ព័ត៌មានជាតិ

ត្រឹមដើមឆ្នាំ ២០២៤ មានសហគ្រាសចុះបញ្ជីប្រមាណ ៤ ម៉ឺននៅក្រសួងឧស្សាហកម្ម

បានផុស

១ ខែ មុន

នៅ

ថ្ងៃអង្គារ ៦ កុម្ភៈ ២០២៤

ដោយ

បើតាមរដ្ឋមន្ត្រីក្រសួងឧស្សាហកម្ម បច្ចេកវិទ្យា វិទ្យាសាស្ត្រ និងនវានុវត្តន៍ មានសហគ្រាសជាង ៤ ម៉ឺនបានចុះបញ្ជីនៅក្រសួងឧស្សាហកម្ម បច្ចេកវិទ្យា វិទ្យាសាស្ត្រ និងនវានុវត្តន៍។

ថ្លែងនៅក្នុងជំនួបជាមួយក្រុមអ្នកសារព័ត៌មានកាលពីពេលថ្មីៗនេះ លោក ហែម វណ្ណឌី រដ្ឋមន្ត្រីក្រសួងឧស្សាហកម្ម បច្ចេកវិទ្យា វិទ្យាសាស្ត្រ និងនវានុវត្តន៍បានឲ្យដឹងថា បើតាមទិន្នន័យគិតត្រឹមដើមឆ្នាំ ២០២៤ មានសហគ្រាសធុនតូចនិងមធ្យម និងសិប្បកម្មសរុបចំនួន ៤៤ ៥១៤ មូលដ្ឋានបានចុះបញ្ជីនៅក្រសួងឧស្សាហកម្ម បច្ចេកវិទ្យា វិទ្យាសាស្ត្រ និងនវានុវត្តន៍។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ខណៈអង្គភាពសេដ្ឋកិច្ចទូទាំងប្រទេសមានប្រមាណ ៧០ ម៉ឺនមូលដ្ឋាន ចំនួនសហគ្រាសអាជីវកម្មដែលចុះបញ្ជីនៅមានចំនួនតិចតួចនៅឡើយ។

លោក ហែម វណ្ណឌី បានអះអាងថា នៅមានសហគ្រាសជាច្រើនទៀតមិនទាន់បានចុះបញ្ជី ហើយក្រសួងកំពុងជំរុញឲ្យមកចុះបញ្ជីក្នុងប្រព័ន្ធដើម្បីទទួលបានអត្ថប្រយោជន៍ ការលើកទឹកចិត្តរួមទាំងការកិច្ចការពារផ្នែកផ្លូវច្បាប់។

លោកថា ការចុះបញ្ជីអាជីវកម្ម ផ្តល់ប្រយោជន៍ដល់សហគ្រាសងាយស្រួលក្នុងការពង្រីកអាជីវកម្ម និងទទួលបានការគាំទ្រពីរដ្ឋាភិបាល។ លោករដ្ឋមន្រ្តីបានលើកក្នុងពេលផ្ទុះការរីករាលដាលជំងឺកូវីដ ១៩ រដ្ឋាភិបាលបានផ្តល់ការគាំទ្រដល់អាជីវកម្មដែលរងផលប៉ះពាល់ដើម្បីជម្នះវិបត្តិជំងឺដែលបន្តអូសបន្លាយ។

ទាក់ទងការជំរុញដល់សហគ្រាសតូចធំចុះបញ្ជីអាជីវកម្ម ថ្លែងនៅក្នុងឱកាសប្រកាសដាក់ឲ្យដំណើរការជាផ្លូវការនៃយុទ្ធសាស្ត្រជាតិ ស្តីពីការអភិវឌ្ឍសេដ្ឋកិច្ចក្រៅប្រព័ន្ធឆ្នាំ២០២៣-២០២៨ កាលពីថ្ងៃទី១០ ខែតុលា ឆ្នាំ២០២៣ ប្រមុខដឹកនាំកម្ពុជាបានលើកទឹកចិត្តដល់សហគ្រាសចុះបញ្ជីអាជីវកម្ម ដើម្បីទទួលបានអត្ថប្រយោជន៍ផ្សេងៗពីរដ្ឋាភិបាល។

