Connect with us

ព័ត៌មានជាតិ

​សមាគមទម្លាក់ការព្យាករណ៍​ ទិន្ន​ផលផលិតកម្មអំបិលក្រោម ១០ ម៉ឺនតោន ដោយសារអា​កាសធាតុ​

បានផុស

នៅ

សមាគមផលិតអំបិលកម្ពុជាបានទម្លាក់ការព្យាករណ៍​ទិន្នផលអំបិលនៅខេត្តកំពត និងខេត្តកែប​មកនៅ​ក្រោម​ ១០ ម៉ឺនតោន ​បន្ទាប់ពីមានការធ្លាក់ភ្លៀង ៣ ថ្ងៃជាប់គ្នា នាប៉ុន្មានថ្ងៃកន្លងមកនេះ។

​លោក ប៊ុន ណារិន ប្រធាន​សមាគម​ផលិត​អំបិល​កម្ពុជា ប្រាប់កម្ពុជាថ្មី ​នៅថ្ងៃទី ​២១ ខែមីនា ឆ្នាំ ២០២៤ នេះថា ​នៅឆ្នាំ ២០២៤នេះ ​កសិករប្រមូលផលអំបិលបានលឿន ក៏ប៉ុន្តែនាប៉ុន្មានថ្ងៃមុន ​មានភ្លៀងធ្លាក់ ៣ ថ្ងៃ​ជាប់ៗ​គ្នា ដែលបានបង្អាកផលិតកម្មអំបិលមួយរយៈ ហើយពេលនេះកសិករទើបចាប់ផ្ដើមដាំដុះឡើងវិញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គិតត្រឹមថ្ងៃទី ០៧ ខែមីនា ​ឆ្នាំ ២០២៤ ​ផលិតកម្មអំបិលសម្រេចបានប្រមាណ ៤ ម៉ឺនតោន ខណៈតម្លៃធ្លាក់ចុះបន្តិច អំបិលល្អ ទម្ងន់ ៥០ គីឡូ តម្លៃ ១.២០០០ រៀល ហើយអំបិលខ្មៅ ៧.០០០ រៀល ទម្ងន់ ៥០ គីឡូ។

​បើតាមប្រធានសមាគមរូបនេះ កាលពីមិនទាន់ភ្លៀងសមាគមរំពឹងថា នឹងបានទិន្នផលដល់ ១០ ម៉ឺនតោន ប៉ុន្តែ បើទឹកភ្លៀងបន្តធ្លាក់ទៀត ទិន្នផលនឹងធ្លាក់ចុះក្រោម ១០ ម៉ឺនតោន នៅឆ្នាំនេះ។

របាយការណ៍​របស់​​​ក្រសួង​ឧស្សាហកម្ម​ ​វិទ្យាសាស្ត្រ​ ​បច្ចេកវិទ្យា​ ​និង​ន​វា​នុ​វត្ត​ន៍​បង្ហាញថា ​នៅក្នុងឆ្នាំ ២០២៣ កម្ពុជាផលិតអំបិលបានជាង ៨ ម៉ឺនតោន (៨​១​.​១​៥​៤​) កើន​ឡើង​ ​១​៤​៨​.​៩​ ​ភាគរយ​​ធៀប​នឹង​ចំនួន​ ​៣​២​.​៩​០​០​ ​តោន​ក្នុង​ឆ្នាំ​២​០​២​២​។

​របាយការណ៍ដដែលបង្ហាញថា ផ្ទៃដីផលិតអំបិលនៅកម្ពុជាមានចំនួន ៣,៩៨៧.៣៥ ហិកតា ក្នុង​នោះ​នៅខេត្តកំពត ៣ ៤៨៩.៤៨ ហិកតា និងខេត្តកែប ៤៩៧.៨៧ ហិកតា៕

អត្ថបទ៖ ឡេង ដេត

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

Sokha Hotels

ព័ត៌មានពេញនិយម