ផ្លូវក្រាលកៅស៊ូមួយចំនួនក្នុងស្រុកមង្គលបូរីរងការខូចខាតពលរដ្ឋលំបាកធ្វើដំណើរ

ផ្លូវប្រភេទក្រាលកៅស៊ូដែលភាគច្រើនតភ្ជាប់ពីផ្លូវជាតិទៅទីជនបទនៃស្រុកមួយចំនួនរបស់ខេត្តបន្ទាយមានជ័យដូចជានៅស្រុកមង្គលបូរីកំពុងរងការខូចស្ទើរតែទាំងស្រុងដែលធ្វើឱ្យពលរដ្ឋពិបាកធ្វើចរាចរហើយតែងដាក់កំហុសទៅលើអាជ្ញាធរ​មូលដ្ឋានឃុំស្រុកមិនមើល និងជួសជុល តែការពិតផ្លូវទាំងនោះជាផ្លូវស្ថិតក្នុងគម្រោងរបស់ក្រសួងអភិវឌ្ឍន៍បទ ហើយហួសពីលទ្ធភាពរបស់អាជ្ញាធរដែលបានត្រឹមតែស្នើទៅក្រសួងសាមីតែប៉ុណ្ណោះ។

លោក រ័ត្ន ដាសុីណង់ អភិបាលស្រុកមង្គលបូរីបានប្រាប់អ្នកសារព័ត៌មានថា លោកបានដឹង និងទទួលស្គាល់ពីការលំបាករបស់ពលរដ្ឋលើការធ្វើដំណើរដោយសារតែផ្លូវខូច តែអាជ្ញាធរមិនបាននៅស្ងៀមឡើយ តែងធ្វើការជួសជុលសម្រួលដល់ប្រជាពលរដ្ឋស្ថិតនៅក្នុងគម្រោងរបស់ឃុំស្រុក។

តែសម្រាប់ផ្លូវដែលពលរដ្ឋតែងលើកឡើងពិបាកធ្វើដំណើរនោះជាផ្លូវក្រាលកៅស៊ូដូចជាផ្លូវក្រាលកៅស៊ូពីចំណុចផ្សារអូរស្ងួតបំបែកពីផ្លូវជាតិលេខ៥ ស្ថិតក្នុងឃុំអូរប្រាសាទឆ្ពោះទៅឃុំសំបួរមានប្រវែងជាង ២០ គីឡូម៉ែត្រទើបតែខូចក្នុងឆ្នាំ​២០២៣នេះ។

ផ្លូវក្រាលកៅស៊ូពីចំណុចបំបែកវាងក្រុងនៃផ្លូវជាតិលេខ៥ចំណុចផ្លូវចូលវត្តបឹងត្រាវនៃឃុំឬស្សីក្រោកឆ្ពោះទៅឃុំរហាត់ទឹករងការខូចជាច្រើនឆ្នាំមកហើយតាំងពីឆ្នាំ ២០២០ ដោយសារទឹកជំនន់​ និងផ្លូវក្រាលកៅស៊ូពីឃុំបន្ទាយនាង ទៅឃុំ​គោកបង្ល័ងដែលផ្លូវទាំងអស់នេះជាផ្លូវដែលស្ថាបនាដោយក្រសួងអភិវឌ្ឍន៍ជនបទ ដែលហួសពីសមត្ថភាពរបស់ស្រុកក្នុងការ​ជួស​ជុល។

ថ្វីត្បិតតែស្រុកមិនមានលទ្ធភាពជុសជុលក៏ពិតមែនតែស្រុកមិនបានប្រងើយកន្ដើយឡើយគឺបានធ្វើរបាយការណ៍ និងសំណើរទៅមន្ទីរអភិវឌ្ឍន៍ជនបទខេត្តបន្ទាយមានជ័យជាច្រើនលើកតែខាងមន្ទីរក៏បានទទួលយកសំណើរបន្តទៅក្រសួង​តែពុំមានលទ្ធផលមកវិញសូម្បីតែការថែទាំក៏ពុំមាន ជាហេតុធ្វើឱ្យអជ្ញាធរប្រឈមនឹងការស្ដីបន្ទោសពីពលរដ្ឋ។

សូមបញ្ជក់ថា នៅស្រុកផ្សេងៗទៀតក្រៅពីស្រុកមង្គលបូរីក៏មានផ្លូវក្រាលកៅស៊ូជាច្រើនខ្សែរដែលស្ថាបនាដោយគម្រោងនៃក្រសួងអភិវឌ្ឍន៍ជនបទរងការខូចស្ទើទាំងស្រុងរាប់ឆ្នាំមកហើយដែរ។

ជុំវិញបញ្ហាផ្លូវដែលស្ថាបនាដោយក្រសួងអភិវឌ្ឍន៍ជនបទហើយខូចដោយភាគច្រើនដោយទឹកជំនន់លោក ជា យុទ្ធារុណ ប្រធានមន្ទីរអភិវឌ្ឍន៍ជនបទខេត្តបន្ទាយមានជ័យកន្លងមកបានឱ្យដឹងដែលថាចំពោះមុខមន្ទីរមិនទាន់ទទួលបានថវិកាពីក្រសួងក្នុងការស្តាឬក៏ជួសជុលស្ថាបនាផ្លូវដែលរងរងការខូចនោះទេហើយបើនិយាយទៅទូទាំងខេត្តមានផ្លូវជាង៦០ខ្សែដែលរងការខូច។

ជាគម្រោងអនុវឌ្ឍន៍ឆ្នាំ២០២៣ ដល់២០២៨ មានផ្លូវប្រវែងជាង ៣០០ គីឡូម៉ែត្រដែលត្រូវស្តារឡើងវិញតែគម្រោងនេះមិនទាន់បានអនុម័តនៅឡើយ៕

អត្ថបទ៖ អ ពៅ