រាជរដ្ឋាភិបាល ជំរុញខ្លាំងលើវិស័យដឹកជញ្ជូន​ផ្លូវគោក ផ្លូវទឹក និងអាកាស ដើម្បីបម្រើ​សេដ្ឋកិច្ចជាតិ

គិតត្រឹមរយៈពេលបីខែ នៃការដឹកនាំរបស់រាជរដ្ឋាភិបាលថ្មី បានសម្រេចសមិទ្ធផលជាច្រើន លើការវិនិយោគហេដ្ឋារចនា​សម្ព័ន្ធនានា។ ក្នុងនោះ ហេដ្ឋារចនាសម្ព័ន្ធអាទិភាព ដែលរដ្ឋាភិបាលអាណត្តិទី៧ បាននិងកំពុងយកចិត្តទុកដាក់ខ្លាំង និងអភិវឌ្ឍដោយគ្មានការស្ទាក់ស្ទើរ គឺលើវិស័យដឹកជញ្ជូនផ្លូវគោក(ផ្លូវដេក) ផ្លូវទឹក និងអាកាស ដើម្បីបម្រើដល់​ប្រយោជន៍​ប្រជាពលរដ្ឋ ជាពិសេសជំរុញកំណើនសេដ្ឋកិច្ចជាតិ។

សម្តេច ហ៊ុន ម៉ាណែត នាយករដ្ឋមន្រ្តីកម្ពុជា បានលើកឡើងនៅក្នុងពិធីសម្ពោធបើកឱ្យប្រើប្រាស់ជាផ្លូវការ ​“កំណាត់ផ្លូវជាតិលេខ៥​ ចាប់ពីព្រែកក្តាម ទៅដល់បាត់ដំបង​ និងបើកការដ្ឋានសាងសង់កំណាត់ផ្លូវជាតិលេខ៥ ចាប់ពីសិរីសោភ័ណ្ឌ ទៅដល់ប៉ោយប៉ែត នាថ្ងៃទី២២ វិច្ឆិកា ២០២៣ ថា ការអភិវឌ្ឍហេដ្ឋារចនាសម្ព័ន្ធផ្លូវ សម្រាប់មធ្យោបាយដឹកជញ្ជូន គឺជាសរសៃឈាមដ៏សំខាន់ដើម្បីបម្រើដល់ការធ្វើដំណើររបស់ប្រជាពលរដ្ឋ ទាក់ទាញវិនិយោគ និងជំរុញកំណើនសេដ្ឋកិច្ចជាតិ។

បើតាមសម្តេចនាយករដ្ឋមន្រ្តី រាជរដ្ឋាភិបាលថ្មី ដែលទើបចាប់កំណើតបានបីខែ គិតត្រឹមថ្ងៃទី ២២ វិច្ឆិកានេះ បង្កើតបានសមិទ្ធផលជាច្រើន លើការអភិវឌ្ឍហេដ្ឋរចនាសម្ព័ន្ធជាមូលដ្ឋានគ្រឹះនៃកំណើនសេដ្ឋកិច្ច ដោយក្នុងនោះ គោលដៅអាទិភាពសំខាន់ គឺធ្វើយ៉ាងណាអភិវឌ្ឍហេដ្ឋារចនាសម្ព័ន្ធចាស់ ពន្លឿនគម្រោងថ្មីៗ លើវិស័យដឹក​ជញ្ជូនផ្លូវគោក ផ្លូវដែក ផ្លូវទឹក និងផ្លូវអាកាស។

សម្តេច ហ៊ុន ម៉ាណែត បានលើកឡើងថា កម្ពុជា មានផ្លូវល្បឿនពីភ្នំពេញទៅក្រុងព្រះសីហនុ ដែលបានដាក់ឱ្យដំ​ណើរការរួចហើយ ដោយផ្លូវនេះ បានរួមចំណែកដល់វិស័យដឹកជញ្ជូនទំនិញពីកំពង់ផែខេត្តព្រះសីហនុ ចូលមករាជ​ធានីភ្នំពេញបានលឿនចំណេញពេលវេលា។ ក្រៅពីនេះ ផ្លូវល្បឿនលឿនទី២ ពីភ្នំពេញទៅបាវិត បាននិង​កំពុង​សាងសង់ផងដែរ។

