹក្សាផ្ទាល់ព្រះមហាក្សត្រ នៅថ្ងៃទី០៦ ខែវិច្ឆិកា ឆ្នាំ២០២៣នេះ បានបង្ហោះវីដេអូព្រះអង្គច័ន្ទមុនីកំពុងប្រោសព្រំប្រសិទ្ធីពរជ័យក្នុងគេហដ្ឋាន លោកជំទាវ ហ៊ុន ម៉ាលី នៅលើគណនីតិកតុក ជាមួយនឹងខ្លឹមសារថា “បើមិនជឿ កុំប្រមាថ ទុកសេរីភាពខាងជំនឿ ជូនអុ្នកដែលជឿ”។

តាមរយៈវីដេអូរយៈពេល ជាង១នាទី៣០វិនាទីនោះ  គេសង្កេតឃើញថា ព្រះអង្គច័ន្ទមុនី កំពុងតែប្រោសព្រំប្រសិទ្ធីពរជ័យ នៅក្នុងគេហដ្ឋានកូនស្រីពៅរបស់សម្ដេចតេជោ គឺលោកជំទាវ ហ៊ុន ម៉ាលី ព្រមទាំងក្រុមគ្រួសារ។

តាមរយៈសំណេរនៅលើគណនីតិកតុកដដែល សម្ដេចតេជោ បានសរសេរបន្ថែមអំពីសកម្មភាពចៅស្រីទី២១ របស់សម្ដេចថា “ថ្ងៃនេះយ៉ាយ៉ាចេះលបថ្វាយបង្គំព្រះអង្គច័ន្ទមុនីពេលព្រះអង្គនិមន្តមកផ្ទះកូនស្រីពៅ”។

ជាការកត់សម្គាល់ មួយរយៈចុងក្រោយនេះ ពលរដ្ឋខ្មែរជាច្រើនរាប់សិបនាក់ ដែលជាអ្នកកាន់ព្រះពុទ្ធសាសនា តែងតែចូលទៅជួបថ្វាយបង្គំព្រះអង្គច័ន្ទដល់វត្តផ្ទាល់។ ឯអ្នកខ្លះទៀតបានស្កាត់ទៅជួបព្រះអង្គច័ន្ទមុនី នៅពេលដែលដឹងថា ព្រះអង្គច័ន្ទមុនីនិមន្តទៅកាន់ទីអារាមណាមួយ។ ចំណែកឯពុទ្ធសាសនិកខ្លះទៀត ក៏បាននិមន្តព្រះអង្គច័ន្ទមនុី ទៅដល់គេហដ្ឋានផ្ទាល់តែម្ដង៕

អត្ថបទដោយ៖ ង៉ិល ណារ៉ាត់