ព័ត៌មានជាតិ

សហគ្រាស ៧៥ ម៉ឺនកន្លែងនៅកម្ពុជា ជាង ១០% គ្របដណ្តប់ដោយអាជីវកម្មតាមចិញ្ចើមផ្លូវ

បានផុស

១ year មុន

នៅ

ថ្ងៃព្រហស្បតិ៍ ២៨ ធ្នូ ២០២៣

ដោយ

ការធ្វើជំរឿនសេដ្ឋកិច្ចនៅព្រះរាជាណាចក្រកម្ពុជា ឆ្នាំ២០២២ បានបង្ហាញថា សហគ្រាសអាជីវកម្មដែលកំពុងបើកដំណើរការនៅប្រទេសកម្ពុជាគិតត្រឹមថ្ងៃទី០១ ខែមីនា ឆ្នាំ២០២២ មានជាង ៧៥ ម៉ឺនមូលដ្ឋាន។

ក្នុងចំណោមអង្គភាពសេដ្ឋកិច្ចជាង ៧៥ ម៉ឺនមូលដ្ឋាន គ្របដណ្តប់ដោយអង្គភាពសេដ្ឋកិច្ចតាមចិញ្ចើមផ្លូវមានជាង ១០%។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អង្គភាពសេដ្ឋកិច្ចដែលធ្វើសកម្មភាពអាជីវកម្មតាមចិញ្ចើមផ្លូវ គឺជាអង្គភាពអាជីវកម្មដែលមានលក្ខណៈដូចជា តូប ឬស្តង់ជាដើម ដែលមានទីតាំងអាជីវកម្មជាក់លាក់នៅលើចិញ្ចើមផ្លូវ។

ផ្អែកតាមលទ្ធផលជំរឿន អង្គភាពសេដ្ឋកិច្ចតាមចិញ្ចើមផ្លូវមានចំនួន ៧៧ ០៧៣ មូលដ្ឋាន ស្មើ ១០,២% នៃចំនួនអង្គភាពសេដ្ឋកិច្ចសរុបទូទាំងប្រទេស។ ក្នុងនោះមានការចូលរួមពីស្ត្រីប្រមាណ ៧៥% ហើយដែលអ្នកចូលរួមការងារពី ១ នាក់ ឬ ២ នាក់មានប្រមាណ ៨៩%។

កម្ពុជាមានអង្គភាពសេដ្ឋកិច្ចចំនួន ៧៥៣ ៦៧០ សហគ្រាស គិតត្រឹមថ្ងៃទី០១ ខែមីនា ឆ្នាំ២០២២។ នេះបើយោងតាមរបាយការណ៍ជំរឿនសេដ្ឋកិច្ចឆ្នាំ ២០២២។

បើប្រៀបធៀបលទ្ធផលជំរឿនសេដ្ឋកិច្ចឆ្នាំ ២០២២ ទៅនឹងលទ្ធផលនៃជំរឿនសេដ្ឋកិច្ចនៅឆ្នាំ ២០១១ ចំនួនអង្គភាពសេដ្ឋកិច្ចនៅឆ្នាំ ២០២២ កើនឡើងប្រមាណ ៤៩% ជាមួយនឹងអត្រាកំណើនប្រចាំឆ្នាំមាន ៣,៧%។ ជាមួយគ្នានេះដែរ អ្នកចូលរួមការងារបានកើនឡើងដល់ ៧០,៩% ដែលនាំឱ្យអត្រាកំណើនប្រចាំឆ្នាំមានប្រមាណ ៥% ជាកម្រិតមួយខ្ពស់ជាងអត្រាកំណើនប្រជាជនដែលមានប្រមាណតែ ១,៤% ប៉ុណ្ណោះ។

គួរបញ្ជាក់ថា ការធ្វើជំរឿនសេដ្ឋកិច្ច ឆ្នាំ២០២២ គ្របដណ្ដប់លើអង្គភាពសេដ្ឋកិច្ចដែលមានទីតាំងជាក់លាក់អចិន្ត្រៃយ៍ស្ថិតក្នុងដែនដីនៃព្រះរាជាណាចក្រកម្ពុជា៕

Related Topics:ជំរឿនសេដ្ឋកិច្ចឆ្នាំ២០២២