និស្សិតកសិកម្មខ្មែរ១រូប បង្ហាញក្ដីសោកស្ដាយដែលបាត់បង់ឱកាសសិក្សានៅអ៊ីស្រាអែលព្រោះតែសង្គ្រាម

និស្សិតកសិកម្មរបស់កម្ពុជា ដែលទៅបំពេញកម្មសិក្សាការងារនៅប្រទេសអ៉ីស្រាអែល លោក សោម ភិរុណ បានរៀបរាប់បង្ហាញក្ដីសោកស្ដាយថា សង្គ្រាមដែលបង្កឡើងដោយក្រុមហាម៉ាស និងអ៉ីស្រាអែល បានបំផ្លាញក្ដីស្រមៃរបស់ខ្លួន ដែលចង់យកជំនាញ និងចំណេះមកអភិវឌ្ឍន៍ប្រទេសពាក់កណ្ដាលទី។

លោក សោម ភិរុណ បានសរសេររៀបរាប់នៅលើទំព័រហ្វេសប៊ុកផ្ទាល់ខ្លួន នារសៀលថ្ងៃទី១៦ ខែកុម្ភៈ នេះ ដូច្នេះថា “សែនស្ដាយជំនាញនេះណាស់ ដោយសារតែសង្គ្រាមធ្វើឱ្យខ្ញុំបាត់ឱកាសនេះ យកជំនាញ និងចំណេះមកអភិវឌ្ឍន៍ប្រទេសកម្ពុជាយើងវិញ”។

ទន្ទឹមនឹងការសម្ដែងការសោកស្ដាយ ព្រោះតែធ្លាប់ជួបស្ថានការណ៍ដ៏អាក្រក់ស្ទើរតែឆក់អាយុជីវិតនៅលើទឹកដីអ៉ីស្រាអែល និងបំផ្លាញក្ដីស្រមៃរបស់ខ្លួន នាពេលនេះ ជាពេលដែលត្រឡប់មកប្រទេសកម្ពុជាដែលពោរពេញដោយសន្តិភាពវិញ លោក សោម ភិរុណ បានបង្ហាញការតាំងចិត្តថា នឹងនៅតែតស៊ូឡើងវិញ មិនចុះចាញ់ឡើយ ដរាបណាជីវិតនៅតែមាន។ លោក សោម ភិរុណ សរសេរអះអាងបែបនេះ “តែខ្ញុំមិនចុះចាញ់ទេ មានជីវិតនៅតែតស៊ូ”។

គួររំឮក សង្គ្រាមរវាងក្រុមហាម៉ាស និងអ៉ីស្រាអែល បានផ្ទុះឡើងកាលពីថ្ងៃទី០៧ ខែតុលា ឆ្នាំ២០២៣​ ហើយបន្តមកដល់ពេលបច្ចុប្បន្ន។  សង្គ្រាមនេះ មិនត្រឹមតែបង្កផលប៉ះពាល់ និងឆក់យកជីវិតក្រុមហាម៉ាស និងអ៉ីស្រាអែលតែប៉ុណ្ណោះទេ ពោលសង្គ្រាមនេះ ក៏បានឆក់ជីវិតនិស្សិតម្នាក់ខ្មែរឈ្មោះ ចាន់ ឧត្ដម ជាកូនអ្នកខេត្តកណ្ដាលដែរ។

ក្រោយឆ្លងកាត់ស្ថានភាពជីវិតរស់នៅក្នុងប្រទេសជឿនលឿន តែជួបហេតុការណ៍សង្គ្រាម គ្មានសន្តិភាពគួរឱ្យភ័យខ្លាចកន្លងមក លោក សោម ភិរុណ ក៏បានផ្ដាំផ្ញើតាមបណ្ដាញសង្គមហ្វេសប៊ុកថា    ថ្វីត្បិតតែការរស់នៅកម្ពុជា ជាប្រទេសដែលមិនទាន់រីកចម្រើនដូចប្រទេសដទៃក៏ពិតមែន តែពលរដ្ឋបានរស់នៅក្នុងម្លប់នៃសន្តិភាពគ្មានការភ័យខ្លាច៕

អត្ថបទ៖ ង៉ិល ណារ៉ាត់