ព័ត៌មានជាតិ
ចិន បានផ្តល់ឥណទានសម្បទានសាងសង់គម្រោងស្ពានធំៗនៅកម្ពុជាទាំងអស់ចំនួន១៦ហើយ
គិតមកដល់ពេលនេះ ចិនបានផ្តល់ឥណទានសម្បទានអភិវឌ្ឍគម្រោងសាងសង់ស្ពាននៅកម្ពុជា បានចំនួន ១៦ហើយ ទាំងស្ពានឆ្លងទន្លេ និងស្ពានអាកាស។ នេះបើតាមការបញ្ជាក់របស់លោក ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន នៅក្នុងពិធីសម្ពោធបើកការដ្ឋាន គម្រោងសាងសង់ស្ពានឆ្លងកាត់ទន្លេបាសាក់ តភ្ជាប់តំបន់ចាក់អង្រែក្រោម-ព្រែកប្រា នៅព្រឹកថ្ងៃទី ១៩ ខែកុម្ភៈ ឆ្នាំ ២០២៤។
បើតាមលោក ប៉េង ពោធិ៍នា ស្ពានទាំង ១៦ ដែលទទួលបានឥណទានសម្បទាន និងជំនួយរបស់ចិន រួមមាន ស្ពានមិត្តភាពកម្ពុជា ចិន , ស្ពានសេកុង ស្ពានស្ទឹងត្រែង ស្ពានព្រែកក្តាម ស្ពានព្រែកតាមាក់ ស្ពានជ្រោយចង្វាទី២ ស្ពានមេគង្គ ស្ពានស្ទឹងត្រែង ស្ពានតាខ្មៅ ស្ពានកោះធំ ស្ពានអាកាកម្ពុជាចិនសែនសុខ ស្ពានស្ទឹងត្រង់ក្រូចឆ្មា ស្ពានកោះអន្លង់ចិន ស្ពានឆ្លងកាត់ទន្លេមេគង្គក្រចេះ , ស្ពានរំលង ឬស្ពានអាកាសចំនួន៤កន្លែង៖ ឆ្លងកាត់ផ្លូវជាតិលេខ៤ លេខ៣ លេខ២ និងលេខ២១ ដែលជាផ្នែកនៃគម្រោងផ្លូវក្រវ៉ាត់ក្រុងទី៣ និងស្ពានឆ្លងកាត់ទន្លេបាសាក់ ចាក់អង្រែក្រោម-ព្រែកប្រា ដែលកំពុងបើកការដ្ឋានសាងសង់នេះ។
ស្ពានឆ្លងកាត់ទន្លេបាសាក់ ចាក់អង្រែក្រោម-ព្រែកប្រា នឹងជំរុញបន្ថែមនូវតំបន់អភិវឌ្ឍភូមិសាស្រ្តពាណិជ្ជកម្មរាជធានីភ្នំពេញ ឱ្យមានវិសាលភាពកាន់តែទូលំទូលាយ និងហេដ្ឋារចនាសម្ព័ន្ធប្រទាក់ក្រឡាគ្នា ជាពិសេសជួយសម្រួលដល់ការធ្វើដំណើរបស់ប្រជាពលរដ្ឋ និងកាត់បន្ថយការកកស្ទះចរាចរណ៍។ គម្រោងនេះ គ្រោងបញ្ចប់ឆ្នាំ ២០២៧ ដោយចំណាយថវិកាសាងសង់ប្រមាណ ៦២,២លានដុល្លារអាមេរិក ជាឥណទានសម្បទានរបស់រដ្ឋាភិបាលចិន និងថវិកាបដិភាគរបស់រាជរដ្ឋាភិបាលកម្ពុជា សាងសង់ដោយក្រុមហ៊ុនសៀងហៃ។
លោករដ្ឋមន្រ្តី បានគូសបញ្ជាក់ថា ក្នុងរយៈពេល ២៥ឆ្នាំ ចុងក្រោយនេះ រាជរដ្ឋាភិបាលបានអនុវត្តគោលនយោបាយជាច្រើន ដោយសម្រេចបានគោលនយោបាយធំៗ រួមទាំងសមិទ្ធផលហេដ្ឋរចនាសម្ព័នផ្លូវ ស្ពានខ្វាត់ខ្វែងប្រទាក់ក្រឡានៅទូទាំងប្រទេស ដែលបានជួយអភិវឌ្ឍសង្គមសេដ្ឋកិច្ច និងផ្លាស់ប្តូរមុខមាត់កម្ពុជា កាន់តែល្អប្រសើរឡើង។
ការអភិវឌ្ឍសាងសង់ស្ពាននេះ អនុវត្តតាមគោលនយោបាយដ៏ត្រឹមត្រូវ របស់រាជរដ្ឋាភិបាលកម្ពុជា ក្នុងការតភ្ជាប់នូវហេដ្ឋារចនាសម្ព័ន្ធផ្លូវសំខាន់ៗឱ្យមានភាពប្រទាក់ក្រឡាគ្នា និងកាន់តែប្រសើរឡើងដើម្បីឆ្លើយតបនឹងការរីកចម្រើនរបស់ប្រទេសជាតិ នាពេលបច្ចុប្បន្ន និងសម្រាប់បម្រើឱ្យសង្គមសេដ្ឋកិច្ច ដែលកំពុងមានការលូតលាស់រីកចម្រើន។ នេះជាការបន្ថែមរបស់លោក ប៉េង ពោធិ៍នា។
