ច្បាស់ហើយ អ្នកគេចវេះមិនធ្វើចត្តាឡីស័កអាច​នឹងត្រូវរងពិន័យប្រាក់ធ្ងន់ធ្ងរជាងមុន

សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានប្រកាសយកវិធានការផ្លូវច្បាប់មកអនុវត្តចំពោះជនណាដែលគេច​វេះមិនព្រមធ្វើចត្តាឡីស័កនឹងត្រូវបន្ថែមទណ្ឌកម្មពិន័យប្រាក់ធ្ងន់ធ្ងរជាងមុន ដែលពេលមុនច្រើនបំផុតត្រឹមតែ១​លាន​រៀល​។

សម្តេចតេជោ ហ៊ុន សែន បញ្ជាក់ថា វិធានការនេះនឹងជួយទប់ស្កាត់ការឆ្លងរាលដាលជំងឺកូវីដ១៩ ឲ្យកាន់តែមានប្រសិទ្ធភាព ខណៈដែលមានករណីគេចវេះកាន់តែច្រើនកើតមានឡើង ដែលមានពលករលួចឆ្លងដែនចូលមកហើយត្រូវជួបគ្រោះថ្នាក់ដោយសារផ្ទុះមីនដាច់ជើងជាគំរូ។

សម្តេចតេជោ ហ៊ុន សែន បានប្រកាសដាក់ចេញបទបញ្ជាឲ្យអនុវត្តឲ្យបានត្រឹមត្រូវនូវអនុក្រឹត្យ ស្តីពីវិធានការសុខាភិបាលដើម្បីទប់ស្កាត់ ការឆ្លើយតបការរីករាលដាលជាអន្តរជាតិ ជំងឺតាមច្រកចេញ-ចូល។

ថ្លែងតាមសារអេឡិចត្រូវនិកតេឡេក្រាម នៅព្រឹកថ្ងៃទី ១៥ ខែកុម្ភៈ ឆ្នាំ ២០២១នេះ សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានស្នើទៅរដ្ឋមន្ត្រីសុខាភិបាលពិភាក្សាជាមួយ រដ្ឋមន្ត្រីយុត្តិធម៌ ធ្វើការកែប្រែមាត្រា៨ នៃអនុក្រឹត្យនៃអនុក្រឹត្យស្តីពីវិធានការសុខាភិបាលនេះ ដោយបង្កើនចំនួនប្រាក់ពិន័យឲ្យធ្ងន់ជាងមុន ដើម្បីសុវត្ថិភាពសុខភាព។

នៅមាត្រា ៨ នៃអនុក្រឹត្យនេះចែងថា អ្នកដំណើរ ឬការីនៃយានដឹកជញ្ជូនណាដែលគេចវេះ មិនឲ្យមន្ត្រីចត្តាឡីស័កធ្វើការត្រួតពិនិត្យ ឬមិនសហការជាមួយមន្ត្រីចត្តាឡីស័ក្នុងការអនុវត្តវិធានការសុខាភិបាល ឬមិនបំពេញតាមបែបបទដែលបានកំណត់ក្នុងអនុក្រឹត្យ នឹងត្រូវទទួលពិន័យជាអន្តរការពី២សែន ទៅ ១ លានរៀល។

សម្តេចតេជោអះអាងថា ពិន័យនេះគឺវាជាវិធានការស្រាលណាស់ ប្រសិនបើមានបញ្ហាកើតឡើងពាក់ព័ន្ធទៅនឹងជំងឺឆ្លង។

សម្តេចតេជោ ហ៊ុន សែន ថ្លែងថា ដើម្បីធានាថា កម្ពុជាត្រូវធ្វើឲ្យបានម៉ត់ចត់អំពីការធ្វើចត្តាឡីស័ក រាជរដ្ឋាភិបាល មិនបណ្តោយតទៅទៀតនោះទេ ក្នុងការអនុវត្តតាមផ្លូវច្បាប់ ដោយសម្តេចស្នើឲ្យរដ្ឋមន្ត្រី ២ រូប គឺរដ្ឋមន្ត្រីសុខាភិបាល លោក ម៉ម ប៊ុនហេង និងរដ្ឋមន្ត្រីក្រសួងយុត្តិធម៌ លោក កើតរិទ្ធ ពិភាក្សាធ្វើវិសោធនកម្មមាត្រា៨ ដោយបង្កើនចំនួនទឹកប្រាក់ ពិន័យឲ្យធ្ងន់ធ្ងរទៅលើអ្នកគេវេះធ្វើចត្តាឡីស័កឲ្យខាងតែបាន ពោលគឺលែងមានការអត់អោន និងអាធ្យាស្រ័យទៀតហើយ។

កន្លងមក​មាន​អ្នកធ្វើដំណើរ​តាម​ជើង​ហោះហើរ​ដែលមាន​អ្នកដំណើរ​ឆ្លង​ជំងឺ​កូវីដ​ ១៩​ មួយចំនួន​បាន​រត់​ចេញពី​កន្លែង​ធ្វើ​ចត្តាឡីស័ក​។

កាលពី​ខែ​កក្កដា ឆ្នាំមុន ស្ដ្រី​ខ្មែរ​អាមេរិកាំង​ម្នាក់​បាន​រត់​ចេញពី​កន្លែង​ធ្វើ​ចត្តាឡីស័ក​នៅ​សណ្ឋាគារ​មួយ​ក្នុង​ក្រុងភ្នំពេញ​រត់​ទៅ​ខេត្ត​កំពង់ចាម ហើយត្រូវ​បាន​ពិន័យ​ប្រាក់​ ១ ​លាន​រៀល ចំណែកមានពលករមួយចំនួន បានគេចវេះដែរហើយត្រូវតម្រូវឲ្យធ្វើចត្តាឡីស័កឡើងវិញ។

កាលពីថ្ងៃទី ១៦ ខែមករា ឆ្នាំ ២០២១ បុរសជនជាតិខ្មែរសញ្ជាតិអាមេរិកាំងម្នាក់ បានរត់ចេញពីទីតាំងសម្រាប់ធ្វើចត្តា​ឡីស័ក នៅសណ្ឋាគារមួយក្នុងខណ្ឌចំការមន។

ក្រោយពេលរកឃើញនេះ ក្រុមគ្រូពេទ្យបានយកសំណាករបស់គាត់ទៅធ្វើតេស្តម្តងទៀត និងបានបញ្ជូនគាត់ទៅកាន់មណ្ឌលចត្តាឡីស័កព្រែកព្នៅ ដើម្បីធ្វើចត្តាឡីស័កឡើងវិញរយៈពេល១៤ថ្ងៃ៕

អត្ថបទ៖ ឡេង ដេត