និស្សិតយោធាអាមេរិក មកកម្ពុជាស្វែងយល់ពីវប្បធម៌ខ្មែរ និងជួយសាងសង់បណ្ណាល័យ

និស្សិតយោធាមកពីសាលាបណ្ឌិត្យសភាយោធានៃកងទ័ពជើងគោក West Point និងសាលាបណ្ឌិត្យសភាកងទ័ពអាកាសសហរដ្ឋអាមេរិក បានមកបំពេញទស្សនកិច្ចនៅកម្ពុជា ក្នុងកម្មវិធីប្រចាំឆ្នាំរយៈពេល ៣ សប្តាហ៍ ដែលមានគោលបំណងអភិវឌ្ឍជំនាញវិជ្ជាជីវៈ និងស្វែងយល់ពីវប្បធម៌។ ក្នុងអំឡុងពេលស្នាក់នៅ ពួកគេបានទទួលការស្វាគមន៍យ៉ាងកក់ក្តៅ និងទទួលបានបទពិសោធន៍ដោយផ្ទាល់ពីវប្បធម៌ដ៏សម្បូរបែបរបស់កម្ពុជា។

ស្ថានទូតអាមេរិកប្រចាំកម្ពុជា បានឱ្យដឹងតាមរយៈបណ្តាញហ្វេសប៊ុកផ្លូវការនៅថ្ងៃទី ១០​ខែកក្កដានេះថា ក្នុងដំណើរទស្សនកិច្ចនេះពួកគេបានសហការជាមួយសាលារៀនមួយនៅខេត្តកណ្តាល ដើម្បីជួយសាងសង់បណ្ណាល័យថ្មី ដឹកនាំសកម្មភាពសិក្សា និងលេងកីឡាជាមួយសិស្សានុសិស្សក្នុងតំបន់។

ពួកគេក៏បានសិក្សាភាសាខ្មែរ ទស្សនាតំបន់បេតិកភណ្ឌប្រវត្តិសាស្ត្រវប្បធម៌ដ៏មានតម្លៃរបស់កម្ពុជា និងបានចូលរួមគាំទ្រការប្រកួតបាល់ទាត់ដ៏ជក់ចិត្តរវាងកម្ពុជា និងប៊ូតង់ ជាមួយអ្នកគាំទ្រក្នុងស្រុកផងដែរ។

និស្សិតយោធាទាំងនោះក៏បានស្វែងយល់អំពីការទូត តាមរយៈការធ្វើបទបង្ហាញដែលរៀបចំដោយស្ថានទូតអាមេរិក ហើយបានផ្លាស់ប្តូរយោបល់និងបទពិសោធន៍ជាមួយសមភាគីរបស់ពួកគេនៅសាលាបណ្ឌិត្យសភាយោធារបស់កម្ពុជា។

ដំណើរទស្សនកិច្ចនេះ បានផ្តោតលើការកសាងទំនាក់ទំនងពិតប្រាកដ និងការរៀនសូត្រពីរបៀបទំនាក់ទំនងអន្តរវប្បធម៌ ដែលបានផ្តល់ឱ្យពួកគេនូវបទពិសោធន៍ដែលមិនអាចបំភ្លេចបាន និងជំនាញដែលនឹងមានប្រយោជន៍សម្រាប់ការក្លាយជាអ្នកដឹកនាំនាពេលអនាគត។

ស្ថានទូតអាមេរិក​ប្រចាំទីក្រុងភ្នំពេញ បានអរគុណដល់ប្រជាពលរដ្ឋទាំងអស់នៅខេត្តកណ្តាល រាជធានីភ្នំពេញ និងខេត្តសៀមរាប ដែលបានទទួលស្វាគមន៍រាក់ទាក់និស្សិតយោធារបស់អាមេរិកប្រកបដោយភាពកក់ក្តៅ៕