លោក Macron អំពាវនាវ​ឱ្យ​រុស្ស៊ី​មាន​បទ​ឈប់​បាញ់​ ក្នុងពេល​កីឡា​អូឡាំពិក​២០២៤

រុស្ស៊ី នឹងត្រូវបានស្នើសុំឲ្យមានបទឈប់បាញ់ក្នុងអំឡុងពេលការប្រកួត​កីឡាអូឡាំពិកទីក្រុងប៉ារីសឆ្នាំ២០២៤ ដែលនឹងប្រព្រឹត្តទៅពីថ្ងៃទី២៦ ខែកក្កដា ដល់ថ្ងៃទី១១ ខែសីហា ដោយ​ប្រធានាធិបតីបារាំង លោក Emmanuel Macron បាននិយាយកាលពីថ្ងៃអាទិត្យពី“សំណើសុំបទឈប់បាញ់ក្នុងអំឡុងពេលកីឡាអូឡាំពិក”។

លោក Macron បាននិយាយ​ថា ៖«បាទ! នឹងមានសំណើមួយ»។ អ្នកបកប្រែបានដកស្រង់សម្តីប្រធានាធិបតីបារាំង​ក្នុង​បទ​សម្ភាស​ដែល​មាន​ការ​ចោទ​សួរ​ជុំ​វិញ​សង្គ្រាម​នៅអ៊ុយក្រុយ ហើយ​ប្រធានាធិបតីបារាំងបាន​បញ្ជាក់​ក្នុងស្មារតីនៃចលនាអូឡាំពិកថា «នេះជាសារសន្តិភាព»។

ប្រធានាធិបតីបារាំងបានពន្យល់ពីការសម្រេចចិត្តរបស់លោកតាមវិធីដូចតទៅ ៖«ដូចប្រពៃណីនៅក្នុងប្រទេសដែលធ្វើ​ម្ចាស់ផ្ទះកីឡាអូឡាំពិក បារាំងនឹងគោរពសេចក្តីសម្រេចរបស់អង្គការសហប្រជាជាតិ ក្នុងខែវិច្ឆិកា ឆ្នាំ២០២៣ នៅពេលដែលរដ្ឋសមាជិកចំនួន១២០​បានអនុម័តជាឯកច្ឆ័ន្ទលើបទឈប់បាញ់អូឡាំពិក»។

លោក Macron បាននិយាយថា ប្រទេសបារាំងក៏នឹងគោរពការសម្រេចចិត្តរបស់គណៈកម្មាធិការអូឡាំពិក​អន្តរជាតិ​ ក្នុងការអនុញ្ញាតឱ្យអត្តពលិករុស្ស៊ីចូលរួមប្រកួតក្រោមទង់ជាតិអព្យាក្រឹត។ លោកបានបន្តថា ៖«ការគ្រប់គ្រងប្រទេសម្ចាស់ផ្ទះគឺត្រូវដើរទន្ទឹមនឹងចលនាអូឡាំពិក។ ពិតណាស់ យើងនឹងតាមដានការបង្ហាញឆន្ទះរបស់ពួកគេយ៉ាងដិតដល់ ដើម្បីកុំឱ្យនរណាម្នាក់ទាញយកប្រយោជន៍ពីអត្តពលិកក្នុងស្ថានភាពនេះ»។

គណៈកម្មាធិការអូឡាំពិកអន្តរជាតិបានព្យួរគណៈកម្មាធិការអូឡាំពិករុស្ស៊ី (ROC)។ ពួក​គេ​បានរក្សាសិទ្ធិដើម្បីធ្វើការសម្រេចចិត្តនាពេលអនាគតទាក់ទងនឹងការចូលរួមរបស់អត្តពលិករុស្ស៊ីនៅទីក្រុងប៉ារីសឆ្នាំ២០២៤ នៅក្នុងកិច្ចប្រជុំបន្ទាប់នៃក្រុមប្រឹក្សាប្រតិបត្តិរបស់ IOC នៅថ្ងៃទី១៩ ដល់ថ្ងៃទី២១ ខែមីនា។

អត្តពលិកទាំងនោះ​ត្រូវ​​បំពេញលក្ខខណ្ឌមួយចំនួន – មិនជាផ្នែកមួយនៃយោធា និងមិនបានគាំទ្រការលុកលុយ​លើ​អ៊ុយក្រែន – នឹងចូលរួមក្នុងការប្រកួតជម្រុះសម្រាប់ហ្គេមរដូវក្តៅ ប៉ុន្តែមានតែ​វិញ្ញាសាឯកត្តជន និង​គ្មាននិមិត្តសញ្ញាជាតិរបស់ពួកគេ ក្រោមឈ្មោះ ” អត្តពលិកអព្យាក្រឹតបុគ្គល”។

ទីភ្នាក់ងារសារព័ត៌មាន TASS បានរាយការណ៍ថា អ្នកនាំពាក្យក្រសួងការបរទេសរុស្ស៊ី លោកស្រី Maria Zakharova បានអំពាវនាវឱ្យបារាំងបញ្ឈប់ការផ្គត់ផ្គង់អាវុធដល់អ៊ុយក្រែន ជាការឆ្លើយតបទៅនឹងការអំពាវនាវរបស់ប្រធានាធិបតី Emmanuel Macron ឱ្យមានការឈប់បាញ់នៅអ៊ុយក្រែន អំឡុងពេលកីឡាអូឡាំពិក។

ប្រធានាធិបតី វ្ល៉ាឌីមៀ ពូទីន ក៏ត្រូវបានសួរអំពីសំណើរបស់លោក Macron សម្រាប់បទឈប់បាញ់ក្នុងអំឡុងពេលកីឡាអូឡាំពិក ៖«ខ្ញុំមិនដឹងអំពីសេចក្តីថ្លែងការណ៍នេះពីប្រធានាធិបតីបារាំងទេ។ យើងត្រៀមខ្លួនរួចជាស្រេចដើម្បីពិចារណាសំណួរណាមួយ ប៉ុន្តែយើងនឹងតែងតែនៅក្នុងស្ថានភាពណាមួយ បន្តពីផលប្រយោជន៍របស់សហព័ន្ធរុស្ស៊ី»៕

ប្រែសម្រួល៖ មន្នីរ័ត្ន
ប្រភព៖ Inside The Games