ខេត្តព្រះសីហនុទទួលបានភ្ញៀវទេសចរជិត៥០ម៉ឺននាក់ក្នុងឱកាសបុណ្យឆ្លងឆ្នាំសកល

គិតត្រឹមរយៈពេល៣ថ្ងៃ ក្នុងឱកាសពិធីបុណ្យចូលឆ្នាំសកល ឆ្នាំ២០២៤ ចាប់ពីថ្ងៃទី៣០-៣១ ខែធ្នូ ឆ្នាំ២០២៣ ដល់ថ្ងៃទី០១ ខែមករា ឆ្នាំ២០២៤ ភ្ញៀវទេសចរ អញ្ជើញមកលេងកម្សាន្ដ នៅខេត្តព្រះសីហនុមានចំនួនសរុប​៤៧២.៦៩៧នាក់ កើនឡើង២១,២៤ភាគរយ បើធៀបនឹងឆ្នាំកន្លងទៅ។

នេះបើយោងតាមរបាយការណ៍ខ្លីដែលបញ្ចេញនៅម៉ោង៧យប់ថ្ងៃទី១​ ខែមករា ឆ្នាំ២០២៤​ ដោយលោក ឃាង ភារម្យ មន្ត្រីអ្នកនាំពាក្យសាលាខេត្តព្រះសីហនុ។

សូមបញ្ជាក់ថា ខេត្តព្រះសីហនុជាតំបន់ទេសចរណ៍ធម្មជាតិយ៉ាងសំបូរបែបមានកោះ និងឆ្នេរ ស្អាតហើយជាទីចាប់អារម្មណ៌របស់ភ្ញៀវទេសចរជាតិ និងអន្តរជាតិដែលមកលេងកម្សាន្តមិនចេះជិនណាយមកហើយមកទៀត។ ហើយម្យ៉ាងទៀតខេត្តព្រះសីហនុមានផ្លូវល្បឿនលឿនដែលងាយស្រួលក្នុងការធ្វើដំណើរលឿនរហ័យទាន់ចិត្ត ដោយចំណាយពេលត្រឹមតែ២ម៉ោង ពីភ្នំពេញមកដល់ខេត្តព្រះសីហនុ។ កត្តាសំខាន់មួយទៀតដែលមិនអាចខ្វះបាននោះ គឺដោយសារតែប្រទេសកម្ពុជាយើងមានសុខសន្តិភាព ពេញផ្ទៃប្រទេស ប្រជាពលរដ្ឋធ្វើដំណើរទៅណាមកណាទោះជិតក្តី ឆ្ងាយក្តី ពួកគាត់គ្មានការព្រួយបារម្ភអំពីបញ្ហាអសន្តិសុខនោះទេ៕

អត្ថបទ៖ ស៊ុយ ចាន់ធា