សម្តេចធិបតី ហ៊ុន ម៉ាណែត បានគូសបញ្ជាក់ថា សហគ្រាសធុនតូច និងមធ្យម ដែលស្ម័គ្រចិត្តចុះឈ្មោះអាជីវកម្ម ក្រៅពីទទួលការលើកលែងការផាកពិន័យបំណុល ការលើកទឹកចិត្តខាងពន្ធដារ ក៏នឹងទទួលបានលទ្ធភាពក្នុងការបណ្តុះបណ្តាលពាក់ព័ន្ធនឹងការអភិវឌ្ឍ ការគ្រប់គ្រងសហគ្រាស ការបណ្តុះបណ្តាលដល់បុគ្គលិក និងកម្មករនៅក្នុងសហគ្រាស ដើម្បីលើកកម្ពស់សមត្ថភាពផលិតផល និងសហគ្រាសកាន់តែរឹងមាំ។

ការចុះបញ្ជីដោយស្ម័គ្រចិត្តនេះ សហគ្រាសក៏នឹងទទួលបាននូវហិរញ្ញប្បទានជាមួយនឹងអត្រាការប្រាក់សមរម្យពីធនាគាររដ្ឋផងដែរ។

ពាក់ព័ន្ធដល់អ្នកដែលប្រកបរបរខ្លួនឯងរួមមានដូចជា ម្ចាស់ម៉ូតូកង់ ៣ អ្នកលក់ដូរតាមផ្លូវ និងធ្វើអាជីវកម្មតូចតាចតាមផ្លូវ ប្រមុខរដ្ឋាភិលបាលលើកឡើងថា ការចុះបញ្ជីគឺពិតជាល្អដែលធ្វើឱ្យរដ្ឋបានដឹងពីជីវភាពនិងពីភាពងាយរងគ្រោះ ហើយរដ្ឋនឹងផ្តល់ជូននូវការថែទាំសុខភាពដោយឥតគិតថ្លៃ តាមរយៈមូលនិធិសមធម៍សុខាភិបាល, ទទួលបានការបណ្តុះបណ្តាលជំនាញដោយឥតគិតថ្លៃ និងប្រាក់ឧបត្ថម្ភប្រចាំខែ រួមទាំងការជួយផ្សេងៗទៀតផងដែរ។

យ៉ាងណាមិញ បើតាមប្រមុខរដ្ឋាភិបាលគូសបញ្ជាក់ថា ការស្ម័គ្រចិត្តចុះឈ្មោះអាជីវកម្មមិនទទួលការបង្ខិតបង្ខំនោះទេតែទទួលបានការលើកទឹកចិត្តខ្ពស់។ រាល់ពេលការចូលរួមចុះបញ្ជីដោយស្ម័គ្រចិត្តនឹងទទួលបានការលើកលែងពន្ធ ការអនុគ្រោះពិន័យពាក់ព័ន្ធនឹងការធ្វើអនុលោមភាពកន្លងមក និងពន្ធលើកទឹកចិត្តផ្សេងៗទៀត។

រដ្ឋាភិបាលបានដាក់ចេញគោលការណ៍អនុគ្រោះ ៩ ចំណុច ចំពោះសហគ្រាសធុនតូច និងមធ្យម ដែលស្ម័គ្រចិត្តចុះឈ្មោះអាជីវកម្ម។ គោលការណ៍អនុគ្រោះទាំង ៩ ចំណុច ចំពោះសហគ្រាសធុនតូច និងមធ្យម ដែលប្រមុខរដ្ឋាភិបាលប្រកាសនៅក្នុងពិធីដាក់ឲ្យដំណើរការជាផ្លូវការនៃយុទ្ធសាស្ត្រជាតិ ស្តីពីការអភិវឌ្ឍសេដ្ឋកិច្ចក្រៅប្រព័ន្ធឆ្នាំ២០២៣-២០២៨ រួមមាន៖

ទី១៖ ផ្តល់ការលើកលែងការផាកពិន័យនឹងបំណុលទាំងអស់នៅក្នុងឆ្នាំ២០២៣-២០២៨ ចំពោះការមិនបានបំពេញអនុលោមភាពកន្លងមក

ទី២៖ ផ្ដល់ការលើកទឹកចិត្តផ្នែកពន្ធដារ សម្រាប់សហគ្រាសមីក្រូ ចំពោះការចុះបញ្ជីដោយស្ម័គ្រចិត្តនៅក្នុងឆ្នាំ២០២៣-២០២៨ ដោយលើកលែងកម្រៃសេវាចុះបញ្ជីពន្ធដារ និងកម្រៃសេវាធ្វើបច្ចុប្បន្នភាព

