ឧបការីរង៖ អាមេរិក នឹងប្រកាន់យកវិធីសាស្ត្របែបសន្តិនិយមចំពោះទំនាក់ទំនងជាមួយកម្ពុជា

«សហរដ្ឋអាមេរិក នឹងប្រកាន់យកវិធីសាស្ត្របែបសន្តិនិយមចំពោះទំនាក់ទំនងរវាងសហរដ្ឋអាមេរិក និងកម្ពុជា»។ នេះជាការថ្លែងអះអាងរបស់លោកស្រី មេលីសា ប្រោន ឧបការីរងសហរដ្ឋអាមេរិក នៅចំពោះមុខលោកប្រមុខការទូតកម្ពុជា នាជំនួបទ្វេភាគី នៅថ្ងៃទី១៤ ខែធ្នូ ឆ្នាំ២០២៣នេះ។

កិច្ចជំនួបនេះ ធ្វើឡើងក្នុងឱកាសដែលលោកស្រី បានអញ្ជើញមកបំពេញទស្សនកិច្ចការងារនៅកម្ពុជា ដោយភាគីទាំងពីរបានពិភាក្សាក្នុងក្នុងស្មារតីជាមិត្តភាពយ៉ាងស្និទ្ធស្នាល។ លោក សុខ ចិន្តាសោភា ឧបនាយករដ្ឋមន្ត្រី រដ្ឋមន្ត្រីការបរទេសកម្ពុជា និងលោកស្រី មេលីសា ប្រោន ឧបការីរងរដ្ឋមន្ត្រីការបរទេសសហរដ្ឋអាមេរិក ទទួលបន្ទុកការិយាល័យកិច្ចការអាស៊ីបូព៌ា និងប៉ាស៊ីហ្វិក បានបញ្ជាក់សាជាថ្មីនូវការប្តេជ្ញាចិត្តក្នុងការពង្រីកបន្ថែមទៀតនូវកិច្ចសហប្រតិបត្តិការដែលផ្តល់ប្រយោជន៍ទៅវិញទៅមកលើវិស័យផ្សេងៗ រួមទាំងពាណិជ្ជកម្ម វិនិយោគ ជំនួយអភិវឌ្ឍន៍ និងការផ្លាស់ប្តូររវាងប្រជាជន និងប្រជាជន។

លោកឧបនាយករដ្ឋមន្ត្រី សុខ ចិន្តាសោភា បានបង្ហាញនូវគោលនយោបាយដែលផ្តោតលើប្រជាពលរដ្ឋ និងអាទិភាពគន្លឹះរបស់រាជរដ្ឋាភិបាលថ្មី រួមមាន ការថែទាំសុខភាព ការអប់រំ និងការបណ្តុះបណ្តាល និងការបង្កើតការងារ។ ក្នុងនោះ លោកឧបនាយករដ្ឋមន្ត្រី បានថ្លែងអំណរគុណចំពោះទីភ្នាក់ងារសហរដ្ឋអាមេរិកសម្រាប់ការអភិវឌ្ឍអន្តរជាតិ (USAID) ដែលបានជួយគាំទ្រដល់វិស័យមួយចំនួននេះ។

ជាកិច្ចឆ្លើយតបនូវការទទួលស្គាល់កិច្ចសហប្រតិបត្តិការគួរឱ្យចាប់អារម្មណ៍ជាច្រើនរវាងអាមេរិក និងកម្ពុជា លោកស្រីឧបការីរង បានគូសបញ្ជាក់ថា សហរដ្ឋអាមេរិក នឹងបន្តធ្វើឱ្យកិច្ចសហប្រតិបត្តិការទាំងនេះកាន់តែស៊ីជម្រៅ និងស្វែងរកកាលានុវត្តភាពសម្រាប់ភាពជាដៃគូថ្មីៗបន្ថែមទៀត។ លោកស្រី បានសង្កត់ធ្ងន់ថា សហរដ្ឋអាមេរិក នឹងប្រកាន់យកវិធីសាស្ត្របែបសន្តិនិយមចំពោះទំនាក់ទំនងសហរដ្ឋអាមេរិក-កម្ពុជា។

តាមរយៈជំនួបនេះ ភាគីទាំងពីរ ក៏បានផ្លាស់ប្តូរទស្សនៈស្តីពីបញ្ហាតំបន់ និងអន្តរជាតិ ដែលជាប្រយោជន៍រួម ព្រមទាំងបានពិភាក្សាអំពីតួនាទីរបស់កម្ពុជា នាពេលខាងមុខ ជាប្រទេសសម្របសម្រួលសម្រាប់ទំនាក់ទំនងដៃគូសន្ទនាអាស៊ាន និងសហរដ្ឋអាមេរិក ។ លោកស្រីឧបការីរង បញ្ជាក់ថា តាមរយៈកេរ្តិ៍ឈ្មោះដ៏ល្អរបស់កម្ពុជាក្នុងឋានៈជាប្រធានអាស៊ាន កន្លងមក និងវិធីសាស្ត្របែបស្ថាបនារបស់កម្ពុជាចំពោះវិបត្តិអ៊ុយក្រែន នឹងបង្កភាពងាយស្រួលដល់កិច្ចសន្ទនានេះ។

លោកស្រី បន្តថា សហរដ្ឋអាមេរិក ក៏នឹងខិតខំជួយគាំទ្រតួនាទីរបស់កម្ពុជា ជាប្រធាននៃកិច្ចប្រជុំត្រួតពិនិត្យឡើងវិញលើកទី៥ នៃអនុសញ្ញាស្តីពីការហាមប្រើប្រាស់ ការរក្សាទុក ការផលិត និងការផ្ទេរគ្រាប់មីន ផងដែរ៕