ព័ត៌មានជាតិ

ជំរឿនសេដ្ឋកិច្ចបង្ហាញថា ខេត្តក្រុងចំនួន ៥ កាន់កាប់ចំណែកសហគ្រាសអាជីវកម្មច្រើនជាងគេ

បានផុស

២ years មុន

នៅ

ថ្ងៃសុក្រ ៥ មករា ២០២៤

ដោយ

របាយការណ៍ជំរឿនសេដ្ឋកិច្ចឆ្នាំ ២០២២ បានបង្ហាញពីសហគ្រាសអាជីវកម្មនៅកម្ពុជាដែលក្នុងនោះខេត្តក្រុងចំនួន ៥ កាន់កាប់ចំណែកអង្គភាពសេដ្ឋកិច្ចច្រើនជាងគេ។

ទាក់ទងសហគ្រាសអាជីវកម្មទូទាំងប្រទេស រាជធានីភ្នំពេញមានភាគចំណែកធំជាងគេស្មើមួយភាគប្រាំនៃអង្គភាពសេដ្ឋកិច្ចសរុប។

ផ្អែកតាមរបាយការណ៍ជំរឿនសេដ្ឋកិច្ចដែលទើបចេញផ្សាយកាលពីពេលថ្មីៗនេះ រាជធានីភ្នំពេញមានអង្គភាពសេដ្ឋកិច្ចសរុប ១៤៩ ៨៨៨ សហគ្រាស ស្មើនឹង ២០% នៃអង្គភាពសេដ្ឋកិច្ចសរុបទូទាំងប្រទេស។

ខេត្តកណ្តាលនៅលំដាប់ទីពីរមានប្រមាណ ៥៧.១២៥ សហគ្រាស ស្មើនឹង ៧,៦%។ ខេត្តសៀមរាបមានប្រមាណ ៥០.៧១៤ សហគ្រាស ស្មើនឹង ៦,៧% ឈរនៅលំដាប់ទី ៣។ ខេត្តបាត់ដំបង មានប្រមាណ ៤៩ ៧៤៨ សហគ្រាស ស្មើនឹង ៦,៦% ឈរនៅលំដាប់ទី ៤ និងខេត្តតាកែវមានប្រមាណ ៤៥.៣៦៤ សហគ្រាស ស្មើនឹង ៦,០% ឈរនៅលំដាប់ទី ៥ ។

ដោយឡែកពាក់ព័ន្ធចំណែកការងារ រាជធានីភ្នំពេញស្ថិតនៅលំដាប់ទីមួយដែលមានអ្នកចូលរួមការងារប្រមាណ ៩៣០.៩១៦ នាក់ ស្មើនឹង ៣១,២% នៃចំនួនអ្នកចូលរួមការងារសរុបក្នុងអង្គភាពសេដ្ឋកិច្ច។

ខេត្តកណ្តាលមានអ្នកចូលរួមការងារប្រមាណ ២៨៦.៨៦០នាក់ ស្មើនឹង ៩,៦%។ ខេត្តកំពង់ស្ពឺ មានអ្នកចូលរួមការងារប្រមាណ ២០៧.១០៤នាក់ ស្មើនឹង ៦,៩%។ ខេត្តតាកែវ មានប្រមាណ ១៦៧.៤៥៦ ស្មើ ៥,៦% និងខេត្តស្វាយរៀងមាន ១៥០.៤៣៩ នាក់ ស្មើនឹង ៥,០%។

ជំរឿនសេដ្ឋកិច្ចបានចាប់ធ្វើពីថ្ងៃទី១ ដល់ថ្ងៃទី៣១ ខែមីនា ឆ្នាំ២០២២ ដោយកំណត់យកថ្ងៃទី១ ខែមីនា ឆ្នាំ២០២២ ជាកាលបរិច្ឆេទយោងនៃជំរឿន។ ជំរឿនសេដ្ឋកិច្ចនៅឆ្នាំ២០២២ គឺជាការងារជំរឿនសេដ្ឋកិច្ចលើកទីពីរ ដែលបានគ្របដណ្ដប់គ្រប់អង្គភាពសេដ្ឋកិច្ចទាំងអស់ដែលស្ថិតនៅក្នុងដែនដីនៃព្រះរាជាណាចក្រកម្ពុជា។

ការធ្វើជំរឿនសេដ្ឋកិច្ចនៅព្រះរាជាណាចក្រកម្ពុជាឆ្នាំ២០២២ មានគោលបំណងដើម្បីចងក្រងស្ថិតិជាមូលដ្ឋានគ្រឹះស្ដីពីសកម្មភាពសេដ្ឋកិច្ចនៅទូទាំងប្រទេសកម្ពុជា។

ជំរឿនសេដ្ឋកិច្ចត្រូវបានអនុវត្តគ្រប់អង្គភាពសេដ្ឋកិច្ចទាំងអស់ ដែលរាប់បញ្ចូលរួមទាំងផ្សារ រោងចក្រ ក្រុមហ៊ុន សិប្បកម្ម ការលក់ទំនិញតាមប្រព័ន្ឋអនឡាញ និងសេវាកម្ម សាលារៀន សកលវិទ្យាល័យ វត្តអារាម វិហារសាសនា មន្ទីរពេទ្យ គ្លីនិកឯកជន និងមណ្ឌលសុខភាពជាដើម៕