សម្តេច ហ៊ុន ម៉ាណែត នាយករដ្ឋមន្រ្តីកម្ពុជា បានលើកឡើងថា មិត្តចិនជានិច្ចជាកាល តែងតែជួយអភិវឌ្ឍហេដ្ឋរចនាសម្ព័នផ្លូវស្ពាននៅកម្ពុជា ដើម្បីបម្រើដល់ការដឹកជញ្ជូន ការផ្សារភ្ជាប់ទំនាក់ទំនងរបស់ប្រជាពលរដ្ឋទៅដល់គ្រប់ទីកន្លែង ជាពិសេសបានតភ្ជាប់ជាមួយប្រទេសជិតខាងស្របតាមតម្រូវការ និងការរីកចម្រើនរបស់ប្រទេសជាតិ។ បើតាមសម្តេចធិបតី ការជួយជ្រោមជ្រាយនិងឧបត្ថម្ភគាំទ្រទាំងនេះ បានធ្វើឱ្យមិត្តចិនក្លាយជាប្រទេសលំដាប់ទី១ ដែលបានផ្តល់ឥណទានសម្បទាន និងជំនួយជាច្រើនសម្រាប់អភិវឌ្ឍ និងកសាងហេដ្ឋរចនាសម្ព័ន្ធឱ្យរីកចម្រើននៅកម្ពុជា។
ជាមួយគ្នានេះ លោក វ៉ាង វិនធាន អគ្គរដ្ឋទូតចិនប្រចាំនៅកម្ពុជា បានលើកឡើងថា កម្ពុជា ចិន គឺជាមិត្តដែកថែបជាយូរមកហើយ។ លោកបានបន្តថា ចិនរីករាយបន្តកិច្ចសហប្រតិបត្តិការជាមួយកម្ពុជា។ ចិននឹងបន្តពង្រីកការវិនិយោគមកកាន់កម្ពុជា ជាពិសេសលើវិស័យហេដ្ឋារចនាសម្ព័ន្ធ និងត្រួសត្រាយផ្លូវលើការអភិវឌ្ឍឱ្យកាន់តែច្រើន សម្រាប់អ្នកជំនាន់ក្រោយ។
មហិច្ចតាគ្មានព្រំដែនរបស់កម្ពុជា ក្នុងការអភិវឌ្ឍហេដ្ឋារចនាសម្ព័ន នឹងបន្តជាបន្តបន្ទាប់ទៀត។ ជាក់ស្តែងថ្លែងនៅក្នុងពិធីសម្ពោធបើកការដ្ឋាន គម្រោងសាងសង់ស្ពានឆ្លងកាត់ទន្លេបាសាក់ តភ្ជាប់តំបន់ចាក់អង្រែក្រោម-ព្រែកប្រា សម្តេចនាយករដ្ឋមន្រ្តី ហ៊ុន ម៉ាណែត បានបង្ហើបឱ្យដឹងថា កម្ពុជា កំពុងសិក្សាសាងសង់ស្ពានវែងជាងគេ នៅក្នុងភូមិសាស្រ្តខេត្តកំពង់ឆ្នាំង នាពេលខាងមុខនេះ។ ក្រៅពីនេះ ក៏មានគម្រោងសាងសង់ស្ពានពីរបន្ថែមទៀតផងដែរ៕
-
កីឡា៥ ថ្ងៃ ago
ឈ្នះខ្សែក្រវាត់ថ្ងៃជាមួយ ឈឿង ល្វៃ កីឡាករ Erdene ក៏មានរថយន្តទទួល
-
ព័ត៌មានជាតិ៤ ថ្ងៃ ago
ម្ចាស់សំណង់របងថ្មនៅរមណីយដ្ឋានឆ្នេរនេសាទ នៅតែរឹងទទឹងមិនព្រមវាយកម្ទេចរបងចេញ
-
សេដ្ឋកិច្ច១ សប្តាហ៍ ago
តាសក់ផ្អែម ៥ តោន របស់ កសិករម្នាក់ លក់ចេញអស់ ក្រោយសហគមន៍កសិកម្មជួយរកទីផ្សារ
-
ព័ត៌មានអន្ដរជាតិ១ សប្តាហ៍ ago
នាឡិកា ៦ គ្រឿងរបស់កូនពៅសេដ្ឋី ឥណ្ឌា ដែលខំសន្សំទុក មានមួយមេ Facebook ទាក់ចិត្តខ្លាំង
-
សន្តិសុខសង្គម៦ ថ្ងៃ ago
ដកហូតមុខតំណែង មេបញ្ជាការរងស្រុកស្វាយជ្រុំ៣នាក់ ពាក់ព័ន្ធករណីទារប្រាក់ពីអ្នកប្រើប្រាស់គ្រឿងញៀនជាង១ពាន់ដុល្លារ
-
ជីវិតកម្សាន្ដ៦ ថ្ងៃ ago
មនុស្សស្និទ្ធស្នាលទម្លាយពីស្ថានភាព Ngoc Trinh ក្រោយចេញពីពន្ធនាគារជាង៣ខែ
-
ព័ត៌មានជាតិ៤ ថ្ងៃ ago
ដើម្បីកុំឱ្យភោជនីយដ្ឋានដួលរលំបះជើងទាន់ សម្ដេចធិបតី បញ្ជាឱ្យកែម៉ោងពិនិត្យជាតិអាល់កុល
-
ជីវិតកម្សាន្ដ៤ ថ្ងៃ ago
តួជនទី៣ Benz ត្រលប់មកតំណែងស្រីស្អាតម្ដងទៀត ទោះឈានដល់អាយុ៤៣ឆ្នាំ