ក្រសួងសេដ្ឋកិច្ច ប្រមូលចំណូលបានជិត ៥ពាន់លានដុល្លារ ១០ខែ ឆ្នាំនេះ

គិតត្រឹមរយៈពេល ១០ខែ ឆ្នាំ២០២៣ ការប្រមូលចំណូលថ្នាក់ជាតិ របស់ក្រសួងសេដ្ឋកិច្ច និងហិរញ្ញវត្ថុបានជិត ៥ពាន់លានដុល្លារ ស្មើនឹង៧៧.៨៥% នៃច្បាប់ហិរញ្ញវត្ថុឆ្នាំ២០២៣ ខណៈដែលការអនុវត្តចំណាយសរុប​ថ្នាក់ជាតិ​មានចំនួន ២៦ ០៤២ ប៊ីលានរៀល (ប្រមាណ ៦៣៥០លានដុល្លារ) ស្មើនឹង ៧៤.៩៥% នៃច្បាប់ហិរញ្ញវត្ថុឆ្នាំ២០២៣។ ជាលទ្ធផល ការអនុវត្តថវិកាថ្នាក់ជាតិ មានឱនភាពសរុប ៥ ៨៨១ ប៊ីលានរៀល (ប្រមាណ១៤០០លានដុល្លារ)។ នេះបើយោងតាមរបាយការណ៍របស់ក្រសួងសេដ្ឋកិច្ច និងហិរញ្ញវត្ថុ។

បើតាមរបាយការបានបញ្ជាក់ថា ចំណូលសារពើពន្ធសម្រេចបានប្រមាណ ៤៤០០លានដុល្លារ ស្មើនឹង ៧៧.៤៥% នៃច្បាប់ហិរញ្ញវត្ថុឆ្នាំ២០២៣ ពោលគឺថយចុះ ៤.២០% និងចំណូលមិនមែនសារពើពន្ធសម្រេចបានប្រមាណ ៤៨០លានដុល្លារ ស្មើនឹង ៩២.៧២% នៃច្បាប់ហិរញ្ញវត្ថុឆ្នាំ២០២៣ កើនឡើង ២៤.០៨%។

របាយការណ៍បានឱ្យដឹងថា ផ្អែកលើនិន្នាការនៃការអនុវត្តចំណូល ក្នុងរយៈពេលប៉ុន្មានឆ្នាំកន្លងមកនេះ គួបផ្សំនឹងការងើប​ឡើងវិញនៃសកម្មភាពសង្គម សេដ្ឋកិច្ចកម្ពុជា, ការប្រមូលចំណូលស្ថិតក្នុងគន្លង (on-track) ឈានទៅរកការ​សម្រេច​បាន តាមផែនការគ្រោងទុកក្នុងច្បាប់ហិរញ្ញវត្ថុឆ្នាំ២០២៣។

ក្រសួងសេដ្ឋកិច្ចបានគូសបញ្ជាក់ថា ការអនុវត្តចំណាយសរុបថ្នាក់ជាតិ សម្រេចបានជាង ២៦ពាន់ប៊ីលានរៀល ស្មើនឹង ៧៤.៩៥% នៃច្បាប់ហិរញ្ញវត្ថុឆ្នាំ២០២៣ កើនឡើង ១៩.៤៩%ធៀបនឹងរយៈពេលដូចគ្នាឆ្នាំ២០២២ ក្នុងនោះចំណាយ​មូលធន សម្រេចបានជិត ៩ពាន់ប៊ីលានរៀលកើនឡើង ១២.៣២% និងចំណាយចរន្តសម្រេចបានជាង ១ម៉ឺន៧ពាន់​ប៊ីលានរៀល កើនឡើង ២៣.៦០%។ ជារួមការអនុវត្តចំណាយ គឺនៅបន្តរក្សានូវគោលការណ៍​រឹតបន្តឹងចំណាយ​មិនចាំបាច់នានា និងវិភាជថវិកាសម្រាប់អនុវត្ត ឲ្យចំមុខសញ្ញាប្រកបដោយបុរេសកម្ម។

រាជរដ្ឋាភិបាល បន្តរក្សាភាពប្រយ័ត្នប្រយែងខ្ពស់ក្នុងការគ្រប់គ្រងនិងប្រើប្រាស់ហិរញ្ញប្បទានសរុបថ្នាក់ជាតិ ប្រកបដោយ​ប្រសិទ្ធភាពបំផុតនិងផ្តល់លទ្ធភាពគ្រប់គ្រាន់ ឆ្លើយតបទៅនឹងតម្រូវការ នៃការអនុវត្តថវិការដ្ឋបានទាន់ពេលវេលា។

ជាក់ស្តែង ការអនុវត្តហិរញ្ញប្បទានពីបរទេសសរុបថ្នាក់ជាតិ សម្រេចបានជិត ៥ពាន់ប៊ីលានរៀល ស្មើនឹង ៧៧.៧១% នៃច្បាប់ហិរញ្ញវត្ថុ ឆ្នាំ២០២៣ និងការអនុវត្តហិរញ្ញប្បទានក្នុងស្រុកសរុបថ្នាក់ជាតិ សម្រេចបានជាង ៤ពាន់១០០​ប៊ីលានរៀល ស្មើនឹង៥៤.២៩% នៃច្បាប់ហិរញ្ញវត្ថុឆ្នាំ២០២៣ ស្របពេលប្រាក់បញ្ញើរដ្ឋាភិបាល សរុបមានប្រមាណ ៤៧ ប៊ីលានរៀល៕