ព័ត៌មានជាតិ

បុរសជនជាតិភាគតិចព្រៅទិញដីបាន ៣០អា ប្រាប់បទពិសោធន៍ពីការចេះសន្សំលុយ

បានផុស

១ year មុន

នៅ

ថ្ងៃអង្គារ ២១ វិច្ឆិកា ២០២៣

ដោយ

លោក ភឿក ត្រួក ដែលជាជនជាតិភាគតិចព្រៅរស់នៅក្នុងខេត្តរតនគិរីបានប្រាប់បទពិសោធន៍ពីការចេះសន្សំលុយ រហូតអាចទិញដីបានមួយកន្លែងសម្រាប់ធ្វើរបរកសិកម្ម។ ប្រាក់សន្សំរកបានដោយអាស្រ័យផលពីធនធានធម្មជាតិ និងការស៊ីឈ្នួលគេ ហើយចំណាយពេលប្រហែល ១២ ខែ ទើបមានលទ្ធភាពទិញដីដោយប្រើប្រាស់លុយសន្សំហើយថ្ងៃក្រោយចង់ប្រែក្លាយដីដែលបានទិញទុកដាំដំណាំចិញ្ចឹមជីវិត។

ជាជនជាតិភាគតិចព្រៅរស់នៅភូមិផាវ ឃុំតាវែងក្រោម ស្រុកតាវែង ខេត្តរតនគិរី លោក ភឿក ត្រួក បានឲ្យដឹងថា ដីដែលទិញបាននោះមានទំហំ ៣០អា ដែលលោកបានចំណាយអស់ថវិកាជាង ១ ០០០ ដុល្លារ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ភឿក ត្រួក

បន្ថែមពីរបរធ្វើកសិកម្ម លោក ភឿក ត្រួក បច្ចុប្បន្នក៏ជាគ្រូបណ្ដុះបណ្ដាលផ្នែកហិរញ្ញវត្ថុនៅសហគមន៍ជនជាតិភាគតិចក្នុងខេត្តរតនគីរី ដែលជាគម្រោងគាំទ្រដោយធនាគារ ABA។

លោក ភឿក ត្រួក ប្រាប់ថា ការចេះសន្សំទុកដាក់លុយទើបធ្វើឲ្យលោកអាចមានលទ្ធភាពទិញដីតាមបំណងប្រាថ្នាបានដោយសារលោកបានចូលរៀនវគ្គបណ្ដុះបណ្ដាលពីការគ្រប់គ្រងហិរញ្ញវត្ថុ។

«ពីមុនខ្ញុំអត់ចេះសន្សំលុយកាក់អីទេ។ បានចាយបានចាយ មិនដឹងសន្សំគោលបំណងអ្វី។ អ្វីជាបំណងប្រាថ្នាដើម្បីអនាគត»។

បុរសរូបនេះប្រាប់វិធីសាស្រ្តនៃការសន្សំគឺលោកសន្សំទុកដាក់ជាមួយភរិយា មិនដាក់កូនជ្រូក បំពង់ឫស្សី ក្រុមសន្សំក្នុងសហគមន៍ ឬដាក់ធនាគារនោះទេ។

ការសន្សំក៏មិនកំណត់គឺតាមលទ្ធភាពដែលអាចរកបានជាថ្ងៃ ជាអាទិត្យ ឬជាខែ។ យ៉ាងណាលោក ភឿក ត្រួក បញ្ជាក់ថា ការសន្សំត្រូវចេះបែងចែកឲ្យបានច្បាស់លាស់រវាងខ្ទង់ចំណាយ និងខ្ទង់សន្សំដោយមិនត្រូវឲ្យប៉ះពាល់គ្នាទេ។

លោក ភឿក ត្រួក បានប្រាប់បន្តថា ដីដែលលោកទិញតាមរយៈប្រើប្រាស់ប្រាក់សន្សំ លោកមានបំណងយកទៅដាំដំឡូងមី ដើម្បីទុកដោះស្រាយជីវភាពក្នុងគ្រួសារទៅថ្ងៃក្រោយ៕

Related Topics:ខេត្តរតនគិរី