ទី៣៖ ផ្តល់ការលើកទឹកចិត្តផ្នែកពន្ធដារសម្រាប់សហគ្រាសធុនតូច ចំពោះការចុះបញ្ជីដោយស្ម័គ្រចិត្តនៅក្នុងឆ្នាំ ២០២៣-២០២៨ តាមរយៈ(១) ការលើកលែងពិន័យទោសទណ្ឌ និងបំណុលពន្ធ ចំពោះការមិនបំពេញអនុលោមភាពកន្លងមកមុនការចុះបញ្ជី (២) លើកលែងកម្រៃសេវាចុះបញ្ជីពន្ធដារនឹងកម្រៃសេវាធ្វើបច្ចុប្បន្នភាពនៅពេលចុះបញ្ជី (៣) លើកលែងពន្ធលើប្រាក់បំណុល និងប្រាក់រំដោះពន្ធលើប្រាក់ចំណូល និងពន្ធអប្បបរមាសម្រាប់២ឆ្នាំក្រោយការចុះបញ្ជី។

ទី៤៖ ផ្តល់ការលើកទឹកចិត្តផ្នែកពន្ធដារសម្រាប់សហគ្រាសធុន និងមធ្យម ចំពោះការចុះបញ្ជីដោយស្ម័គ្រចិត្តក្នុងឆ្នាំ២០២៤- ២០២៥ តាមរយៈ (១) លើកលែងពិន័យទោសទណ្ឌ នឹងបំណុលពន្ធ ចំពោះការមិនពេញអនុលោមភាពកន្លងមកមុនការចុះបញ្ជី (២) លើកលែងពន្ធលើប្រាក់ចំណូល ប្រាក់រំដោះពន្ធលើប្រាក់ចំណូលពន្ធអប្បបរមាសម្រាប់រយៈពេល២ឆ្នាំ ក្រោយការចុះបញ្ជី។

ទី៥៖ ផ្ដល់ការលើកទឹកចិត្តផ្នែកពន្ធដារសម្រាប់សហគ្រាសធុនតូច និងមធ្យម ចំពោះការចុះបញ្ជីដោយស្ម័គ្រចិត្ត ក្នុងឆ្នាំ២០២៤- ២០២៥ តាមរយៈការលើកលែងការបង់ពន្ធប៉ាតង់ សម្រាប់រយៈពេល ២ ឆ្នាំ បន្ទាប់ពីទទួលបានការសម្រេចចុះបញ្ជី

ទី៦៖ កាត់បន្ថយថ្លៃសេវាសម្រាប់ការផ្ដល់សេចក្ដីប្រកាសជូនដំណឹងបើកសហគ្រាស និងការចុះបញ្ជិកាសៀវភៅបញ្ជីប្រចាំគ្រឹះស្ថាន និងសៀវភៅបើកប្រាក់ខែសម្រាប់សហគ្រាសដែលមានចំនួនកម្មករនិយោជិតតិចជាង ៨ នាក់

ទី៧៖ ពង្រឹងយន្តការស្វ័យត្រួតពិនិត្យ និងពង្រឹងការអនុវត្តយន្តការក្រុមអធិការកិច្ចអន្តរក្រសួង នៅថ្នាក់ជាតិ ដើម្បីធានាការចុះធ្វើអធិការរួមគ្នាក្នុងពេលតែមួយ និងមួយលើកក្នុងមួយឆ្នាំ

ទី៨៖ រៀបចំការត្រួតពិនិត្យ និងការធ្វើការរួមគ្នាក្នុងពេលតែមួយ នឹងតែមួយលើកក្នុងមួយឆ្នាំនៅថ្នាក់ក្រោមជាតិ សម្រាប់គ្រប់សហគ្រាសដែលបានឬមិនទាន់បានចុះបញ្ជី ឬស្នើប័ណ្ណឬលិខិតអនុញ្ញាតផ្សេងៗ

ទី៩៖ រៀបចំបង្កើតបទដ្ឋានគតិយុត្តក្របខណ្ឌយន្តការ ដែលមានសកម្មភាពស្របច្បាប់ ជាសហគ្រាសធុនមីក្រូ និងតូច ដោយភ្ជាប់ជាមួយនឹងអត្ថប្រយោជន៍ផ្សេងៗដូចជា ការលើកលែងការបង់ថ្លៃសេវារដ្ឋបាលនានា សម្រាប់រយៈពេល៥ឆ្នាំជាដើម៕