នគរបាលខេត្តព្រៃវែង នាំយកអត្តសញ្ញាណបណ្ណ និងសៀវភៅគ្រួសារធ្វើហើយ​ប្រគល់ជូនពលរដ្ឋដល់ខ្នងផ្ទះ

កម្លាំងនគរបាលតាមបណ្ដាអធិការដ្ឋានក្រុង-ស្រុក ទាំង ១៣ និងកម្លាំងនគរបាល នៃប៉ុស្តិ៍នគរបាលរដ្ឋបាលទូទាំង​ខេត្តព្រៃវែង ពន្លឿនប្រសិទ្ធភាពការងារក្នុងការបម្រើសេវាសាធារណៈជូនប្រជាពលរដ្ឋ ដោយបាននាំយក​អត្តសញ្ញាណ​បណ្ណសញ្ជាតិខ្មែរ និងសៀវភៅគ្រួសារ ដែលធ្វើរួចរាល់ទៅប្រគល់ប្រជាពលរដ្ឋដល់ខ្នងផ្ទះ និងបានចុះសួរសុខ​ទុក្ខប្រ​ជាពលរដ្ឋជាប្រចាំក្នុងមូលដ្ឋាន ដើម្បីសាកសួរអំពីបញ្ហាសន្តិសុខ សណ្ដាប់ធ្នាប់ និងបទល្មើសផ្សេងៗ ដែលកើតឡើងក្នុង​មូលដ្ឋាន។ 

ក្នុងនោះផងដែរ ដើម្បីឆ្លើយតបរាល់សំណូមពរ តម្រូវការរបស់ប្រជាពលរដ្ឋក្នុងមូលដ្ឋាន មន្ត្រីនគរបាលខេត្តព្រៃវែង ក៏បានផ្សព្វផ្សាយ និងជំរុញបន្ថែមដល់ពលរដ្ឋដែលមានកូនគ្រប់អាយុ និងអ្នកហួសសុពលភាព ត្រូវទៅធ្វើអត្តសញ្ញាណ​បណ្ណសញ្ជាតិខ្មែរឱ្យបានគ្រប់ៗគ្នា ៕

អត្ថបទ ៖ សៅគ្រី