​ក្រុម V-logges និងអ្នកជំនាញ​ថតរូបកម្ពុជា​ចុះទៅ​តំបន់អេកូទេសចរណ៍​កោះហាន​ផ្សព្វផ្សាយសក្តានុពលទេសចរណ៍

កាលពីពេលថ្មីៗ​នេះ ក្រសួង​ទេសចរណ៍បាន​​​ដឹកនាំ​​ក្រុម Influencers /V-logges និងអ្នកជំនាញថតរូបមួយចំនួនចុះទៅ​​តំបន់អេកូទេសចរណ៍កោះហាន ដើម្បីជំរុញផ្សព្វផ្សាយ​ឲ្យ​កាន់តែទូលំទូលាយពី​តំបន់សក្តានុពលក្នុងវិស័យទេសចរណ៍តាមប្រព័ន្ធឌីជីថលនិងបណ្តាញសង្គម។

ដំណើរបេសកកម្មនេះ​ដឹកនាំ​ដោយ​ឡាង សុលីណា ទីប្រឹក្សានិង​ជា​អគ្គនាយករងរដ្ឋបាល និងហិរញ្ញវត្ថុ និងជាប្រធានអង្គភាពបរិវត្តកម្មឌីជីថលក្រសួងទេសចរណ៍ និង​មានការ​ចូលរួមពី​​មន្ទីរទេសចរណ៍ខេត្តស្ទឹងត្រែងនិង​សហគមន៍ទេសចរណ៍​កោះហាន​ផង​ដែរ។

ការចុះទស្សនាផ្តិតរូបភាព និងវីដេអូនៅលើទឹកដីកោះហាន ក្រុមការងារ​បានចុះទៅដល់ទីតាំងមួយចំនួនដូចជា៖

១- តំបន់បោះតង់
២- តំបន់ជិះកៃយាក់
៣- តំបន់ព្រៃលិចទឹក
៤- តំបន់មើលសត្វស្លាប
៥- តំបន់សហគមន៍
៦- តំបន់ស្នាក់នៅជាដើម។

សហគមន៍អេកូទេសចរណ៍សម្រស់កោះហាន មានទីតាំងស្ថិតលើដីកោះក្នុងឃុំកោះស្នែង ដោយ​អាចធ្វើដំណើរឆ្លងតាមស្ពាន​សេកុងតាមផ្លូវជាតិលេខ ៧ ពីទីរួមខេត្តស្ទឹងត្រែង ដែលមានចម្ងាយប្រហែល ២៤ គីឡូម៉ែត្រ៕