ត្រឹម​ឆ្នាំ ២០២៣ ទឹកស្អាត​ពង្រីក​​គ្របដណ្តប់​ដល់​​ភូមិចំនួន ៦ ៥១៩ ក្នុងតំបន់សេវាសរុប ១០ ១៧៣ ភូមិ​​ទូទាំង​ប្រទេស

សេវា​ទឹកស្អាត​បាន​គ្របដល់​​ភូមិចំនួន ៦ ៥១៩ ក្នុងចំណោមតំបន់សេវាសរុប ១០ ១៧៣ ភូមិ​​ទូទាំង​ប្រទេស។ នេះបើតាម​របាយការណ៍​​ក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ ក្នុង​សន្និបាត​បូក​សរុប​សមិទ្ធផលសំខាន់ៗដែលសម្រេចបានក្នុងឆ្នាំ២០២៣។

ថ្លែងនៅ​ក្នុង​សន្និបាតបូកសរុបលទ្ធផលការងារ ឆ្នាំ២០២៣ និងលើកទិសដៅការងារឆ្នាំ២០២៤ លោក ហែម វណ្ណឌី រដ្ឋមន្រ្តី​ក្រសួង​ឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍​បានចាត់ទុកវិស័យឧស្សាហកម្ម ជា​កម្លាំងចលករមួយក្នុង​ការជំរុញដល់កំណើនសេដ្ឋកិច្ច ដោយបានដើរតួនាទីយ៉ាងសំខាន់នៅក្នុងការបង្កើតការងារ និងបង្កើនប្រាក់ចំណូល​ជូនប្រជាជនកម្ពុជា។

នា​ឱកាស​នោះ ក្រៅពីបង្ហាញ​ពី​វឌ្ឍនភាពវិស័យ​សំខាន់ៗ​ លោក​រដ្ឋមន្រ្តីបានលើក​ឡើង​ពី​​វិស័យទឹកស្អាតដែលបាន​​បោះជំហានរីកចម្រើន​គួរឱ្យកត់សម្គាល់។

លោក​រដ្ឋមន្រ្តី​បាន​គូស​បញ្ជាក់​ថា ការផលិតនិងការផ្គត់ផ្គង់ទឹកស្អាតនៅទូទាំងប្រទេសសម្រេចបានជាង ៤៦១​ លាន​ម៉ែត្រ​គូប កើនឡើងប្រមាណ ១៦%។ នៅដំណាច់ឆ្នាំ២០២៣ រដ្ឋាករទឹកសាធារណៈនិងប្រតិបត្តិករឯកជនបានតភ្ជាប់បណ្តាញ​ទឹក​ស្អាតសរុបបាន​ចំនួន ១ ៣០៧ ៨១០ តំណ ហើយ​ភូមិចំនួន ៦ ៥១៩ ក្នុងចំណោមតំបន់សេវាសរុប ១០ ១៧៣ ភូមិទទួលបានទឹកស្អាតប្រើប្រាស់។

ឆ្នាំ២០២៤ សេដ្ឋកិច្ចកម្ពុជារំពឹងថា នឹងសម្រេចបានកំណើនក្នុងរង្វង់ ៦.៦% ដែលគាំទ្រដោយវិស័យសេដ្ឋកិច្ចសំខាន់ៗមួយ​ចំនួនក្នុងនោះវិស័យឧស្សាហកម្មត្រូវបានព្យាករថានឹងបន្តនិន្នាការកើនឡើងក្នុងរង្វង់ ៨.៥% ដោយសារការងើបឡើងវិញនៃអនុវិស័យកាត់ដេរ ស្របពេលដែលអនុវិស័យកម្មន្តសាលមិនមែនកាត់ដេរនៅបន្តរក្សាបានកំណើនរឹងមាំ។

ផ្អែកតាម​របាយការណ៍​ឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ នៅក្នុង​សន្និបាតបូកសរុបលទ្ធផលការងារ ឆ្នាំ២០២៣ និងលើកទិសដៅការងារឆ្នាំ២០២៤ កម្ពុជា​មានរោងចក្រធុនធ្ងន់បង្កើតថ្មីចំនួន ២៤១ និងបិទទ្វារ​ចំនួន ៩៨ ពោលគឺកើនចំនួន ១៤៣ រោងចក្រ (៧,២១%) ធៀបនឹងឆ្នាំ ២០២២ ដែលធ្វើឱ្យចំនួនរោងចក្រធុនធ្ងន់ដែល​កំពុងដំណើរការទូទាំងប្រទេសមានចំនួន ២.១២៥ រោងចក្រ និងផ្តល់ការងារចំនួន ១ ០៤០ ៣៣៣ កន្លែង។ ចំណែកទុនវិនិយោគសរុបក្នុងឆ្នាំ២០២៣ មានចំនួន ១៨.៥៦ ពាន់លានដុល្លារអាមេរិក កើនឡើង ១១.២៤% ធៀបនឹងឆ្នាំ​២០២២។ តម្លៃបរិមាណផលិតមានចំនួន ១៦.៣៦ ពាន់លានដុល្លារ កើនឡើង ៥៣១ លានដុល្លារ ឬប្រមាណ​៣.៣៥% បើធៀបនឹងឆ្នាំ២០២២។

រីឯការងារលើកកម្ពស់សហគ្រាសធុនតូច និងមធ្យម ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានសម្របសម្រួលការបង្កើតសហគ្រាសធុនតូច និងមធ្យមថ្មីចំនួន ៥ ៣២៨ និងបន្តអាជ្ញាបណ្ណសហគ្រាសធុនតូច និងមធ្យមចំនួន ៥ ១៥៨ នៅឆ្នាំ២០២៣។ កិច្ចខិតខំប្រឹងប្រែងទាំងនេះបង្ហាញពីការប្តេជ្ញាចិត្តរបស់ក្រសួង ក្នុងការអភិវឌ្ឍ​សហគ្រិនភាព និងជំរុញបរិយាកាសអំណោយផលសម្រាប់កំណើនអាជីវកម្ម៕