ព័ត៌មានជាតិ

ចំណូលការលក់ប្រចាំឆ្នាំសហគ្រាសអាជីវកម្មនៅកម្ពុជាមានជាង ៥១ ប៊ីលានដុល្លារ

បានផុស

២ years មុន

នៅ

ថ្ងៃចន្ទ ៨ មករា ២០២៤

ដោយ

ចំណូលពីការលក់ប្រចាំឆ្នាំដែលរួមបញ្ចូលគ្នានៃអង្គភាពសេដ្ឋកិច្ចសរុបនៅប្រទេសកម្ពុជាមានចំនួន ៥១ ប៊ីលានដុល្លារអាមេរិក។ នេះបើតាមរបាយការណ៍ជំរឿនសេដ្ឋកិច្ចឆ្នាំ ២០២២ ដែលទើបចេញផ្សាយកាលពីពេលថ្មីៗនេះ។

ចំណូលត្រូវបានបែងចែកទៅតាមទំហំនៃសហគ្រាសអាជីវកម្ម។ ជាក់ស្តែងចំណូលពីការលក់ប្រចាំឆ្នាំសម្រាប់សហគ្រាសអាជីវកម្មដែលមានទំហំនៃអ្នកចូលរួមការងារពី ២០ នាក់ និងច្រើនជាងមានចំណែកច្រើនលើសពី ៥០% នៃចំណូលពីការលក់សរុប។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ផ្អែកតាមជំរឿនសេដ្ឋកិច្ចឆ្នាំ ២០២២ អង្គភាពសេដ្ឋកិច្ចខ្នាតធំមានចំណូលពីការលក់ប្រចាំឆ្នាំខ្ពស់ជាងអង្គភាពសេដ្ឋកិច្ចផ្សេងទៀត។

អង្គភាពសេដ្ឋកិច្ចដែលមានទំហំនៃអ្នកចូលរួមការងារចាប់ពី ១ ០០០ នាក់ និងច្រើនជាង មានចំណូលពីការលក់ភាគច្រើនខ្ពស់បំផុតប្រមាណ ២៤,៩លាន ដុល្លារអាមេរិក ខណៈអង្គភាពសេដ្ឋកិច្ចដែលមានទំហំនៃអ្នកចូលរួមការងារពី ៥០០ នាក់ ទៅ ៩៩៩នាក់ មានចំណូលពីការលក់ ចំនួន ១១,៣ លានដុល្លារអាមេរិក។

អង្គភាពសេដ្ឋកិច្ចដែលមានទំហំនៃអ្នកចូលរួមការងារ ១០០ ទៅ ៤៩៩ នាក់ មានចំណូលពីការលក់ជាមធ្យមប្រចាំឆ្នាំប្រមាណ ៦,១ លានដុល្លារអាមេរិក។ អង្គភាពសេដ្ឋកិច្ចដែលមានទំហំនៃអ្នកចូលរួមការងារពី ៥០ ទៅ ៩៩ នាក់ មានចំណូលជាមធ្យមប្រមាណ ២,៦ លានដុល្លារអាមេរិក។

ជារួមចំណូលពីការលក់ប្រចាំឆ្នាំរបស់អង្គភាពសេដ្ឋកិច្ចខ្នាតធំ មានចំណែកភាគច្រើនជាងអង្គភាពសេដ្ឋកិច្ចដែលមានទំហំខ្នាតតូចជាង។

បន្ថែមពីនេះតាមលទ្ធផលទិន្នន័យជំរឿនសេដ្ឋកិច្ច ឆ្នាំ២០២២ ចំណូលពីការលក់ប្រចាំឆ្នាំរបស់អង្គភាពសេដ្ឋកិច្ចស្ថិតក្នុងផ្នែក “លក់ដុំ និងលក់រាយ និងជួសជុលយានយន្ត និងទោចក្រយានយន្ត” មានភាគចំណែកច្រើនជាងគេបំផុតប្រមាណ ១៦,១ ប៊ីលានដុល្លារអាមេរិកស្មើនឹង ៣១,៧%៕