លើសពីនេះទៀត សម្តេចនាយករដ្ឋមន្រ្តី ក៏បានជំរុញពន្លឿនអភិវឌ្ឍផ្លូវដែក ​​ដែលជាសរសៃឈាមនៃវិស័យ​ដឹកជញ្ជូនដ៏​សំខាន់មួយដែរ។ សម្តេច បានថ្លែងដូច្នេះថា« ឥឡូវអាទិភាពសំខាន់បំផុត គឺពង្រឹងផ្លូវដែកជើង-ត្បូង..យើងមានពីរខ្សែ ខ្សែខាងជើងពីប៉ោយប៉ែត-ភ្នំពេញ ​​​ពោធិ៍សាត់ បាត់ដំបង, ខ្សែខាងត្បូង ពីភ្នំពេញ តាកែវ កំពត ខេត្តព្រះសីហនុ»។ រដ្ឋាភិបាល ជំរុញពន្លឿនលើកកម្រិតផ្លូវដែកនេះ ដើម្បីសម្រួលដល់ការដឹកជញ្ជូនទំនិញ កាត់បន្ថយការចំណាយ។

ជាមួយគ្នានេះ សម្តេចនាយករដ្ឋមន្រ្តី បានគូសបញ្ជាក់ថា ការកសាងហេដ្ឋារចនសម្ព័ន្ធផ្លូវទឹក ក៏ជាផ្នែកសំខាន់​ដែលរដ្ឋាភិបាល គិតគូរយកចិត្តទុកដាក់ខ្លាំងផងដែរ។ ក្នុងនោះ ផ្លូវទឹកតភ្ជាប់ទន្លេ និងសមុទ្រ ត្រូវ​បំពេញ​បន្ថែមសម្រាប់អ្នករស់នៅជុំវិញបឹងទន្លេសាប តាមបណ្តោយទន្លេមេគង្គ និងការដឹកទំនិញចូលទៅសមុទ្រ។ ចំណែកកំពង់​ផែទឹកជ្រៅនៅខេត្តព្រះសីហនុ នឹងក្លាយជាកំពង់ផែមានសក្តានុពលធំ ក្នុងការបម្រើសេដ្ឋកិច្ចជាតិទាំងមូល។

ដោយឡែកផ្លូវអាកាស រាជរដ្ឋាភិបាល ទើបតែសម្ពោធដាក់ឱ្យដំណើរការជាផ្លូវនូវអាកាសយានដ្ឋាន​អន្តរជាតិសៀមរាប​អង្គរ មានតម្លៃជាង ១ពាន់លានដុល្លារ ដែលជាសមិទ្ធផលប្រវត្តិសាស្រ្តរបស់កម្ពុជា បម្រើដល់ការដឹកជញ្ជូនតាម​ផ្លូវការអាកាស ទាក់ទាញវិនិយោគិនបរទេស និងភ្ញៀវទេសចរ ជាដើម។ នៅឆ្នាំ ២០២៥ កម្ពុជា នឹងដាក់ឱ្យដំណើរការ​ព្រលានយន្តហោះ​អន្តរជាតិភ្នំពេញថ្មី នៅខាងត្បូងរាជធានីភ្នំពេញផងដែរ។

សម្តេចនាយករដ្ឋមន្រ្តី ហ៊ុន ម៉ាណែត បានសង្កត់ធ្ងន់ថា រាជរដ្ឋាភិបាលអាណត្តិទី៧នេះ នឹងជំរុញបន្តគម្រោង​វិនិយោគធំៗ ទាំងការប្រើប្រាស់ធនធានវិនិយោគពីវិស័យឯកជន និងឥណទាន​មួយចំនួនយកមកបម្រើ​ដល់ការពង្រីកហេដ្ឋារចនាសម្ព័ន្ធតភ្ជាប់សរសៃឈាមរបស់កម្ពុជា ឱ្យរីកធំធាត់ ដើម្បីចិញ្ចឹមប្រជាពលរដ្ឋ នៅទូទាំងប្រទេស៕